A trobi di Jehovah abi nanga den nâsi
„Wan babari seiker sa de foe jere krin, srefi te na den moro farawe presi foe grontapoe, bika Jehovah abi wan trobi nanga den nâsi.” — JEREMIA 25:31.
1, 2. (a) San ben pasa ini Juda baka a dede foe kownoe Josia? (b) Soema ben de a lasti kownoe foe Juda, èn fa a ben njan pina foe di a no ben de getrow?
A KONDRE Juda ben ondrofeni moeilek ten di ben tranga foe pasa. Wán boen kownoe, Josia, ben man tapoe na atibron foe Jehovah foe wan pisi ten. Ma san ben kon, baka di den ben kiri Josia ini 629 bifo Gewoon Teri? Den kownoe di ben kon na en baka, no ben gi Jehovah grani.
2 A lasti kownoe foe Juda, Sedekia, a di foe fo manpikin foe Josia ben tan, so leki fa 2 Kownoe 24:19 e taki, „doe san takroe ini Jehovah ai, ini akroederi nanga ala sani di [en moro owroe brada] Jojakim ben doe”. San ben de a bakapisi? Nebukadnesar ben opo kon feti nanga Jerusalem, ben kisi Sedekia, ben kiri den manpikin foe en leti na fesi en ai, ben breni en, èn ben teki en go na Babilon. Boiti dati, nanga tranga den Babilonsma ben teki èn foefoeroe den patoe di sma ben e gebroiki te den ben e anbegi Jehovah, ben soetoe faja gi a tempel nanga a foto. Den sma di ben tan na libi, ben tron katiboman ini Babilon.
3. Sortoe pisi ten ben bigin nanga a pori foe Jerusalem ini 607 bifo Gewoon Teri, èn san ben sa pasa na a kaba foe a pisi ten dati?
3 A jari dati, 607 bifo Gewoon Teri, no wawan ben abi leki marki wan pori di Jerusalem ben kisi te foe kaba, ma a ben de a bigin toe foe „den fasti ten foe den nâsi”, so leki fa den e taki foe disi ini Lukas 21:24. A pisi ten disi foe 2520 jari ben kaba ini wi jarihondro, ini a jari 1914. Na a ten dati a ten ben doro foe Jehovah, nanga jepi foe Jesus Krestes, en Manpikin di a ben poti leki Kownoe, di moro bigi moro Nebukadnesar, leisi kroetoe gi a pori grontapoe èn tjari a kroetoe dati kon na a grontapoe dati tapoe. A kroetoe disi e bigin nanga a disiten prenki foe Juda, wan prenki di e taki dati en e teki presi gi Gado nanga Krestes na grontapoe.
4. Sortoe aksi e kon now ini a tori foe a profeititori foe Jeremia?
4 Wi e si wan srefi sortoe sani na mindri a broeja ini den lasti jari foe Juda ondro a tiri foe den kownoe foe en — nanga rampoe sani di e pasa, di abi krakti toe tapoe den nâsi na den lontoe — èn a broeja ini krestenhèit ini a ten disi? Foe troe wi e si dati! San a profeititori foe Jeremia e sori wi dan ini a tori foe fa Jehovah sa handri nanga afersi ini a ten disi? Meki wi go loekoe.
5, 6. (a) Fa a situwâsi ini krestenhèit sensi 1914 gersi di foe Juda leti bifo a kisi pori? (b) Sortoe boskopoe a disiten Jeremia ben tjari gi krestenhèit?
5 Na Ingrisi koniman ini wiskunde èn filosoofman Bertrand Russell, ben taki so wan 40 jari pasa kaba: „Foe sensi 1914, ala sma di e froestan a fasi fa sani e waka na grontapoe, ben broko den ede srefisrefi foe san ben gersi wan opowaka go na moro bigi rampoe di a lot ben poti so èn di ben bosroiti na fesi kaba taki na so sani sa moesoe pasa.” Èn a Doisri tiriman Konrad Adenauer ben taki: „Sensi 1914, seikerfasi nanga rostoe no de foe feni moro ini a libi foe libisma.”
6 Ini a ten disi, neleki ini a ten foe Jeremia, a kon di wi e kon moro krosibei foe a kaba foe a seti foe sani, abi leki marki a trowe di den e trowe heri ipi broedoe foe sma di no froedini en taki a broedoe foe den e trowe, spesroetoe ini den toe grontapoe orlokoe ini a jarihondro disi. A moro bigi pisi foe den orlokoe disi, na nâsi foe krestenhèit ben feti den, di e taki dati den e anbegi a Gado foe bijbel. Fa den e hoigri! A no de foe froewondroe, taki Jehovah ben seni den Kotoigi foe en go na den, foe di a e taki ini den wortoe foe Jeremia 25:5, 6: „Drai kon baka, grantangi, ibriwan sma foe en takroe pasi èn foe a doe di oenoe e doe san takroe . . . Èn no waka baka den tra gado, so taki oenoe e dini den èn boigi na den fesi, so taki oenoe no e afrontoe mi nanga den wroko foe oen anoe, èn taki mi no e meki rampoe kon na oen tapoe.”
7. Sortoe boeweisi de, taki krestenhèit no arki den warskow foe Jehovah?
7 Ma den nâsi foe krestenhèit misi foe drai kon baka. Disi ben de foe si di den ben tjari moro ofrandi gi a gado foe orlokoe ini Korea nanga Vietnam. Èn den e tan gi moni na den bisnisman di e handri na ini dede, den sma di e meki fetisani. Den kondre foe krestenhèit ben gi a moro bigi pisi foe pikinmoro wán biljoen Amerkan dala, di ben pai gi fetisani ibri jari ini den jari foe 1980. Foe 1951 te nanga 1991, a moni di den Verenigde Staten wawan ben pai gi legre afersi, ben pasa a moni di ala bigi Amerkan bisnisman ben meki makandra. Sensi di den ben meki bekènti na ala sei taki a Kowroe Orlokoe kon na wan kaba, den ben saka a nomroe foe owroe nucleair fetisani, ma bigi maksin foe tra fetisani di kan kiri sma, e tan èn den e tan gro kon bigi moro nanga moro. Wan dei den kan gebroiki den.
A kroetoe tapoe krestenhèit di e gi pasi foe sma doe ala san den wani
8. Fa den wortoe foe Jeremia 25:8, 9 sa kon troe ini a tori foe krestenhèit?
8 Den sani di Jehovah e taki moro fara èn di de foe feni ini Jeremia 25:8, 9, e fiti now spesroetoe krestenhèit, di ben misi foe libi ini akroederi nanga den kresten markitiki foe regtfardikifasi: „Foe dati ede, disi na san Jehovah foe den legre ben taki: ’Foe di oenoe no ben gi jesi na den wortoe foe mi, loekoe, mi e seni èn mi sa teki ala famiri foe noordsei’, na so Jehovah e taki, ’srefi seni go na Nebukadresar, a kownoe foe Babilon, mi foetoeboi, èn mi sa tjari den kon kontrari a kondre disi èn kontrari den sma di e libi na ini èn kontrari ala den nâsi disi na en lontoe; èn mi sa gi den abra foe den kisi pori èn meki den kon tron wan sani foe skreki èn wan spotoe sani èn leki presi di pori te ten di no abi marki.’” So boen, a bigi banawtoe sa bigin nanga krestenhèit, di e kari densrefi pipel foe Gado, èn te foe kaba, a sa bradi ensrefi go na heri grontapoe, na ’ala den nâsi na en lontoe’.
9. Na sortoe fasi a jeje fasi foe krestenhèit kon tron moro takroe ini wi ten?
9 Wan ten ben de ini krestenhèit taki sma ben abi lespeki gi bijbel, taki sma pikinmoro na ala sei ben si a trowlibi èn na osofamiri-libi leki wan fonten foe kolokoe, taki sma ben wiki froekoefroekoe mamanten èn ben abi prisiri na ini na aladei wroko foe den. Foeroe sma ben kowroe den ati te den ben e leisi èn ben e studeri a Wortoe foe Gado te neti na a leti foe kokolampoe. Ma ini a ten disi, jajo sekslibi, brokotrow, fowtoe gebroiki foe drug èn a droengoe di sma e droengoe, a pasa di sma e pasa wet, bigi-ai, a lesi di sma lesi foe wroko, a meki di sma e meki TV e basi den èn tra wrokosani, pori a libi so, taki a e gi foe frede. Disi e pasa bifo a bigi pori di Jehovah Gado de foe tjari kon tapoe krestenhèit di e gi pasi foe sma doe ala san den wani.
10. Taki foe a fasi fa krestenhèit sa de, baka te Jehovah tjari en kroetoe kon na en tapoe.
10 Jehovah e meki bekènti, so leki fa wi e leisi ini Jeremia kapitel 25, vers 10 nanga 11: „Èn mi sa poeroe komoto na ini den, a babari foe bigi prisiri èn a babari foe breitifasi, a sten foe a trowmasra èn a sten foe a trow-oema, a babari foe na anoemiri èn a leti foe a lampoe. Èn a heri kondre disi moesoe tron wan presi di pori krinkrin èn de leki wan sani foe skreki.” Seiker a sa de wan sani foe skreki, te den bigi tempel èn den paleisi foe krestenhèit di lai nanga goedoe, sa kisi a pori foe den. O bigi a pori disi sa de? Ini a ten foe Jeremia, a bigi pori foe Juda èn den nâsi na en lontoe, ben de moro leki 70 jari, wan ten di Psalm 90:10 e kari wan spesroetoe libimarki. A kroetoe di Jehovah sa tjari kon ini a ten disi sa de krinkrin, foe têgo.
A kroetoe tapoe Babilon a Bigiwan
11. Soema sa de a wrokosani di sa pori krestenhèit? Foe san ede?
11 So leki fa a ben froeteri na fesi ini Openbaring 17:12-17, dan a ten sa kon, taki Jehovah sa bigin foe doe wan aparti sortoe sani, foe di a sa poti ini den ati foe „den tin toetoe” — den sroedati legre foe den Verenigde Nâsi — „foe doe en prakseri” foe pori a grontapoe makti foe falsi fasi foe anbegi krinkrin. Fa disi sa pasa? Wan lo fasi de, di kan meki „den tin toetoe” foe Openbaring kapitel 17 ini den wortoe foe vers 16, „no wani si a hoeroe-oema na ai èn . . . bron en krinkrin nanga faja”. A troe, taki nucleair fetisani kon moro foeroe èn te now den e kon moro foeroe ini foeroe presi na grontapoe pe orlokoe kan broko. Ma wi moesoe wakti èn si fa Jehovah sa poti ini na ati foe den politiek tiriman foe tjari a refensi foe en kon na den tapoe.
12. (a) San ben pasa nanga Babilon, baka di a ben pori Jerusalem? (b) San sa pasa nanga den nâsi baka te krestenhèit kisi pori?
12 Ini owroeten a ben kon de a ten foe Babilon ondrofeni a faja atibron foe Jehovah. Na so, foe bigin nanga Jeremia kapitel 25, vers 12, a profeititori e si afersi na wan fasi di baka ten e kon kenki. Foe di Nebukadnesar nanga Babilon no abi a ròl moro foe a Sma di moesoe tjari a strafoe foe Jehovah kon, meki den e teri den now makandra nanga ala den grontapoe nâsi. Na so a situwâsi de toe ini a ten disi. „Den tin toetoe” foe Openbaring kapitel 17 sa pori falsi fasi foe anbegi krinkrin, ma baka ten densrefi sa kisi pori makandra nanga ala den tra „kownoe foe grontapoe”, so leki fa a skrifi ini Openbaring kapitel 19. Jeremia 25:13, 14 e taki fa Babilon makandra nanga „ala den nâsi” di na wan onregtfardiki fasi wroko a pipel foe Jehovah pasa marki, e kisi wan kroetoe. Jehovah ben gebroiki Nebukadnesar leki a sma di ben tjari a strafoe foe en kon tapoe Juda. Ma tokoe en nanga den kownoe foe Babilon, di ben kon baka ten, na wan heimemrefasi ben hei densrefi kontrari Jehovah srefi, so leki fa a ben de foe si, foe eksempre, di den ben meki den patoe foe Jehovah tempel lasi den santafasi (Danièl 5:22, 23). Èn di den Babilonsma ben pori Jerusalem, den nâsi di ben de lontoe Juda — Moab, Amon, Tirus, Edom, nanga trawan — ben prisiri èn den ben spotoe a pipel foe Gado. Den toe ben moesoe kisi wan refensi foe Jehovah di fiti den.
A kroetoe tapoe „ala den nâsi”
13. San a „beker [disi] foe a win foe atibron” wani taki, èn san e pasa nanga denwan di e dringi foe a beker?
13 Foe dati ede Jeremia e froeklari, so leki fa a skrifi ini kapitel 25, vers 15 nanga 16: „Disi na san Jehovah, a Gado foe Israèl, ben taigi mi: ’Teki a beker disi foe a win foe mi atibron poeroe na mi anoe èn joe moesoe meki ala den nâsi pe mi e seni joe go, dringi en. Èn den moesoe dringi èn slenger go-kon èn tjari densrefi leki lawman foe a feti-owroe ede di mi e seni go na den mindri.’” Foe san ede a de wan ’beker foe a win foe Jehovah atibron’? Na Mateus 26:39, 42 nanga Johanes 18:11, Jesus ben taki foe wan „beker” di ben agersi a wani foe Gado gi en. Na so toe, den e gebroiki wan beker foe agersi a wani foe Jehovah gi den nâsi foe dringi a refensi foe en. Jeremia 25:17-26 e kari den nationaal groepoe disi di e prenki na fesi den nâsi ini a ten disi.
14. Soema e kisi foe dringi foe a beker foe a win foe Jehovah atibron, so leki fa a profeititori foe Jeremia e taki, èn san disi e agersi gi a ten foe wi?
14 Baka te krestenhèit, neleki Juda, kon tron „wan presi di pori krinkrin, wan sani foe skreki, wan spotoe sani, èn wan floekoe”, dan wan pori e wakti a tra pisi foe a grontapoe makti foe falsi fasi foe anbegi. Baka dati, heri grontapoe, di Egipti ben agersi, moesoe dringi foe a beker foe a win foe Jehovah atibron! Ija, „ala den kownoe foe noordsei di de krosibei èn farawe, a wan baka a trawan, èn ala den tra kownoekondre foe grontapoe di de tapoe a gron”, moesoe dringi. Te foe kaba, „a kownoe foe Sesak srefi sa dringi baka den”. Èn soema na a „kownoe [disi] foe Sesak”? Sesak na wan agersi nen, wan raitori noso wan kibritori, gi Babilon. Neleki fa Satan ben de a kownoe foe Babilon, ala di sma ai no ben man si en, na so a de a „tiriman foe grontapoe” te na a dei foe tide, so leki fa Jesus ben taki (Johanes 14:30). So boen, Jeremia 25:17-26 e kroederi nanga Openbaring kapitel 18 te nanga 20 foe tjari kon na krin sortoe sani sa pasa a wan baka a trawan, te den sa meki a beker foe Jehovah atibron waka lontoe. Fosi, a grontapoe makti foe falsi fasi foe anbegi moesoe kisi pori, baka dati den politiek makti èn baka dati Satan srefi sa trowe go ini a dipi peti di no abi gron. — Openbaring 18:8; 19:19-21; 20:1-3.
15. San sa pasa te sma jere a babari foe „vrede nanga seikerfasi”?
15 Den ben taki foeroe foe vrede nanga seikerfasi sensi di a gersi leki a Kowroe Orlokoe ben kon na wan kaba, èn nanga soso wán bigi tirimakti di tan abra. So leki fa a skrifi ini Openbaring 17:10, dan a bigi tirimakti dati, a di foe seibi ede foe a werdri meti, moesoe „tan wan sjatoe pisi ten”. Ma a „sjatoe pisi ten” dati, e doro en kaba. Heri esi, ala a bari di den e bari foe politiek „vrede nanga seikerfasi”, sa meki presi „gi wan pori di e kon wantronso [di sa] kon wantewante na den tapoe”. Na so na apostel Paulus e taki. — 1 Tesalonikasma 5:2, 3.
16, 17. (a) San sa de a bakapisi efoe wan sma sa proeberi foe komoto na ondro a kroetoe foe Jehovah? (b) Na sortoe fasi di e pori sani, a wani foe Jehovah sa pasa heri esi na grontapoe?
16 Satan en heri grontapoe seti, foe bigin nanga krestenhèit, moesoe dringi foe Jehovah en beker foe refensi. En komando di a e gi Jeremia moro fara èn di skrifi ini kapitel 25, vers 27 te nanga 29, e taki foe disi toe: „Joe moesoe taigi den: ’Disi na san Jehovah foe den legre, a Gado foe Israèl, ben taki: „Dringi èn kon droengoe èn pio èn fadon, so taki oenoe no kan opo tanapoe foe a feti-owroe ede di mi e seni kon na oen mindri.”’ Èn a moesoe pasa taki, efoe den weigri foe teki a beker poeroe foe joe anoe foe dringi, dan joe moesoe taigi den toe: ’Disi na san Jehovah foe den legre ben taki: „Sondro mankeri joe sa dringi. Bika, loekoe! tapoe a foto di mi ben kari mi nen poti na tapoe, mi e bigin foe tjari rampoe kon, èn tokoe oenoe sa tan sondro foe kisi strafoe na wan noso tra fasi?”’ ’Oenoe no sa tan sondro foe kisi strafoe, bika wan feti-owroe mi e kari kon kontrari ala den sma di e libi na grontapoe’, na so Jehovah foe den legre e taki.”
17 Den wortoe dati na krakti wortoe — ija, wortoe di e gi foe frede, foe di na Jehovah Gado, a Soeverein Masra foe a heri universum, taki den. Ini ala den doesoendoesoen jari, nanga pasensi a ben froedrage a pori di sma pori en nen, a sjen di den ben gi en, èn a si di sma no ben wani si en santa nen na ai. Ma te foe kaba a ten doro gi en, foe gi wan piki tapoe a begi di en lobi Manpikin, Jesus Krestes, ben leri den disipel foe en, ala di a ben de dja na grontapoe: „Oenoe moesoe begi foe dati ede na a fasi disi: ’Wi Tata na hemel, joe nen moesoe de santa. Joe kownoekondre moesoe kon. Joe wani moesoe pasa, neleki na hemel, so toe na grontapoe’” (Mateus 6:9, 10). A de a wani foe Jehovah taki Jesus e handri leki En feti-owroe di sa tjari a strafoe foe en refensi kon.
18, 19. (a) Soema e rèi foe wini ini Jehovah nen, èn tapoe sortoe sani a e wakti, bifo a e klari a wini foe en? (b) Sortoe frede sani sa pasa na grontapoe te den engel sa loesoe a tranga winti foe Jehovah atibron?
18 Ini Openbaring kapitel 6, wi e leisi fosi fa Jesus e rèi tapoe wan weti asi ’foe wini èn foe klari a wini foe en’ (vers 2). Disi ben bigin di Gado ben poti en leki hemel Kownoe ini 1914. Tra asi nanga asi-rèiman e kon na en baka, èn den e prenki a heri situwâsi foe orlokoe, angriten nanga pestsiki di sensi a ten dati pina grontapoe. Ma oten ala a broeja disi sa kon na wan kaba? Openbaring kapitel 7 e froeteri wi, taki fo engel e hori „den fo winti foe grontapoe” steifi, te leki Israèl na jeje fasi nanga a bigi ipi di komoto na ala nâsi, tjari kon makandra foe kisi froeloesoe (vers 1). Èn san sa pasa baka dati?
19 Ini vers 30 nanga 31 foe Jeremia kapitel 25, a tori e go doro: „’Komoto na tapoesei Jehovah srefi sa bari èn komoto na en santa oso a sa meki sma jere en sten. Sondro mankeri a sa bari tranga tapoe en tanpresi. Wan babari leki di foe denwan di e masi a win-persbaki, a sa singi kontrari ala den sma di e libi na grontapoe. Foe troe, wan babari sa de krin foe jere srefi te na den moro farawe presi foe grontapoe, bika Jehovah abi wan trobi nanga den nâsi. Ensrefi moesoe go ini a kroetoe nanga ala skin. Foe taki foe den ogrisma, a moesoe gi den abra na a feti-owroe’, na so Jehovah e taki.” So boen, no wan nâsi sa de di no sa dringi a beker foe Jehovah atibron. Foe dati ede, a de tranga fanowdoe taki ala reti-ati sma e poti densrefi aparti foe na ogridoe foe den nâsi, bifo den fo engel e loesoe a toemoesi krasi tranga winti foe Jehovah atibron. Toemoesi krasi foe troe, bika a profeititori foe Jeremia e go doro ini vers 32 nanga 33:
20. Sortoe situwâsi e poti krakti na tapoe a hebi di a kroetoe foe Jehovah hebi, ma foe san ede a sani disi di Jehovah sa doe, de fanowdoe?
20 „Disi na san Jehovah foe den legre ben taki: ’Loekoe! Wan rampoe e go foe a wan nâsi go miti a tra nâsi, èn wan hebi bigi winti srefi sa opo kon foe den moro farawe presi foe grontapoe. Èn den di Jehovah naki kiri, na a dei dati seiker sa didon foe a wan oekoe foe grontapoe te na a tra oekoe foe grontapoe. Sma no sa krei gi den noso tjari den kon makandra noso beri den. Den sa tron leki mest na tapoe a gron.’” Foe troe a de wan toemoesi takroe situwâsi, ma a de fanowdoe foe doe a sani disi foe man krin grontapoe foe ala ogridoe, bifo den e tjari a Paradijs kon di Gado pramisi.
Herder foe bari krei èn bari tranga
21, 22. (a) Soema ben de den „herder” foe Israèl ini Jeremia 25:34-36, èn foe san ede den ben moesoe bari krei? (b) Sortoe disiten herder e fiti foe kisi Jehovah atibron, èn foe san ede na so wan fasi?
21 Vers 34 te nanga 36 e taki moro fara foe a kroetoe foe Jehovah: „Bari krei, oen herder, èn bari tranga! Èn drai lontoe, oen gloriwan foe na ipi, bika den dei foe srakti èn foe panja oenoe kon troe, èn oenoe moesoe fadon leki wan patoe di ala sma wani abi! Èn den herder lasi wan kibripresi èn den gloriwan foe na ipi wan fasi foe lon go kibri. Arki! A babari foe den herder, èn a bari krei foe den gloriwan foe na ipi, bika Jehovah e foefoeroe a wei foe den nanga tranga.”
22 Soema na den herder disi? Den a no den fesiman foe den difrenti fasi foe anbegi, di dringi kaba foe Jehovah atibron. Den na den herder foe den sroedati legre, di Jeremia 6:3 ben taki foe den toe, di e tjari den legre foe den kon makandra ini bigi groepoe foe opo go feti nanga Jehovah. Den na den politiek tiriman, di kon goedoe, ala di disi ben de wan lasi gi den sma di den ben tiri. Foeroe foe den tiriman disi na triki bisnisman, den na basi foe kroektoedoe. Den no ben handri esi foe tjari wan froelekti kon ini den angriten di kiri bigi ipi sma ini kondre di no goedoe so na ekonomia sei. Den e goedoe „den gloriwan foe na ipi”, so leki den bigi bisnisman di e doe bisnis na ini fetisani èn den sma di abi bigi-aifasi èn di e pori a milieu, ala di den e weigri foe gi datra-jepi èn gosontoe njanjan, di, nanga so pikinso moni, ben kan kibri a libi foe miljoenmiljoen pikin di e dede.
23. Taki foe a fasi fa a kontren foe Satan sa de baka te Jehovah pori sani.
23 A no de foe froewondroe, taki Jeremia kapitel 25, vers 37 nanga 38, e tapoe nanga den wortoe, foe di a e taki foe den sma disi di ben soekoe vrede gi densrefi wawan, ala di den e prakseri den eigi boen nomo: „Na ini den tanpresi foe vrede, libi no de moro foe a faja atibron ede foe Jehovah. Neleki wan jongoe lew nanga neki-wiwiri, a ben libi en presi di e gi en kibri, bika a kondre foe den tron wan sani foe skreki, foe a feti-owroe di e doe ogri ede èn foe en faja atibron ede.” Foe troe a de wan sani foe skreki! Ma tokoe a de seiker taki Jehovah sa sori en faja atibron nanga jepi foe a Sma di Openbaring 19:15, 16 e taki foe en leki a „Kownoe foe den kownoe èn Masra foe den masra”, di e tiri den nâsi nanga wan isri tiki. Èn san e kon baka dati?
24. Sortoe blesi a pori, di falsi fasi foe anbegi nanga a tra pisi foe Satan grontapoe sa kisi, sa tjari kon gi a regtfardiki libisma famiri?
24 Joe ondrofeni wan toemoesi krasi tranga winti kaba? A kan de wan ondrofeni di e skreki sma te foe dede. Ma a mamanten di e kon na baka, ala di na ala sei joe e si brokobroko sani kande, nofotron loktoe de so krin èn a tiri di sani tiri e gi so wan kowroe-ati, taki joe kan taki Jehovah tangi foe wan toemoesi aparti moi dei. Na a srefi fasi, te den tranga winti foe a bigi banawtoe sa saka, dan joe kan loekoe grontapoe nanga wan firi foe tangi, taki joe de na libi èn de klariklari foe abi wan prati na a wroko di Jehovah sa doe moro fara, foe meki wan grontapoe di krin, kon tron wan heri moi paradijs. A trobi di Jehovah abi nanga den nâsi, sa kon kisi en bigi kaba, èn a sa santa en nen èn krin a pasi foe meki a wani foe en pasa na grontapoe na ondro a Doesoen Jari Tiri foe a Kownoekondre foe a Mesias. Meki a Kownoekondre dati kon heri esi!
Wan sjatoe loekoe tapoe paragraaf 5-24 foe na artikel disi
◻ Sortoe hoigri fasi foe krestenhèit e kisi wan kroetoe now?
◻ Sortoe tra fasi foe si a kroetoe de foe feni ini Jeremia 25:12-38?
◻ Sortoe beker foe refensi den e tjari go na ala den nâsi?
◻ Soema na den herder di e bari krei èn bari tranga èn foe san ede den de ini broeja?
[Prenki na tapoe bladzijde 18]
Jehovah froekisi a wrokosani di sa pori krestenhèit
[Prenki na tapoe bladzijde 22]
Baka den tranga winti foe a bigi banawtoe, wan krin grontapoe sa kon foe si