Jehovah — A Gado di abi wan prakseri
„Foe troe, joisti so leki mi prakseri, na so a sa pasa; èn joisti so leki mi denki, dati na san sa kon troe.” — JESAJA 14:24.
1, 2. San foeroe sma e taki foe a prakseri foe a libi?
NA ALA sei sma e aksi: „San na a prakseri foe a libi?” Wan politiek tiriman foe Westsei kondre ben taki: „Moro sma leki wan ten na fesi e aksi: ’Soema na wi? San na a prakseri di wi abi?’” Di wan njoensoe koranti ben ondrosoekoe sani na jongoe sma nanga na aksi san na a prakseri foe a libi, den aparti sortoe piki ben de: „Foe doe ala san wi e firi foe doe.” „Foe njanboen dorodoro foe ibri momenti foe a libi.” „Libi foe abi prisiri èn froemorsoe nomo.” „Foe kisi pikin, de kolokoe èn dede baka dati.” Moro foeroe foe den ben abi a firi taki a libi disi na ala san de. No wan foe den ben taki foe wan prakseri foe libi wan langa pisi ten na grontapoe.
2 Wan sabiman ini a leri foe Confusius ben taki: „A wan-enkri prakseri di libi abi te foe kaba, de foe feni ini a gewoon libi foe wi leki libisma.” Leki fa skrifi dja, dan sma ben sa tan kon gebore, doe moeiti 70 noso 80 jari, dede baka dati èn foe têgo no ben sa de moro. Wan sabiman ini na evolutie leri ben taki: „Wi e angri kande foe kisi wan ’moro hei’ piki — ma no wan no de.” Gi den evolutionistman disi, a libi na wan moeiti di sma e doe foe tan na libi, èn dede de na a kaba foe ala disi. Den sortoe filosofie disi e meki sma denki foe wan fasi foe si libi sondro foe abi howpoe.
3, 4. Fa situwâsi na grontapoe abi krakti na tapoe a fasi fa foeroe sma e si libi?
3 Foeroe sma e tweifri taki libi abi wan prakseri, te den e si taki a libi foe libisma, ben foeroe nanga someni sari. Ini a ten foe wi, pe a froewakti de taki libisma doro wan heimarki foe industrieel nanga sabidensi koni, so wan 1 miljard sma na heri grontapoe siki serjoesoe noso no abi nofo foe njan. Miljoenmiljoen pikin e dede ibri jari foe den sortoe sani disi. Na tapoe foe dati, dan ini a di foe 20 jarihondro disi, fo tron moro sma dede foe orlokoe ede leki ini den fo hondro jari makandra na fesi. Ogridoe, na ogri di doe na trawan nanga tranga, fowtoe gebroiki foe drug, osofamiri di e broko, AIDS nanga tra siki di sma e kisi nanga jepi foe seks — a lijst foe negatief sani e langa moro nanga moro. Grontapoe tiriman no abi loesoe gi den problema disi.
4 Nanga den sortoe situwâsi disi na prakseri, wan sma ben taki san foeroe sma e bribi: „A libi no abi wan prakseri. Efoe ala den takroe sani disi e pasa, dan libi no wani taki foeroe.” Èn wan man di owroe ben taki: „Mi ben aksi misrefi foe san ede mi dja a moro bigi pisi foe mi libi. Efoe wan prakseri de, dan mi no e ke moro.” Foe dati ede, foe di someni sma no sabi foe san ede Gado e gi pasi taki sma e pina, dan situwâsi na grontapoe, di e tjari sari kon, e meki taki den no abi wan troetroe howpoe gi a ten di e kon.
5. Foe san ede den difrenti fasi foe anbegi foe a grontapoe disi e tjari moro broeja kon ini a tori foe a prakseri foe a libi?
5 Srefi fesiman foe den difrenti fasi foe anbegi prati na ini disi, èn den no de seiker foe a prakseri foe a libi. Wan man di fosi ben de wan edeman foe St. Paul Kathedraal na Londen ben taki: „Mi heri libi mi doe moeiti foe feni a prakseri foe libi. . . . Mi no feni en.” A troe, taki foeroe tiriman foe krestenhèit e leri sma taki te sma dede, dan den boenwan e go na hemel èn den takroewan e go na wan faja hèl foe têgo. Ma a fasi disi foe si sani, tokoe e meki a libisma famiri na grontapoe e tan na ini wan pina waka nanga libi. Èn efoe a ben de a prakseri foe Gado foe meki sma libi na ini hemel, dan foe san ede a no ben meki den nomo leki hemel mekisani ini a bigin, so leki a ben doe nanga den engel, èn ben sorgoe na so fasi taki libisma no abi someni pina? So boen, na ala sei broeja de ini a tori foe a prakseri foe a libi na grontapoe, noso sma e weigri foe bribi taki wan prakseri de ini a libi.
A Gado di abi wan prakseri
6, 7. San bijbel e froeteri wi foe na Universeel Soeverein?
6 Ma tokoe a Santa Boekoe foe bijbel, di panja na ala sei moro leki ala tra boekoe na ini historia, e froeteri wi taki Jehovah, a Soeverein foe na universum, na a Gado di abi wan prakseri. A e sori wi taki a abi wan prakseri gi a libisma famiri na grontapoe, di sa teki wan langa pisi ten, èn foe taki en leti, di sa de foe têgo. Èn te Jehovah abi wan sani na prakseri, dan a sa pasa sondro misi. Neleki fa alen e meki siri sproiti kon, Gado e taki, „na so a wortoe di komoto na mi mofo, sa sori foe de. A no sa drai kon baka na mi sondro bakapisi, ma seiker a sa doe a sani di mi abi prisiri na ini, èn seiker a sa waka boen ini san mi seni en go” (Jesaja 55:10, 11). Awansi san Jehovah e taki toe a sa doe, „na san sa kon troe”. — Jesaja 14:24.
7 Wi libisma kan abi ala froetrow taki na Almaktiwan sa doe san a pramisi, bika Gado „no kan lei” (Titus 1:2; Hebrewsma 6:18). Te a e froeteri wi taki a sa doe wan sani, dan a wortoe foe en na wan djaranti taki a sa pasa. A de neleki a doe en kaba. A e froeklari: „Mi na a Sma di de Gado, èn no wan tra Gado de, no wan sma toe di de leki mi; a Sma di foe a bigin kaba e froeteri a kaba, èn foe owroeten den sani di no ben doe; a Sma di e taki: ’Mi eigi rai sa kon de èn ala sani di mi abi prisiri na ini, mi sa doe’ . . . Na mi taki en srefi; mi sa meki a doe kon toe. Mi seti en, mi sa doe en toe.” — Jesaja 46:9-11.
8. Sma di troetroe wani sabi Gado, kan feni en?
8 Moro fara, Jehovah „no wani taki wan sma kisi pori, ma a wani taki ala sma kon kisi berow” (2 Petrus 3:9). Dati meki a no wani taki wan sma de di no sabi en. Wan profeiti di ben nen Asarja, ben taki: „Efoe joe e soekoe [Gado], dan ensrefi sa sorgoe taki joe e feni en, ma efoe joe e gowe libi en, dan a sa gowe libi joe” (2 Kroniki 15:1, 2). Foe dati ede den sma di troetroe wani sabi Gado nanga den prakseri foe en, troetroe kan doe disi efoe den e doe a moeiti foe soekoe en.
9, 10. (a) San den sma, di wani sabi Gado, ben kisi? (b) San wan ondrosoekoe foe Gado Wortoe kan meki wi doe?
9 Pe sma moesoe soekoe? Gi den sma di e soekoe Gado troetroe, a gi en Wortoe, bijbel. Nanga jepi foe en santa jeje, a srefi wroko krakti di a ben gebroiki foe meki na universum, Gado ben tiri getrow man foe skrifi san wi abi fanowdoe foe sabi den prakseri foe en. Foe eksempre, na apostel Petrus ben taki foe bijbel profeititori: „Noiti den ben taki profeititori nanga libisma wani, ma sma ben taki, foe di Gado wani, so leki fa santa jeje ben gi den foe taki” (2 Petrus 1:21). Na a srefi fasi na apostel Paulus ben froeklari: „Ala den Boekoe foe bijbel Gado ben meki den skrifi den nanga jepi foe santa jeje èn den de boen foe leri sma, piri-ai gi sma, foe poti sani leti, foe gi tranga leri na ini regtfardiki fasi, so taki a sma foe Gado kon koni dorodoro, de srekasreka dorodoro gi ibri boen wroko.” — 2 Timoteus 3:16, 17; 1 Tesalonikasma 2:13.
10 Loekoe taki a Wortoe foe Gado e meki taki wi kon „koni dorodoro, de srekasreka dorodoro”, èn no foe wan pisi nomo noso taki a no de dorodoro. A e meki taki wan sma kan de seiker soema Gado de, san na den prakseri foe en, èn san a wani foe den foetoeboi foe en. Sma kan froewakti disi foe wan boekoe di Gado skrifi. Èn a de a wan-enkri fonten di wi kan ondrosoekoe foe kisi soifri sabi foe Gado (Odo 2:1-5; Johanes 17:3). Te wi e doe disi, dan wi „no [sa] de pikin-nengre moro, di den e slenger den go-kon leki nanga jepi foe skwala, èn ben sa tjari go-kon nanga ibri winti foe leri nanga jepi foe a bidrigifasi foe libisma, nanga jepi foe triki ini a doe foe sondoe” (Efeisesma 4:13, 14). A psalm singiman ben taki foe a joisti fasi foe si sani: „Joe wortoe de wan lampoe gi mi foetoe, èn wan leti tapoe mi pasi.” — Psalm 119:105.
Safrisafri den e tjari prakseri foe Gado kon na krin
11. Fa Jehovah tjari kon na krin gi libisma san na den prakseri foe en?
11 Na a fosi bigin foe a libisma famiri, Jehovah ben tjari kon na krin san ben de den prakseri di a ben abi nanga a grontapoe disi èn nanga den libisma di ben de na en tapoe (Genesis 1:26-30). Ma di a fosi papa nanga mama foe wi ben trowe a soevereinfasi foe Gado, dan a libisma famiri ben fadon go na ini doengroe na jeje fasi èn na ini dede (Romesma 5:12). Tokoe Jehovah ben sabi taki sma ben sa de di ben sa wani dini en. Dati meki, ini ala den jarihondro, a tjari den prakseri foe en safrisafri kon na krin gi den getrow foetoeboi foe en. Wan toe foe den di a ben taki nanga den, ben de Heinòk (Genesis 5:24; Judas 14, 15), Noa (Genesis 6:9, 13), Abraham (Genesis 12:1-3), nanga Moses (Exodus 31:18; 34:27, 28). Gado profeiti Amos ben skrifi: „A Soeverein Masra Jehovah no sa doe noti efoe a no tjari en froetrow afersi kon na krin gi den foetoeboi foe en, den profeiti.” — Amos 3:7; Danièl 2:27, 28.
12. Fa Jesus ben trowe moro leti na tapoe den prakseri foe Gado?
12 Di Jesus Krestes, a Manpikin foe Gado, ben de na grontapoe so wan 4000 jari baka di sma ben opo densrefi kontrari Gado ini Eden, dan moro finifini tori foe den prakseri foe Gado, ben tjari kon na krin. Disi ben de spesroetoe so ini a tori foe a prakseri di Gado ben abi foe poti wan hemel Kownoekondre foe tiri grontapoe (Danièl 2:44). Jesus ben meki a Kownoekondre dati kon tron a moro prenspari tori di a ben leri sma (Mateus 4:17; 6:10). En nanga den disipel foe en ben leri sma taki na ondro a Kownoekondre, a prakseri di Gado ben abi ini a bigin nanga grontapoe èn nanga a libisma famiri, ben sa kon troe. Grontapoe ben sa tron wan paradijs pe volmaakti libisma ben sa libi na ini, èn di ben sa libi foe têgo (Psalm 37:29; Mateus 5:5; Lukas 23:43; 2 Petrus 3:13; Openbaring 21:4). Boiti dati, Jesus nanga den disipel foe en ben sori nanga jepi foe den wondroe di Gado ben meki den doe, san ben sa pasa ini a njoen grontapoe dati. — Mateus 10:1, 8; 15:30, 31; Johanes 11:25-44.
13. Sortoe kenki ben feni presi na a Pinksterfesa foe 33 Gewoon Teri ini a tori foe a fasi fa Gado e handri nanga a libisma famiri?
13 Tapoe a Pinksterfesa foe 33 Gewoon Teri, 50 dei baka na opobaka foe Jesus, a jeje foe Gado ben kanti kon, tapoe a gemeente foe Krestes bakaman. A kresten gemeente ben kon ini a presi foe Israèl di no ben de getrow, a pipel di Gado ben sroto wan froebontoe nanga den (Mateus 21:43; 27:51; Tori foe den Apostel 2:1-4). A kanti di a santa jeje ben kanti kon na a okasi dati, ben de wan boeweisi taki foe sensi a ten dati, Gado ben sa tjari den waarheid ini a tori foe den prakseri foe en kon na krin nanga jepi foe a njoen groepoe disi di ben teki presi gi en (Efeisesma 3:10). Ini a fosi jarihondro Gewoon Teri a fondamenti foe orga sani foe a kresten gemeente ben poti. — 1 Korentesma 12:27-31; Efeisesma 4:11, 12.
14. Fa sma di e soekoe waarheid kan kon sabi a troe kresten gemeente?
14 Ini a ten disi sma, di e soekoe waarheid, kan kon sabi a troe kresten gemeente na a sori di a gemeente e tan sori lobi, a moro prenspari eigifasi foe Gado (1 Johanes 4:8, 16). Ija, brada lobi na wan marki di e meki sma kan kon sabi troe krestendom. Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi gi makandra.” „Disi na mi gebod, taki oenoe lobi makandra, so leki mi lobi oenoe” (Johanes 13:35; 15:12). Èn Jesus ben memre den arkiman foe en: „Oenoe na mi mati, efoe oenoe e doe san mi e komanderi oenoe” (Johanes 15:14). Foe dati ede, Gado en troe foetoeboi na den sma di e libi ini akroederi nanga a wet foe lobi. Den no e taki nomo foe en, bika „bribi sondro wroko dede”. — Jakobus 2:26.
Kisi a joisti sabi
15. Foe sortoe sani den foetoeboi foe Gado kan de seiker?
15 Jesus ben froeteri na fesi, taki baka wan pisi ten, a troe kresten gemeente ben sa kisi moro nanga moro joisti sabi foe prakseri foe Gado. A ben pramisi den bakaman foe en: „A jepiman, a santa jeje, di a Tata sa seni kon na ini mi nen, na en sa leri oenoe ala sani” (Johanes 14:26). Jesus ben taki toe: „Loekoe! Mi de nanga oenoe ala dei te a bosroiti foe a seti foe sani” (Mateus 28:20). So boen, den foetoeboi foe Gado e kisi moro nanga moro joisti sabi foe a waarheid di abi foe doe nanga Gado nanga den prakseri foe en. Ija, „a pasi foe den regtfardikiwan de leki a brenki leti, di e kon krin moro nanga moro, te leki a dei kon opo krinkrin”. — Odo 4:18.
16. San a joisti sabi di wi e kisi na jeje fasi, e froeteri wi foe pe wi de ini a tori foe den prakseri foe Gado?
16 Ini a ten disi, a leti dati na jeje fasi brenki moro leki oiti, bika wi de ini a ten pe foeroe bijbel profeititori e kon troe noso de foe kon troe. Den disi e sori wi taki wi e libi ini „den lasti dei” foe na ogri seti foe sani disi. Disi na a pisi ten di den ben kari „a bosroiti foe a seti foe sani”; baka dati Gado en njoen grontapoe sa kon (2 Timoteus 3:1-5, 13; Mateus 24:3-13). So leki fa Danièl ben froeteri na fesi, dan heri esi Gado en hemel Kownoekondre sa „masi ala den kownoekondre disi [di de now] èn tjari den kon na wan kaba, èn ensrefi sa tan te ten di no abi marki”. — Danièl 2:44.
17, 18. Sortoe moi profeititori e kon troe now?
17 Na mindri den profeititori di e kon troe now, de a wan di skrifi ini vers 14 foe Mateus kapitel 24. Drape Jesus ben taki: „A boen njoensoe disi foe a kownoekondre sa preiki na a heri grontapoe pe sma e libi, leki wan kotoigi gi ala nâsi, èn dan a kaba sa kon.” Na heri grontapoe, miljoenmiljoen Kotoigi foe Jehovah e doe a Kownoekondre-preikiwroko dati. Èn ibri jari hondro doesoen tron hondro doesoen sma e moksi densrefi nanga den. Disi de ini akroederi nanga a profeititori ini Jesaja 2:2, 3, di e taki dati „ini a lasti pisi foe den dei” foe na ogri grontapoe disi, sma foe foeroe nâsi ben sa kon na Jehovah en troe anbegi, èn ’a ben sa leri den foe en pasi, èn den ben sa waka tapoe den pasi foe en’.
18 Den njoenwan disi e kon ipi-ipi na a anbegi foe Jehovah „neleki wan wolkoe”, so leki fa a ben froeteri na fesi ini Jesaja kapitel 60, vers 8. Vers 22 e taki moro fara: „A pikinwan srefi sa tron doesoen èn a mendriwan wan makti nâsi. Misrefi, Jehovah, sa meki a pasa moro esi ini en reti ten.” Boeweisi e sori taki a ten dati de nownow de. Èn den njoenwan kan abi a froetrow taki te den abi demakandra nanga Jehovah Kotoigi, taki den kisi foe doe nanga a troe kresten gemeente.
19. Foe san ede wi e taki dati den njoenwan di abi demakandra nanga Jehovah Kotoigi, e kon na a troe kresten gemeente?
19 Foe san ede wi kan taki disi nanga seikerfasi? Bika den njoenwan disi, makandra nanga den miljoenmiljoen sma di de ini Jehovah en organisâsi kaba, gi den libi abra na Gado èn den e doe en wani. Disi abi na ini toe foe libi ini akroederi nanga a wet foe Gado lobi. Wán foe den boeweisi foe disi de, taki den kresten disi ’naki den feti-owroe foe den tron ploegoe èn den lansri foe den tron kron-nefi èn den no e leri orlokoe moro’ (Jesaja 2:4). Ala Kotoigi foe Jehovah na heri grontapoe doe disi, bika den e sori lobi ini den libi. Disi wani taki dati noiti den kan teki orlokoe fetisani foe go feti nanga makandra noso nanga wan tra sma. Ini a tori disi den wawan de so — tra fasi leki den fasi foe anbegi foe grontapoe (Johanes 13:34, 35; 1 Johanes 3:10-12, 15). Den no e kisi foe doe nanga a tranga lobi di sma abi gi a kondre foe den, di e tjari pratifasi kon, bika den de wan bradafasi na heri grontapoe di lobi na a sani di e hori den steifi kon na wán, „wan volmaakti banti foe wánfasi”. — Kolosesma 3:14; Mateus 23:8; 1 Johanes 4:20, 21.
Foeroe sma e froekisi foe no sabi
20, 21. Foe san ede a moro bigi pisi foe den libisma de ini doengroe na jeje fasi? (2 Korentesma 4:4; 1 Johanes 5:19)
20 Ala di a leti na jeje fasi na mindri den foetoeboi foe Gado e kon moro krin, a tra pisi foe den sma na grontapoe e saka go ini wan moro bigi doengroe na jeje fasi. Den no sabi Jehovah noso den prakseri foe en. A profeiti foe Gado ben taki foe a ten disi di a ben taki: „Loekoe! doengroe srefi sa tapoe grontapoe, èn deki doengroe den nationaal groepoe” (Jesaja 60:2). Disi de so, bika sma no e sori wan opregti belangstelling foe leri sani foe Gado, noso den no e sori wan angri foe proeberi foe plisi en. Jesus ben taki: „Now disi na a fondamenti foe a kroetoe, taki a leti kon na ini grontapoe, ma libisma lobi a doengroe moro leki a leti, bika den wroko foe den ben takroe. Bika a sma di e doe tegoe sani no wani si a leti na ai èn a no e kon na a leti, so taki sma no kan kroetoe den wroko foe en.” — Johanes 3:19, 20.
21 Den sortoe sma disi no abi belangstelling troetroe foe kon sabi san na a wani foe Gado. Na presi foe dati, a moro prenspari sani ini a libi foe den na foe doe den eigi wani. Foe di den no e doe a wani foe Gado, meki den e poti densrefi ini wan kefarlek posisi, bika a Wortoe foe Gado e froeklari: „A sma di e drai en jesi poeroe foe jere a wet — srefi en begi de wan tegoe sani” (Odo 28:9). Den sa tjari den takroe bakapisi foe a waka nanga libi di den froekisi. Na apostel Paulus ben skrifi: „No kori oensrefi: Gado no e meki sma spotoe nanga en. Bika san wan sma e sai, na dati a sa koti toe.” — Galasiasma 6:7.
22. San heri ipi sma, di wani sabi Gado, e doe now?
22 Ma heri ipi sma de, di wani sabi Gado en wani, di troetroe e soekoe en, èn di e kon krosibei na en. „Kon krosibei na Gado èn en sa kon krosibei na joe”, Jakobus 4:8 e taki. Foe den sortoe sma disi Jesus ben taki: „A sma di e doe san troe, e kon na a leti, so taki den wroko foe en kan kon na doro leki wroko di ben doe ini akroederi nanga Gado” (Johanes 3:21). Èn fa Gado abi wan kefarlek moi tamara na prakseri gi den sma di e kon na a leti! A tra artikel foe wi sa taki foe den span froewakti.
Fa joe ben sa piki?
◻ San foeroe sma e taki ini a tori foe a prakseri foe a libi?
◻ Fa Jehovah e tjari ensrefi kon na krin leki wan Gado di abi wan prakseri?
◻ Na sortoe gran fasi sma ben kisi joisti sabi ini a fosi jarihondro Gewoon Teri?
◻ Fa sma kan kon sabi a troe kresten gemeente ini a ten disi?