Ala di na foe doti wi meki, tokoe wi moesoe go na fesi nanga wan fasti bosroiti!

„Ensrefi sabi heri boen fa wi meki, foe di a e hori na prakseri taki wi meki foe doti.” — PSALM 103:14.

1. A de so taki bijbel abi leti na tapoe a kontren foe sabidensi te a e taki dati libisma meki foe doti? Tjari disi kon na krin.

TE WI loekoe wi skin, dan wi meki foe doti. „Jehovah Gado ben go abra foe meki libisma foe a doti foe a gron èn foe blo a libibro na ini en noso-olo, èn libisma ben tron wan libi sili” (Genesis 2:7). A fasi disi fa a skrifi so makriki dja fa Gado ben meki libisma, de akroederi san sabidensi e froeteri wi. Ala den moro leki 90 pisi foe san a libisma skin meki, de foe feni ini a „doti foe a gron”. Wan koniman tapoe a kontren foe scheikunde ben taki wan leisi taki a skin foe wan bigisma abi 65 procent zuurstof, 18 procent koolstof, 10 procent waterstof, 3 procent stikstof, 1,5 procent calcium nanga 1 procent fosfor, èn san tan abra meki foe tra pisi foe a gron. A no de prenspari efoe den berekening disi boen dorodoro efoe no. Wan sani troe: „Wi meki foe doti!”

2. San joe e doe na tapoe a fasi fa Gado meki libisma èn foe san ede?

² Soema, boiti Jehovah, ben kan meki den sortoe moeilek mekisani disi foe noti moro leki doti? Den sani di Gado meki, volmaakti èn den de sondro fowtoe, so boen, troetroe no wan reide no de foe kragi, taki a ben froekisi foe meki libisma na a fasi disi. Ija, taki a Gran Mekiman ben man foe meki libisma foe a doti foe grontapoe na wan fasi di e gi sma foe frede èn di moi srefisrefi, e meki a warderi di wi abi gi En makti di no abi skotoe, a bekwaamfasi foe en, èn a praktis koni foe en, kon moro bigi. — Deuteronomium 32:4, foetoewortoe; Psalm 139:14.

Omstandigheid e kenki

3, 4. (a) San Gado no ben abi na prakseri di a ben meki libisma foe doti? (b) Na sortoe sani David ben sori ini Psalm 103:14, èn fa a kontekst e jepi wi foe kon na a bosroiti disi?

³ Den mekisani di meki foe doti no man doe ala sani. Ma noiti Gado ben abi na prakseri taki den sani disi ben sa de wan hebi gi den, noso wan sani di ben sa skotoe den toemoesi. Den skotoe disi no ben de foe meki den mekisani lasi-ati noso foe abi leki bakapisi taki den mekisani no ben sa de kolokoe. Tokoe, so leki fa a kontekst foe David wortoe ini Psalm 103:14 e sori, dan den skotoe di libisma moesoe saka densrefi na ondro, kan meki lasi-ati kon èn abi leki bakapisi taki libisma no de kolokoe. Foe san ede? Di Adam nanga Eva no ben arki Gado, dan den ben tjari wan tra omstandigheid kon gi a famiri foe den di ben moesoe kon ete. A meki di wi meki foe doti, ben wani taki wan tra sani now.a

⁴ David no ben taki foe den sani di srefi volmaakti libisma di meki foe doti no ben sa man doe, ma a ben taki foe den fowtoe foe libisma di ben kon foe na onvolmaaktifasi di den gebore nanga en. Noso a no ben sa taki foe Jehovah: „En di e gi joe pardon foe ala joe sondoe, di e dresi ala joe siki, di e froeloesoe joe libi foe na olo srefi, [di] srefi no ben handri nanga wi akroederi den sondoe foe wi; èn a no ben gi wi san wi moesoe kisi akroederi den sondoe foe wi” (Psalm 103:2-4, 10). Efoe volmaakti libisma ben tan getrow, ala di na foe doti den meki, dan noiti den ben sa doe fowtoe noso sondoe, so taki den ben sa abi pardon fanowdoe; èn den no ben sa abi siki toe di sma ben sa moesoe dresi. Boiti dati, noiti den no ben sa abi foe saka go na ini a dede-olo, pe den ben kan kisi froeloesoe nanga jepi foe wan opobaka wawan.

5. Foe san ede a no moeilek gi wi foe froestan den wortoe foe David?

⁵ Foe di wi alamala onvolmaakti, meki wi ondrofeni den sani di David ben taki foe den. Doronomo wi sabi den sani di wi no man doe, foe di wi onvolmaakti. Wi e sari son leisi te a gersi leki dati e pori a matifasi di wi abi nanga Jehovah noso nanga wi kresten brada. Wi e sari taki den onvolmaaktifasi foe wi nanga a druk foe a grontapoe foe Satan, wanwan leisi e poesoe wi go na ini wan krinkrin lasi-ati. Foe di a tiri foe Satan esi-esi e kon na wan kaba, meki moro leki oiti a grontapoe foe en e poti hebi druk na tapoe sma ini algemeen èn spesroetoe na tapoe kresten. — Openbaring 12:12.

6. Foe san ede son kresten lasi-ati, èn fa Satan kan meki gebroiki foe a sortoe firi disi?

⁶ Joe e feni taki a e kon moeilek moro nanga moro foe libi leki wan kresten? Sma ben jere son kresten e taki dati omoro langa den de ini waarheid, omoro a e gersi leki den kon tron moro onvolmaakti. Ma moro foeroe a de so nomo, taki moro nanga moro den kon sabi den eigi onvolmaaktifasi foe den èn a man di den no man foe libi akroederi den volmaakti gronprakseri foe Jehovah na a fasi fa den ben sa wani foe doe dati. Ma te joe e loekoe en fini, dan kande disi na wan bakapisi di e kon te wan sma e tan gro ini a sabi di den abi foe Jehovah nanga a warderi di den e warderi en regtfardiki markitiki. A de prenspari taki noiti wi no e gi wisrefi pasi foe meki so wan sabi meki wi lasi-ati na so wan fasi taki wi e doe san Didibri wani wi foe doe. Ini ala den jarihondro a ben proeberi ibritron baka, foe gebroiki a lasi di sma e lasi-ati, leki wan sani foe kisi wini gi ensrefi, so taki a ben kan meki den foetoeboi foe Jehovah gowe libi a troe anbegi. Ma tokoe, a troetroe lobi foe Gado nanga „a si di den kwetikweti no wani si [Didibri] na ai”, sorgoe taki moro foeroe foe den no ben gowe libi a troe anbegi. — Psalm 139:21, 22; Odo 27:11.

7. Na tapoe sortoe kontren wi kan de neleki Job sontron?

⁷ Tokoe a kan taki den foetoeboi foe Jehovah sontron e lasi-ati. A de di wi no de tevrede nanga den sani di wi doe, ben kan de wan reide toe. Sani di abi foe doe nanga a skin noso hebi druk di wi e ondrofeni foe di osofamiri memre, mati noso wroko-kompe no e libi boen nanga wi, kan de ini a tori toe. Job di ben de getrow, ben lasi-ati na so wan fasi taki a ben begi Gado: „O efoe joe ben sa kibri mi na ini Sjeool, taki joe ben sa kibri mi te leki joe atibron no de moro, taki joe ben sa poti wan pisi ten gi mi èn dan ben sa memre mi!” Now, efoe moeilek omstandigheid ben kan poesoe Job, „wan man sondro fowtoe èn opregti, di frede Gado èn di ben tan fara foe san ogri”, taki a ben abi momenti pe a ben lasi-ati, dan a no de foe froewondroe taki a srefi sani kan pasa nanga wi. — Job 1:8, 13-19; 2:7-9, 11-13; 14:13.

8. Foe san ede a kan de wan boen sani taki wanwan leisi wi e lasi-ati?

⁸ Fa a de wan trowstoe foe sabi taki Jehovah e loekoe na ini den ati èn taki a no e frigiti den boen boeweigi foe ati! Noiti a no sa trowe den sma di e doe opregti moeiti foe plisi en. Foe taki en leti, dan foe lasi-ati wanwan leisi, kan de wan boen sani, di e sori taki wi no e teki wi diniwroko gi Jehovah leki wan soso sani. Te joe e loekoe en na a fasi disi, dan a sma di noiti no e feti nanga lasi-ati, kande na jeje fasi a no sabi den swakifasi foe en so leki fa a de nanga tra sma. Memre taki: „A sma di denki taki a e tanapoe, moesoe loekoe boen taki a no fadon.” — 1 Korentesma 10:12; 1 Samuèl 16:7; 1 Kownoe 8:39; 1 Kroniki 28:9.

So srefi den ben meki foe doti

9, 10. (a) Na a bribi foe soema kresten moesoe waka na baka? (b) Fa Moses ben doe di a ben kisi en wroko?

⁹ Hebrewsma kapitel 11 e kari wan toe kotoigi foe Jehovah di ben libi bifo a ten foe den kresten, èn di ben abi wan tranga bribi. Kresten foe a fosi jarihondro nanga denwan foe a ten disi, doe a srefi sani. Den sani di wi kan leri foe den, warti srefisrefi. (Teki gersi Hebrewsma 13:7.) Foe eksempre, na baka a bribi foe soema, kresten kan waka moro boen leki a bribi di Moses ben abi? Gado ben kari en foe meki kroetoe boskopoe bekènti na Farao foe Egipti, a moro tranga tiriman foe grontapoe ini a ten foe en. Ini a ten disi, Jehovah Kotoigi moesoe meki den srefi sortoe boskopoe bekènti teige falsi relisi nanga tra organisâsi di opo densrefi kontrari Krestes en Kownoekondre di seti. — Openbaring 16:1-15.

¹⁰ A no de wan koemakriki wroko foe doe a komando disi, so leki fa Moses ben sori. „Soema na mi taki mi ben sa go na Farao èn taki mi moesoe tjari den manpikin foe Israèl komoto kon foe Egipti?”, a ben aksi. Wi kan froestan den firi di a ben abi taki a no ben boen nofo. A ben broko en ede toe nanga san den kompe-Israèlsma ben sa taki: „Kon wi taki, dati den no e bribi mi èn taki den no e arki mi sten?” Baka dati Jehovah ben tjari kon na krin gi en fa a ben sa man boeweisi soema ben seni en kon, ma Moses ben abi wan tra problema. A ben taki: „Gi mi pardon, Jehovah, ma mi no man taki boen, a no ben de so toe esrede èn na fesi èn a no de so toe foe sensi joe ben taki nanga joe foetoeboi, bika mi no man taki esi.” — Exodus 3:11; 4:1, 10.

11. Fa wi, neleki Moses, ben kan doe wan sani na tapoe theokrasia froeplekti, ma foe sortoe sani wi kan de seiker efoe wi e sori bribi?

¹¹ Wanwan leisi wi e firi kande, so leki fa Moses ben firi. Ala di wi e erken den froeplekti di wi abi na theokrasia sei, tokoe wi e aksi wisrefi kande fa oiti wi ben sa kan doe den. ’Soema na mi taki mi ben sa go na sma, di sonwan foe den moro hei leki mi na sociaal sei, na ekonomia sei noso na skoro sei, èn taki mi sa prefoeroe foe leri den den pasi foe Gado? San mi brada na jeje fasi sa taki, te mi e gi komentaar na den kresten konmakandra noso e doe pristeri na tapoe a podium tapoe a Theokrasia Diniwroko-skoro? Den no sa si taki mi no man taki so boen?’ Ma memre taki Jehovah ben de nanga Moses èn a ben meki en bekwaam gi a wroko foe en bika Moses ben abi bribi (Exodus 3:12; 4:2-5, 11, 12). Efoe wi e waka baka a bribi foe Moses, dan Jehovah sa de nanga wi èn a sa meki wi bekwaam toe gi a wroko foe wi.

12. Fa a bribi foe David kan gi wi deki-ati te wi e kisi foe doe nanga lasi-ati foe sondoe noso fowtoe ede?

¹² Iniwan sma di e firi taki a no man doe san a wani doe, noso di lasi-ati foe sondoe noso foe fowtoe ede, troetroe kan froestan san David ben firi di a ben taki: „Misrefi sabi den ogri di mi ben doe èn a sondoe foe mi de na mi fesi doronomo.” Di David ben begi Jehovah tranga, a ben taki toe: „Kibri joe fesi foe den sondoe foe mi èn figi poeroe srefi ala den fowtoe foe mi.” Ma noiti a no ben gi ensrefi pasi foe meki lasi-ati poeroe na angri foe en foe dini Jehovah. „No trowe mi komoto na joe fesi; èn joe santa jeje, o no poeroe dati foe mi.” A ben de krin, taki David ben meki foe „doti”, ma Jehovah no ben drai ensrefi poeroe foe David bika a ben sori bribi ini a pramisi foe Jehovah taki a no sa wisiwasi „wan ati di broko èn masi”. — Psalm 38:1-9; 51:3, 9, 11, 17.

13, 14. (a) Foe san ede wi no moesoe tron bakaman foe libisma? (b) Fa den eksempre foe Paulus nanga Petrus e sori taki srefi den ben meki foe doti?

¹³ Ma loekoe, taki ala di wi moesoe si „so wan bigi wolkoe foe kotoigi” leki wan deki-ati foe „lon nanga horidoro a streilon di de na wi fesi”, tokoe den no e taigi wi foe tron bakaman foe a wolkoe foe kotoigi. Den e taigi wi foe waka ini den foetoemarki foe „Jesus, a Moro Prenspari Fesiman nanga a Sma di e meki a bribi foe wi kon boen dorodoro”, èn no na baka onvolmaakti libisma — srefi no na baka den getrow apostel foe a fosi jarihondro. — Hebrewsma 12:1, 2; 1 Petrus 2:21.

¹⁴ Den apostel Paulus nanga Petrus, stonfoetoe ini a kresten gemeente, ben naki foetoe fadon sontron. „A boen di mi wani, mi no e doe, ma na ogri di mi no wani, na dati mi e doe”, Paulus ben skrifi. „Ke, mi mofinawan, di mi de!” (Romesma 7:19, 24) Di wan leisi Petrus ben froetrow toemoesi foeroe na tapoe ensrefi, dan a ben taigi Jesus: „Awinsi ala den trawan naki foetoe fadon ini a tori foe joe, noiti mi no sa naki foetoe fadon!” Di Jesus ben warskow Petrus taki a ben sa drai en baka gi En dri tron, dan Petrus ben teki a fri foe taki sondro foe prakseri fosi, taki dati no ben o pasa. A ben skepi: „Srefi efoe mi ben sa moesoe dede nanga joe, mi kwetikweti no sa drai mi baka gi joe.” Tokoe a ben drai en baka gi Jesus troetroe, wan fowtoe di ben meki en krei tranga. Ija, Paulus nanga Petrus ben meki foe doti. — Mateus 26:33-35.

15. Sortoe sani e poesoe wi foe go na fesi nanga wan fasti bosroiti, ala di wi meki foe doti?

¹⁵ Ma ala di Moses, David, Paulus, Petrus, nanga trawan leki den, ben abi fowtoe, tokoe den ben wini a strei. Foe san ede? Foe di den ben sori wan tranga bribi ini Jehovah, den ben froetrow na en tapoe dorodoro, èn den ben tan krosibei na en, awinsi den ben fadon baka. Den ben bow na en tapoe taki a ben sa gi den „a krakti di pasa ala tra sani”. Èn a ben doe dati troetroe, foe di noiti a no ben meki den fadon sondro foe den ben man opo baka. Efoe wi e tan sori bribi, dan wi kan de seiker taki te wi sa kisi kroetoe, a sa de akroederi den wortoe: „Gado no de onregtfardiki so taki a e frigiti den wroko foe oenoe èn a lobi di oenoe ben sori gi en nen.” Fa disi e poesoe wi foe go na fesi nanga wan fasti bosroiti, ala di wi meki foe doti! — 2 Korentesma 4:7; Hebrewsma 6:10.

San a wani taki gi ibriwan foe wi taki na foe doti wi meki?

16, 17. Fa Jehovah e wroko nanga a gronprakseri di tjari kon na krin ini Galasiasma 6:4, te sma moesoe kisi kroetoe?

¹⁶ Ondrofeni leri foeroe papa nanga mama nanga skoromeester noso skoromisi, a koni foe kroetoe pikin noso studenti akroederi san ibriwan foe den man doe, èn foe no kroetoe den, foe di den e teki brada nanga sisa noso skorokompe, gersi nanga makandra. Disi de akroederi wan bijbel gronprakseri di gi na kresten leki rai: „Meki ibri sma sori san na en eigi wroko, èn dan a sa abi wan reide foe prisiri ini a tori foe en wawan, èn no foe di den teki en gersi nanga wan tra sma.” — Galasiasma 6:4.

¹⁷ Ala di Jehovah e handri nanga en pipel leki wan groepoe di orga, tokoe a e kroetoe ibri sma aparti, akroederi a gronprakseri disi. Romesma 14:12 e taki: „Ibriwan foe wi sa gi frantiwortoe na Gado gi ensrefi.” Jehovah sabi heri boen a fasi fa den gen foe den foetoeboi foe en seti. A sabi fa a skin nanga a froestan foe den meki, a sabi den bekwaamfasi foe den, a krakti nanga den swakifasi di den gebore nanga den, den sani di den kan doe, èn a fasi fa den e meki wan boen gebroiki foe den sani disi di den man doe foe abi boen bakapisi leki wan kresten. Den sani di Jesus ben taki foe a weduwe di ben trowe toe pikin pisimoni na ini a monikisi foe a tempel èn na agersitori di a ben froeteri foe a siri di ben sai na tapoe boen gron, na eksempre di e gi kresten deki-ati, di kande brokosaka, foe di den e meki a fowtoe foe teki densrefi gersi nanga trawan. — Markus 4:20; 12:42-44.

18. (a) Foe san ede wi moesoe go ondrosoekoe san a wani taki gi ibriwan foe wi, taki wi meki foe doti? (b) Foe san ede wan eerlijk ondrosoekoe foe wisrefi no moesoe meki wi lasi-ati?

¹⁸ A de prenspari taki wi e go ondrosoekoe san a wani taki gi ibriwan foe wi taki na foe doti wi meki, so taki wi kan dini dorodoro nanga den sani di wi man doe (Odo 10:4; 12:24; 18:9; Romesma 12:1). Soso te wi sabi boen san na den fowtoe nanga den swakifasi foe wi, dan wi kan tan de na ai ini a tori foe a fanowdoe foe go na fesi èn a man di wi man doe dati. Te wi e ondrosoekoe wisrefi, dan meki wi noiti no frigiti a krakti foe a santa jeje foe jepi wi foe go na fesi. Nanga jepi foe a santa jeje na universum ben meki, bijbel ben skrifi èn, na mindri foe wan grontapoe di e dede gowe, wan njoen grontapoe foe vrede kon de. So boen, a santa jeje foe Gado, troetroe tranga nofo foe gi koni nanga krakti na denwan di e aksi foe en, foe den tan kibri den soifri retifasi. — Mika 3:8; Romesma 15:13; Efeisesma 3:16.

19. Foe san ede no wan reide no de foe doe fowtoe soso foe di wi meki foe doti?

¹⁹ Fa a de wan trowstoe foe sabi taki Jehovah e memre taki wi meki foe doti! Ma noiti wi no moesoe prakseri na wisrefi, taki disi na wan reide di fiti foe no de so fajafaja moro noso kande srefi foe go doe san no boen. Kwetikweti! Taki Jehovah e memre taki wi meki foe doti, na wan fasi foe sori en no-froedini boen-atifasi. Ma wi no wani foe de „sma foe ogridoe, di e kenki a no-froedini boen-atifasi foe wi Gado kon tron wan reide foe libi wan jajo libi èn e sori foe no de getrow na wi wan-enkri Eiginari nanga Masra, Jesus Krestes” (Judas 4). A no foe di wi meki foe doti, dan wi abi reide foe doe ogridoe. Wan kresten e doe moeiti foe feti nanga fowtoe firi, e naki en skin èn e tjari en leki wan srafoe, so taki a kan tan fara foe „meki a santa jeje foe Gado firi sari”. — Efeisesma 4:30; 1 Korentesma 9:27.

20. (a) Na tapoe sortoe toe kontren wi abi „foeroe foe doe ini a wroko foe Masra”? (b) Foe san ede wi abi reide foe prisiri?

²⁰ Now ini den lasti jari foe Satan en grontapoe seti foe sani, a no a ten foe go doe sani moro safri — no so langa a Kownoekondre preikiwroko de ini a tori ete èn no so langa wi moesoe kweki a froktoe foe Gado jeje moro nanga moro. Na tapoe ala toe kontren wi abi „foeroe foe doe”. Now a de a ten foe go na fesi nanga wan fasti bosroiti, bika wi sabi taki wi „wroko no de foe soso” (1 Korentesma 15:58). Jehovah sa jepi wi, bika David ben taki foe En: „Noiti a no sa gi pasi taki a regtfardiki sma e degedege” (Psalm 55:22). Fa a de wan prisiri foe sabi taki Jehovah e gi wi pasi foe wisrefi abi wan prati na a moro bigi wroko di onvolmaakti libisma mekisani kisi foe doe wan ten — èn disi ala di na foe doti wi meki!

[Foetoewortoe]

Joe kan tjari disi kon na krin?

◻ Fa Genesis 2:7 nanga Psalm 103:14 e difrenti te den e taki foe libisma dati na foe doti den meki?

◻ Foe san ede Hebrewsma kapitel 11 na wan fonten foe deki-ati gi kresten ini a ten disi?

◻ Foe san ede a de wan koni sani te wi e poti a gronprakseri di skrifi ini Galasiasma 6:4, na ini wi libi?

◻ Fa Hebrewsma 6:10 nanga 1 Korentesma 15:58 kan jepi wi foe tan fara foe lasi-ati?

[Prenki na tapoe bladzijde 10]

Kresten e teki a bribi foe kompe anbegiman, ma den e waka baka Jesus, a Sma di e meki a bribi foe den kon boen dorodoro