Den foetoeboi foe Gado — Wan pipel di orga èn di de kolokoe
„Kolokoe a pipel di en Gado na Jehovah!” — PSALM 144:15.
1, 2. (a) Foe san ede Jehovah abi a reti foe poti markitiki gi den foetoeboi foe en? (b) San na toe eigifasi foe Jehovah di wi moesoe wani spesroetoe foe waka na dati baka?
JEHOVAH na a Universeel Soeverein, na almakti Gado, a Mekiman (Genesis 1:1; Psalm 100:3). Dati meki a abi a reti foe poti den markitiki gi den foetoeboi foe en, fa den moesoe tjari densrefi, foe di a sabi san na a moro boen sani gi den (Psalm 143:8). Èn a de a Moro Prenspari Eksempre gi den, foe den waka baka den eigifasi foe en. „Tron sma di e waka baka Gado, leki lobi pikin”, wan apostel ben skrifi. — Efeisesma 5:1.
2 Wan eigifasi foe Gado di wi moesoe waka na baka, abi foe doe nanga na orga foe sani. A ’no de wan Gado pe orde no de’ (1 Korentesma 14:33). Te wi e loekoe finifini san Gado meki, dan wi moesoe kon na a bosroiti taki en na a Sma di orga moro leki ala tra sma ini na universum. Ma wan tra eigifasi foe Gado di a wani foe den foetoeboi foe en waka na dati baka, na a kolokoe di a de kolokoe, bika en na „a kolokoe Gado” (1 Timoteus 1:11). So boen, a man di a man foe orga sani, de ini balansi nanga kolokoe. A wan eigifasi no poti moro hei moro a trawan, foe na eigifasi dati no e lasi gowe.
3. Fa a hemel di lai nanga stari, e sori taki Gado man foe orga sani?
3 Ala sani di Jehovah meki, foe a moro bigi sani te go miti a moro pikin sani, e boeweisi taki en na wan Gado di e orga sani. Loekoe foe eksempre, a pisi foe na universum di joe kan si nanga ai. A abi doesoenmiljard tron doesoenmiljard stari. Ma den stari disi no panja na wan broejafasi. George Greenstein, wan koniman ini a sabidensi foe na astrofysika, e taki dati „wan model [de] ini a fasi fa den stari orga”. Den orga na ini groepoe di den e kari stari sistema, èn wan toe foe den abi hondromiljard tron hondromiljard stari na ini. Èn sma bereken taki foeroe miljard stari sistema de! Den stari sistema orga toe. Wan lo foe den (foe wan toe nomo te go miti foeroe doesoen foe den) poti leki groepoe makandra, na ini wan cluster foe stari sistema. Èn sma e denki taki den cluster foe stari sistema, orga na ini moro bigi groepoe srefi di den e kari supercluster. — Psalm 19:1; Jesaja 40:25, 26.
4, 5. Gi eksempre foe a fasi fa sani orga na mindri den libisani na grontapoe.
4 Na orga di den sani di Gado meki, orga na wan kefalek moi fasi, de foe si na ala sei, no wawan na ini a pisi foe hemel di joe kan si nanga ai, ma na grontapoe toe, nanga den miljardmiljard libi sani. Paul Davies, wan profesor ini a sabidensi foe natuurkunde, ben skrifi foe ala den sani disi, taki sma e kon „foeroe nanga lespeki” te den e si a „kefalek moi èn toemoesi dangra fasi fa ala sani orga ini a natuur.” — Psalm 104:24.
5 Loekoe wan toe eksempre foe a „toemoesi dangra fasi fa ala sani orga” ini den libi sani. Josef Evans, wan neurochirurg, ben taki foe na edetonton foe libisma èn foe a fatoe foe a bakabonjo: „Na orga di sani orga troetroe na wan heri boen fasi, pikinmoro e moro wi.” H. J. Shaughnessy, wan koniman ini a sabidensi foe den bakterie, ben froeklari foe den cel di e libi èn di joe kan si nanga wan microscoop wawan: „A dangra fasi èn a toemoesi moi fasi fa ala sani seti ini a microbiologie, wroko so kefalek moi taki a e sori dati a de wan pisi foe wan sistema di Gado ben seti so.” Èn Michael Denton, koniman tapoe a kontren foe a moleculaire biologie, ben taki foe a genetis code (DNA) na ini wan cel: „A de so boen, taki ala bodoi . . . di de fanowdoe foe taki finifini foe a fasi fa ala sortoe libisani meki, èn di oiti ben libi na a grontapoe disi, . . . ben sa man poti na ini wan pikin spoen èn tokoe presi ben o de ete gi ala a bodoi di de na ini ibri boekoe di skrifi oiti.” — Loekoe Psalm 139:16.
6, 7. Sortoe organisâsi de foe si na mindri den jeje mekisani, èn fa den e meki kon na krin taki den e warderi a Mekiman foe den?
6 Jehovah no e orga den sani wawan di a meki na skin fasi, ma a e orga en jeje mekisani na hemel toe. Danièl 7:10 e froeteri wi taki den engel di e teri ’tindoesoen tron tindoesoen ben tan tanapoe leti na fesi foe Jehovah.’ Wánhondro miljoen tranga jeje mekisani di e doe diniwroko, èn ibriwan foe den kisi en joisti wroko foe doe! A e froewondroe wi te wi e denki foe a koni di a moesoe teki foe orga den boen bigi nomroe dati. A e fiti taki bijbel e froeklari: „Blesi Jehovah, oen engel foe en, di tranga ini makti, di e doe a wortoe foe en, foe di oenoe e arki a sten foe en wortoe. Blesi Jehovah, oen legre foe [engel], oen dinari foe en, di e doe a wani foe en.” — Psalm 103:20, 21; Openbaring 5:11.
7 Fa den wroko foe a Mekiman orga na wan kefalek moi èn toemoesi boen fasi! A no de foe froewondroe, taki tranga jeje mekisani na ini hemel kondre e meki bekènti na wan sakafasi èn na wan lespeki fasi: „Joe, Jehovah, ija wi Gado, warti foe kisi a glori nanga a grani nanga a makti, bika joe ben meki ala sani, èn foe joe wani ede den ben de èn ben meki.” — Openbaring 4:11.
8. Sortoe eksempre e sori taki Jehovah e orga den foetoeboi foe en na grontapoe?
8 Jehovah e orga den foetoeboi foe en na grontapoe toe. Di a ben tjari a Froedoe kon ini a ten foe Noa ini 2370 bifo Gewoon Teri, dan Noa nanga seibi tra sma ben pasa a Froedoe libilibi leki wan osofamiri organisâsi. Na a ten di Israèl ben gowe libi Egipti ini 1513 bifo Gewoon Teri, Jehovah ben poeroe foeroe miljoenmiljoen sma foe en pipel foe a katibo na Egipti èn ben gi den wan finifini wetsistema foe orga den aladei afersi nanga na anbegi foe den. Èn bakaten, na ini a Pramisi Kondre, tindoesoen tron tindoesoen foe den ben orga gi spesroetoe diniwroko na a tempel (1 Kroniki 23:4, 5). Ini a fosi jarihondro, den kresten gemeente ben orga na ondro a tiri foe Gado: „A ben gi sonwan leki apostel, sonwan leki profeiti, sonwan leki evangelie preikiman, sonwan leki skapoeman nanga leriman, nanga na prakseri foe gi leri na den santawan foe doe diniwroko.” — Efeisesma 4:11, 12.
Den disiten foetoeboi orga toe
9, 10. Fa Jehovah orga en pipel ini a ten foe wi?
9 Na a srefi fasi, Jehovah orga den disiten foetoeboi foe en, so taki den kan doe a wroko foe en foe preiki a boen njoensoe foe en Kownoekondre gi a ten foe wi, heri boen — bifo A e tjari wan kaba kon na a disiten ogri seti foe sani (Mateus 24:14). Loekoe san de na ini a wroko disi di e doe na heri grontapoe èn o prenspari a de foe orga sani boen. Miljoenmiljoen mansma, oemasma nanga pikin-nengre e kisi leri, so taki den kan leri trawan bijbelwaarheid. Foe jepi nanga a leri disi, meki boen foeroe bijbel nanga poeblikâsi e druk, di abi den fondamenti na tapoe bijbel. Ija, now den e druk moro leki 16 miljoen foe ibri uitgave foe A Waktitoren ini 118 tongo, èn foe Ontwaakt! den e druk wan sani foe 13 miljoen ini 73 tongo. Pikinmoro ala den uitgave den e druk na a srefi ten, so taki pikinmoro ala foetoeboi foe Jehovah e kisi a srefi bodoi na a srefi ten.
10 Boiti dati, moro leki 73.000 gemeente foe Jehovah Kotoigi na heri grontapoe orga foe kon makandra doronomo foe kisi bijbel leri (Hebrewsma 10:24, 25). Doesoendoesoen moro bigi konmakandra — kringkonmakandra nanga distriktkongres — de ibri jari toe. Na heri grontapoe den e bow njoen Kownoekondrezaal, Kongreshal, Bethel-oso nanga presi foe druk bijbel poeblikâsi. Foe gi ekstra leri na sma di e gi bijbel-leri, skoro de so leki a Waktitoren Bijbelskoro Gilead gi zendeling nanga a Pionier Bedinari Skoro, di den e hori ini kondre na heri grontapoe.
11. Sortoe wini wi sa kisi ini a ten di e kon, efoe wi e leri foe orga sani boen now?
11 Fa Jehovah orga en pipel na grontapoe heri boen foe den man ’doe a diniwroko foe den dorodoro’, ala di den e kisi jepi foe den engel foe en di e doe diniwroko! (2 Timoteus 4:5; Hebrewsma 1:13, 14; Openbaring 14:6) Foe di Gado e leri den foetoeboi foe en den fasi foe orga sani boen now, meki a e doe ete wan tra sani. A e sreka den foetoeboi foe en boen, so taki te den pasa a kaba foe a seti foe sani disi libilibi, dan den sa orga boen kaba foe bigin libi ini a njoen grontapoe. Dan den sa bigin bow a Paradijs na grontapoe na wan orga fasi na ondro a tiri foe Jehovah. Den sa de srekasreka boen toe foe leri den miljardmiljard sma di sa kisi wan opobaka foe dede, den sani di Gado e aksi finifini foe sma kisi libi. — Jesaja 11:9; 54:13; Tori foe den Apostel 24:15; Openbaring 20:12, 13.
Den orga, ma tokoe den de kolokoe
12, 13. Foe san ede wi kan taki dati Jehovah wani, taki a pipel foe en de kolokoe?
12 Ala di Jehovah na wan toemoesi aparti wrokoman èn wan sma di e orga sani na wan kefalek boen fasi, tokoe a no de wan sma di no abi firi, di strak, noso di e doe sani leki a e go foe ensrefi. Na presi foe dati, a de wan Sma di abi waran firi srefisrefi èn di de kolokoe èn a de wan Sma di e broko en ede nanga a kolokoe foe wi. „A e sorgoe gi oenoe”, 1 Petrus 5:7 e froeklari. Wi kan si taki a e sorgoe gi den foetoeboi foe en èn taki a e angri foe den de kolokoe nanga san a meki gi libisma. Foe eksempre, di Gado ben meki a volmaakti man nanga oema, a ben poti den na ini wan paradijs foe prisiri (Genesis 1:26-31; 2:8, 9). A ben gi den ala sani di den ben abi fanowdoe foe meki den de kolokoe srefisrefi. Ma den ben lasi ala den sani disi di den ben opo densrefi kontrari en. Leki wan bakapisi foe a sondoe foe den, wi gebore nanga onvolmaaktifasi èn wi e dede. — Romesma 3:23; 5:12.
13 Ala di wi libisma onvolmaakti now, tokoe wi kan feni kolokoe ete ini den sani di Gado meki. Foeroe sani de di e tjari prisiri kon gi wi — den boen bigi bergi; den moi pisi watra, liba, se nanga sesjoro; den bromki di abi someni kloroe èn di e smeri switi, nanga ala sortoe tra prani; wan lo switi njanjan; den kefalek moi sondongo di noiti wi e weri foe den foe e loekoe na den; hemel di lai nanga stari èn di wi e prisiri foe prakseri dipi foe dati na neti; den mekisani di de wan meti nanga en foeroe difrenti sortoe èn den pikin foe den di e gi wi foe lafoe te den e prei; pokoe di e meki wi firi prisiri; switi wroko di e tjari wini kon; boen mati. A de krin, taki a Sma di seti den sortoe sani dati, na wan kolokoe sma di e feni en wan prisiri sani foe meki trawan kolokoe.
14. Sortoe balansi Jehovah e aksi foe wi, te wi e waka na en baka?
14 So boen, na orga di sani orga heri boen, a no dati nomo Jehovah wani. A wani toe foe den foetoeboi foe en de kolokoe, neleki fa en de kolokoe. A no wani foe den e orga sani na wan fanatiek fasi, so taki den e lasi a kolokoe foe den. Den foetoeboi foe Gado moesoe hori a balansi na mindri a koni foe orga sani nanga a kolokoe di den moesoe de kolokoe, so leki fa en e doe, bika pe a tranga santa jeje foe En de, na drape prisiri de. Ija, Galasiasma 5:22 e sori taki a di foe toe froktoe foe Gado en santa jeje di e wroko na ini a pipel foe en na „prisiri”.
Lobi e meki kolokoe kon
15. Foe san ede lobi de so prenspari gi a kolokoe foe wi?
15 A de wan moi sani foe si, taki bijbel e froeklari: „Gado na lobi” (1 Johanes 4:8, 16). Noiti bijbel no e taki: „Gado na organisâsi.” Lobi na a moro prenspari eigifasi foe Gado, èn den foetoeboi foe en moesoe waka na baka dati toe. Dati meki a fosi froktoe foe Gado jeje di kari ini Galasiasma 5:22, na „lobi”, èn „prisiri” e kon baka dati. Lobi e meki prisiri kon. Te wi e waka baka a lobi foe Jehovah, te wi e kisi foe doe nanga tra sma, dan kolokoe e kon foe dati, foe di sma di abi lobi na kolokoe sma.
16. Fa Jesus ben sori o prenspari a de foe sori lobi?
16 O prenspari a de foe waka baka a lobi foe Gado e kon krin na fesi ini den sani di Jesus ben leri sma. A ben taki: „Neleki fa a Tata leri mi, na so mi e taki den sani disi” (Johanes 8:28). San, spesroetoe, Jesus ben leri di, foe en sei baka, a ben leri trawan? A ben de taki den toe moro bigi gebod na foe lobi Gado èn foe lobi a sma na wi sei (Mateus 22:36-39). Jesus ben de wan eksempre ini a sortoe lobi dati. A ben taki: „Mi lobi a Tata”, èn a ben boeweisi disi foe di a ben doe a wani foe Gado te na en dede. Èn a ben sori a lobi di a ben abi gi sma, foe di a dede gi den. Na apostel Paulus ben taigi den kresten na Efeise: ’Krestes ben lobi oenoe èn a ben gi ensrefi foe oenoe ede’ (Johanes 14:31; Efeisesma 5:2). So boen, Jesus ben taigi den bakaman foe en: „Disi na mi gebod, taki oenoe lobi makandra neleki fa mi lobi oenoe.” — Johanes 15:12, 13.
17. Fa Paulus ben sori taki a de prenspari foe sori trawan lobi?
17 Paulus ben sori o prenspari a lobi disi foe Gado de, di a ben taki: „Awansi mi e taki den tongo foe libisma nanga di foe den engel, ma mi no abi lobi, dan mi tron leki a sten foe wan pisi kopro noso leki wan djendjen di e loi. Èn awansi mi abi a presenti foe taki profeititori èn mi froestan ala kibritori èn abi ala sabi, èn awansi mi abi ala bribi, so taki mi kan opo bergi poeroe na den presi, ma mi no abi lobi, mi na noti. Èn awansi mi e gi ala mi goedoe foe gi trawan njanjan, èn awansi mi e gi mi skin abra so taki mi kan skepi, ma no abi lobi, dan a no e tjari wini gi mi kwetikweti. . . . Den dri disi e tan abra now, bribi, howpoe nanga lobi; ma a moro bigiwan foe den na lobi.” — 1 Korentesma 13:1-3, 13.
18. Sortoe sani wi kan froewakti, foe Jehovah, di e meki a kolokoe foe wi kon moro foeroe?
18 Te wi e waka baka a lobi foe Jehovah, dan wi kan de seiker foe a lobi di a abi gi wi, srefi te wi e meki fowtoe, bika en na „wan Gado di abi sari-atifasi èn boen-ati, di no e kisi atibron esi-esi èn di abi lobi boen-atifasi nanga waarheid pasa marki” (Exodus 34:6). Efoe wi abi berow troetroe te wi e meki fowtoe, dan Gado no e hori den na prakseri, ma a e gi wi pardon na wan lobifasi (Psalm 103:1-3). Ija, „Jehovah abi foeroe safoe firi foe lobi èn a abi sari-atifasi” (Jakobus 5:11). Foe di wi sabi disi, dan dati e meki a kolokoe foe wi kon moro bigi.
Kolokoe, di e anga foe tra sani, now
19, 20. (a) Foe san ede sma no man abi dorodoro kolokoe now? (b) Fa bijbel e sori taki wi kan abi kolokoe di e anga foe tra sani ini a ten disi?
19 Ma a de so, taki wi man de kolokoe ini a ten disi, foe di wi e libi ini den lasti dei foe a grontapoe disi di Satan e tiri, èn di foeroe nanga ogridoe, takroedoe èn nanga hoeroedoe, èn pe siki nanga dede e miti wi? A no de foe taki, dati now wi no kan froewakti a kolokoe di sa de ini Gado njoen grontapoe, so leki fa en Wortoe e froeteri wi na fesi: „Loekoe, mi e meki njoen hemel nanga wan njoen grontapoe; èn den sani foe fosi den no sa memre moro, èn den no sa kon na ini na ati moro. Ma prisiri pasa marki, oen pipel, èn abi prisiri foe têgo ini den sani di mi e meki.” — Jesaja 65:17, 18.
20 San den foetoeboi foe Gado kan abi now, na kolokoe di e anga foe tra sani, foe di den sabi a wani foe en èn den abi soifri sabi foe den toemoesi moi blesi di sa kon heri esi na ini a njoen paradijs grontapoe foe en (Johanes 17:3; Openbaring 21:4). Dati meki bijbel kan taki: „O Jehovah foe den legre, kolokoe a man di e froetrow na joe tapoe”, „kolokoe ibriwan sma di abi frede gi Jehovah, di e waka na ini en pasi”, „kolokoe denwan di abi safri-atifasi, bika den sa kisi grontapoe” (Psalm 84:12; 128:1; Mateus 5:5). So boen, ala di den moeilek omstandigheid, di wi abi foe feti nanga den now, tokoe wi kan abi nofo kolokoe. Srefi te ogri sani e pasa nanga wi, dan wi no e firi sari leki fa a de nanga denwan di no sabi Jehovah èn di no abi a howpoe foe têgo libi. — 1 Tesalonikasma 4:13.
21. Fa a gi di den foetoeboi foe Jehovah e gi densrefi, e meki a kolokoe foe den kon moro foeroe?
21 Den foetoeboi foe Jehovah e kisi kolokoe toe, foe di den e gi ten, krakti nanga goedoe, foe leri tra sma den bijbel waarheid, spesroetoe den sma di e ’soktoe èn e krei foe den tegoe sani’ di sma e doe ini a grontapoe foe Satan (Esekièl 9:4). Bijbel e taki: „Kolokoe ibriwan sma di e sori taki a e hori a moro mendriwan na prakseri; ini a dei foe rampoe Jehovah sa gi en froeloesoe. Jehovah srefi sa kibri en èn hori en na libi. Na grontapoe den sa froeklari taki a de kolokoe” (Psalm 41:1, 2). So leki fa Jesus ben taki, dan „a de moro kolokoe foe gi leki foe kisi sani”. — Tori foe den Apostel 20:35.
22. (a) Teki, ini a tori foe kolokoe, den foetoeboi foe Gado gersi nanga den sma di no e dini en. (b) Foe sortoe spesroetoe reide ede wi kan froewakti foe de kolokoe?
22 So boen, ala di den foetoeboi foe Gado no kan froewakti foe kisi ala kolokoe ini a ten disi, tokoe den kan kisi a kolokoe di sma di no e dini Gado, no e njanboen foe dati. Jehovah e froeklari: „Loekoe! Mi eigi foetoeboi sa bari wan prisiri babari foe a boen kondisi foe na ati, ma oenoe sa bari tranga foe a pen foe na ati èn oenoe sa bari nanga sari foe wan dorodoro brokofasi foe jeje” (Jesaja 65:14). So srefi, den sma di e dini Gado abi wan heri spesroetoe reide foe de kolokoe now — den abi en santa jeje, di „Gado gi denwan di e gi jesi na en leki tiriman” (Tori foe den Apostel 5:32). Èn memre taki, pe a jeje foe Gado de, na drape kolokoe de. — Galasiasma 5:22.
23. San wi sa go loekoe ini a tra studie-artikel foe wi?
23 Ini na organisâsi foe den foetoeboi foe Gado ini a ten disi, den „moro owroe man”, den owroeman di e teki fesi ini den gemeente, abi wan prenspari prati di e jepi foe meki a kolokoe foe Jehovah en pipel kon moro foeroe (Titus 1:5). Fa den owroeman disi moesoe si den frantiwortoe foe den, nanga a matifasi di den abi nanga den brada nanga sisa foe den na jeje fasi? A tra artikel foe wi sa taki foe disi.
Fa joe ben sa piki?
◻ Fa den sani di Gado meki e boeweisi na orga di Jehovah orga?
◻ Fa Jehovah orga den foetoeboi foe en ini a ten di pasa kaba èn fa a orga den kaba ini a ten disi?
◻ Sortoe balansi Jehovah wani foe wi sori?
◻ O prenspari lobi de gi a kolokoe foe wi?
◻ Sortoe kolokoe wi kan froewakti ini a ten foe wi?
[Sma di abi a reti foe a prenki na tapoe bladzijde 12]
Na tapoesei: Nanga a primisi foe ROE/Anglo-Australian Observatory, na David Malin meki a fowtow