A pikin foe joe moesoe go na wan kost-skoro?

KON meki wi taki dati joe e libi na ini wan pikin foto na ini wan pôti kondre. Joe abi difrenti pikin na lagi skoro, ma te den doro 12 jari, den sa go na mulo skoro. Na ini a birti foe joe, presi no de na den mulo skoro, den no abi ala sani di de fanowdoe foe kan gi den pikin leri, èn den no abi nofo skoromeester nanga skoromisi. Son leisi, te den sma e saka a wroko, dan skoro e tapoe wan toe wiki èn son tron a de gi wan toe moen.

Wan sma e gi joe wan moi brochure di e taki foe wan kost-skoro na foto. Joe e si fowtow foe kolokoe studenti di weri moi krosi, èn di e studeri na ini klas di abi ala sani na ini, laboratorium, nanga bibliotheek. Den studenti e gebroiki computer èn den e rostoe na ini krin, moi sribikamra. Joe e leisi taki wan foe den marki foe a skoro na foe jepi studenti foe „kisi a moro boen skoroleri di den kan kisi”. Joe e leisi moro fara: „Ala studenti de froeplekti foe hori densrefi na wan bepaalde fasi fa den moesoe tjari densrefi, soleki san sma e froewakti na ini wan osofamiri pe den e poti krakti na tapoe boen maniri, switifasi, lespeki gi papa nanga mama nanga owroesma, a wroko di den moesoe wroko makandra, a froedrage di den moesoe froedrage sani, boenati-fasi, eerlijkfasi, nanga soifri retifasi.”

Den e teki den wortoe foe wan jonkoeman di e lafoe, taki: „Mi papa nanga mama ben gi mi a moro bigi grani foe go na a moro boen skoro.” Wan meisje e taki: „Skoro e gi deki-ati èn a de wan prisiri sani. Djaso sma no abi foe poesoe joe foe leri.” Joe ben o seni a manpikin noso oemapikin foe joe na so wan kost-skoro?

Skoroleri èn jejefasi

Ala papa nanga papa di lobi den pikin foe den, wani gi den wan boen bigin na ini a libi, èn dati meki boen skoroleri di de ini balansi, de so prenspari. Nofo tron skoroleri e gi na okasi foe man feni wroko na ini a tamara èn a e jepi jongoe sma foe gro kon tron bigisma di man sorgoe densrefi èn na osofamiri di den o kisi.

’Efoe wan kost-skoro e gi boen skoroleri makandra nanga son rai di abi foe doe nanga boen gwenti nanga wet, dan foe san ede mi no kan meki boen gebroiki foe en?’ joe ben sa kan aksi. Efoe kresten papa nanga mama wani gi wan piki na tapoe na aksi dati, dan na ini begi den moesoe loekoe wan toemoesi prenspari tori — a jeje tanboen foe den pikin foe den. Jesus Krestes ben aksi: „Foe troe, sortoe wini wan sma abi te a e wini heri grontapoe èn e lasi en sili?” (Markus 8:36) A no de foe taki, dati no wan wini e kon foe disi kwetikweti. Bifo kresten papa nanga mama e bosroiti foe seni den pikin foe den go na wan kost-skoro, den moesoe loekoe sortoe bakapisi disi ben sa kan abi na tapoe a froewakti di den pikin foe den abi foe kan kisi têgo libi.

A krakti di tra studenti abi na den tapoe

Son kost-skoro e gi heri boen skoroleri kande. Ma san wi kan taki foe den moreel markitiki foe den sma di e go na a skoro noso kande srefi foe son wan di e wroko tapoe den skoro dati? Foe den sortoe sma di ben o de foeroe na ini den „lasti dei” disi, na apostel Paulus ben skrifi: „Na ini den lasti dei moeilek ten sa kon, di tranga foe pasa. Bika sma sa lobi densrefi nomo, sma sa lobi moni, de asranti, abi heimemre, de blasfemiasma, de trangajesi na papa nanga mama, de sondro tangi, no sa de loyaal, no sa abi natuurlijk firi foe lobi, no sa de klariklari foe meki kroederi, de ogri-ati leiman, de sondro foe man dwengi densrefi, sa abi wan krasi fasi foe doe sani, de sondro lobi gi boen sani, de toriman, no sa ke foe noti, sa abi bigimemre, sa lobi prisiri moro leki den lobi Gado, sa abi wan fasi foe a gi di den gi densrefi abra na Gado, ma di no sa sori foe abi a krakti foe dati; èn oenoe moesoe drai oen baka gi den sani disi.” — 2 Timoteus 3:1-5.

Na heri grontapoe, boen gwenti nanga wet èn jejefasi e go na baka na a fasi disi, èn a de wan tjalensi gi Jehovah Kotoigi di e libi akroederi bijbel markitiki. Studenti di e kon na oso ibri dei e si taki srefi te den abi pikinso demakandra nomo nanga den grontapoe skoromati, dan dati kan abi wan toemoesi negatief krakti na tapoe a jejefasi foe den. A kan de wan tranga feti gi Kotoigi pikin foe feti nanga a krakti dati, srefi te a papa nanga mama foe den e horibaka gi den, noso e gi den rai nanga deki-ati ibri dei.

Foe dati ede, san na a situwâsi foe den pikin di den e seni gowe foe den oso foe go na kost-skoro? Den papa nanga mama di lobi den, no man horibaka gi den moro na jejefasi ala ten. Foe di den e libi nanga den skoromati foe den 24 joeroe wan dei, meki a druk foe tron leki den trawan abi wan moro bigi krakti na tapoe a jongoe denki nanga ati foe den, kande moro leki fa a de nanga studenti di e libi na oso. Wan studenti ben taki: „Na moreel sei, studenti di e go na kost-skoro de na ini kefar dei nanga neti.”

Paulus ben skrifi: „No kori oensrefi. Takroe kompe e pori boen gwenti” (1 Korentesma 15:33). Kresten papa nanga mama no moesoe kori densrefi foe denki taki no wan ogri na jeje sei sa pasa nanga den pikin foe den, efoe den abi demakandra doronomo nanga den sma di no e dini Gado. Baka wan pisi ten, na ati foe den pikin di e dini Gado, kan kon tranga gi sani di kresten e si leki warti sani èn den kan lasi ala warderi gi jeje sani. Son tron papa nanga mama no e si disi te leki baka te den pikin foe den gowe libi kost-skoro. Dan nofo tron a lati toemoesi foe kenki wan sani.

Na ondrofeni foe Clement na wan eksempre foe disi. A e froeteri: „Fosi mi ben go na kost-skoro, mi ben lobi waarheid èn mi ben go na velddienst nanga den brada. Spesroetoe mi ben lobi foe teki prati na wi osofamiri bijbelstudie nanga a gemeente boekoestudie. Ma so esi leki mi ben go na kost-skoro di mi ben abi 14 jari, mi ben gowe libi waarheid krinkrin. Na ini den feifi jari di mi ben de na kost-skoro, noiti mi no ben go na den konmakandra. A bakapisi foe a takroe demakandra di mi ben abi ben de, taki mi ben gebroiki drug, mi ben smoko, èn ben dringi sopi.”

A krakti di den leriman abi na den tapoe

Ala skoro kan abi leriman di pori ini a tori foe boen gwenti nanga wet, èn di e gebroiki a makti foe den na wan fowtoe fasi. Son wan foe den abi ogri-atifasi èn den grofoe, ala di trawan e mesbroiki den studenti foe den na seks sei. Nofo tron a de so, taki na den kost-skoro sma no sa froeteri foe den sani di den leriman dati e doe.

Ma moro foeroe foe den leriman e proeberi troetroe foe gi den pikin leri, so taki den kan tron memre foe a libimakandra di e wroko tranga, èn kan fiti na ini a grontapoe pe den de na ini, èn libi akroederi dati. Ma djaso wan tra problema de gi den Kotoigi pikin. A no ala ten den sani di grontapoe e si leki warti sani, e kroederi nanga kresten gronprakseri. Ala di leriman e gi studenti deki-ati foe fiti na ini a grontapoe disi, Jesus ben taki dati den bakaman foe en „no [ben o] de wan pisi foe grontapoe”. — Johanes 17:16.

Ma efoe problema e kon, te pikin e hori densrefi na bijbel gronprakseri? Efoe den pikin e go na wan skoro foe a presi pe den e libi èn den e libi na oso, dan den kan taki foe den sortoe tori dati nanga a papa nanga mama foe den. A papa nanga mama foe den sei, kan jepi den pikin foe den èn den kan taki nanga a leriman kande. A bakapisi de, taki nofo tron problema nanga kesekese e kisi wan loesoe esi-esi.

Na den kost-skoro a de wan heri tra sani. Den studenti dati doronomo de na ondro a tiri foe den leriman foe den. Efoe pikin e sori taki den e hori densrefi na kresten gronprakseri, dan den moesoe doe disi sondro a jepi di a papa nanga mama foe den ben sa gi den ala dei. Son leisi, den pikin man tan getrow na Gado na ini den sortoe situwâsi dati. Ma nofo tron den no man doe dati. Moro foeroe wan pikin e saka ensrefi gi a wani foe wan leriman.

Den no kan go noso kon o ten den wani

Tra fasi leki fa a de na den universiteit, pe a gwenti de taki den studenti abi a fri foe go noso kon o ten den wani, den kost-skoro e tapoe den pikin foe go noso kon o ten den wani. Foeroe foe den skoro disi no e gi den studenti pasi foe gowe libi a skoro djari, boiti sonde èn son skoro no e gi pasi srefi foe disi. Eru, wan kost-skoro studenti foe 11 jari, e taki: „Noiti den skoro edeman e gi wi pasi foe go na den konmakandra, èn wi no mag go na velddienst kwetikweti. Na skoro srefi, den e hori kerki soso gi Katoliksma nanga Moslimsma. Ibri studenti moesoe teki wan foe den toe relisi disi noso den e kisi foe doe nanga hebi gens foe den leriman èn foe den studenti. Den e dwengi studenti toe foe singi a singi foe a kondre nanga kerki singi.”

Te papa nanga mama e meki den pikin foe den go na so wan skoro, dan sortoe boskopoe den e gi den jongoe pikin foe den? A boskopoe ben kan de, taki skoroleri moro prenspari leki a kon di den moesoe kon makandra foe anbegi èn foe teki prati na a wroko foe meki disipel — moro prenspari srefi leki a soifri retifasi na Gado. — Mateus 24:14; 28:19, 20; 2 Korentesma 6:14-18; Hebrewsma 10:24, 25.

Na wan toe kost-skoro, den Kotoigi studenti man studeri bijbel makandra, ma nofo tron disi srefi na wan moeilek sani. Wan jongoewan di nen Blessing di abi 16 jari, e taki disi foe a kost-skoro pe a e go: „Ibri dei den so-kari kresten e kon makandra foe begi. Wi leki Kotoigi e proeberi foe aksi den efoe wi kan studeri bijbel, ma den moro owroe studenti e taigi wi taki sma no e erken na organisâsi foe wi. Dan den e proeberi foe dwengi wi foe begi nanga den. Efoe wi e weigri, dan den e strafoe wi. Efoe wi ben sa go na den leriman, dan dati e meki a tori kon moro ogri. Den leriman e gi wi ala sortoe dreigi nen èn den e taigi den moro owroe studenti foe strafoe wi.”

Wi de tra fasi

Te sma sabi krin taki kost-skoro studenti na Jehovah Kotoigi, dan disi kan de wan wini gi den Kotoigi. Den skoro edeman kan gi den pasi foe den no teki prati na falsi relisi doe di de froeplekti èn di de kontrari a bribi foe den Kotoigi. Kompe studenti kan hori densrefi foe no meki den Kotoigi teki prati na aktiviteit nanga takimakandra di no boen. Okasi kan opo foe gi kotoigi na kompe studenti nanga leriman. Moro fara, a kan de so taki sma no sa si den wan di e libi akroederi kresten markitiki, leki sma di e doe serjoesoe ogri, èn son leisi den e wini a lespeki foe leriman nanga kompe studenti.

Ma dati no e pasa so ala leisi. Efoe wan jongoe sma de tra fasi, dan dati e meki en tron leki wan sma di trawan e froefolgoe èn di studenti nanga leriman e spotoe nanga en toe. Yinka, wan boi foe 15 jari di e go na wan kost-skoro, e taki: „Na skoro, efoe sma sabi taki joe na wan Kotoigi foe Jehovah, dan joe e tron wan spotoepopki foe den. Foe di den sabi sortoe bosroiti wi teki na jejefasi èn na moreel sei, meki den e seti trapoe foe kisi wi.”

A frantiwortoe foe papa nanga mama

No wan leriman, skoro, noso universiteit abi a reti foe proeberi teki a wroko abra foe meki pikin tron foetoeboi foe Jehovah di gi densrefi abra na En. Èn a no a wroko noso a frantiwortoe foe den leriman toe. A Wortoe foe Gado e leri taki papa nanga mama srefi moesoe sorgoe gi den sani di den pikin foe den abi fanowdoe na jejefasi. Paulus ben skrifi: „Oenoe, papa, no tanteri den pikin foe oenoe, ma tan kweki den na ini a tranga leri èn a serjoesoe froemane foe Jehovah” (Efeisesma 6:4). Fa papa nanga mama kan gebroiki a rai foe Gado disi efoe den pikin foe den go na wan kost-skoro pe den mag go loekoe den soso wán noso toe tron wan moen?

Situwâsi kan difrenti foeroe, ma kresten papa nanga mama e proeberi foe handri akroederi den wortoe disi di skrifi na ondro a krakti foe santa jeje: „Ija, efoe wan sma no e sorgoe gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi.” — 1 Timoteus 5:8.

Sortoe tra sani kan doe?

San papa nanga mama ben sa kan doe efoe a gersi leki soso toe sani de di den kan teki — wan kost-skoro noso wan skoro na a presi pe den e libi di no abi ala sani di de fanowdoe foe kan gi boen leri? Son sma di de na ini a situwâsi disi e sorgoe taki wan sma e gi den pikin foe den lès aparti foe jepi den nanga a leri di den e kisi na wan skoro pe den e libi. Tra papa nanga mama e poti ten na wan sei, so taki densrefi kan gi den pikin foe den leri.

Son leisi papa nanga mama e wai pasi gi problema, foe di den e sidon denki sani langaten fosi den pikin foe den owroe nofo foe go na mulo skoro. Efoe joe abi jongoe pikin noso joe abi na prakseri foe kweki wan osofamiri, dan joe ben sa kan go loekoe efoe wan boen mulo skoro de ini a birti foe joe. Efoe dati no de so, dan kande joe kan froisi go moro krosibei foe wan.

Soleki fa papa nanga mama sabi heri boen, dan koni, pasensi, nanga foeroe ten de fanowdoe foe poti a lobi foe Jehovah dipi na ini wan pikin. Efoe disi na wan moeilek sani te wan pikin e libi na oso, dan a de moro moeilek te a pikin e libi farawe! Foe di a têgo libi foe wan pikin de ini a tori, meki papa nanga mama moesoe bosroiti serjoesoe èn na ini begi efoe a warti a kefar, foe gi a jongoe pikin foe den abra na a makti foe wan kost-skoro. Fa a ben o de wan don sani foe òfer den jeje afersi foe wan pikin gi den winimarki foe a leri di wan kost-skoro e gi! Disi ben sa de leki te joe e lon go na ini wan oso di e bron, foe poeroe wan sani na ini di no abi waarde — soso nanga a bakapisi taki joe e bron na ini den flam.

A Wortoe foe Gado e taki: „Koni a sma de di si a rampoe èn e go kibri ensrefi, ma den sma di no abi ondrofeni waka go doro èn den moesoe kisi strafoe” (Odo 22:3). A moro betre foe wai pasi gi wan situwâsi di no boen, leki foe doe wan sani na en baka ten. A ben o de wan koni sani foe denki foe dati te joe e aksi joesrefi: ’Mi pikin moesoe go na wan kost-skoro?’

[Faki na tapoe bladzijde 28]

Jongoe kotoigi e taki foe kost-skoro

„Na wan kost-skoro, Kotoigi pikin no abi jeje demakandra. A kontren ogri srefisrefi èn a druk foe doe ogri, bigi.” — Rotimi, di ben go na kost-skoro di a ben abi 11 te go miti 14 jari.

„A ben moeilek troetroe foe go na den kresten konmakandra. Soso sonde mi ben kan go, èn foe doe dati, mi ben abi foe gowe kibrikibri te den studenti ben tanapoe na ini rij foe go na kerki. Noiti mi ben de kolokoe, bika na oso mi ben kon gwenti foe go na ala den gemeente konmakandra, èn mi ben go na ini velddienst satra nanga sonde. Skoro no ben de wan ondrofeni di ben bow mi. Mi ben misi foeroe.” — Ester, di ala leisi baka ben kisi fonfon foe den leriman, foe di a no ben wani teki prati na kerki.

„A no ben de makriki foe gi kotoigi na kompe studenti na kost-skoro. A no makriki foe de tra fasi. Mi ben wani de leki den trawan. Kande mi ben o abi moro deki-ati efoe mi ben man go na den konmakandra èn teki prati na velddienst. Ma mi ben kan doe dati soso te mi ben abi fakansi, san ben de soso dri tron wan jari. Efoe joe abi wan lampoe di joe no foeroe baka nanga oli, dan a faja e kon dòf. Na so a ben de na skoro.” — Lara, di ben go na kost-skoro di a ben abi 11 te go miti 16 jari.

„Now di mi no de moro na kost-skoro, mi breiti taki mi kan go na ala den konmakandra, èn teki prati na a velddienst, èn mi e prisiri foe a dei tekst nanga den trawan foe na osofamiri. Ala di mi ben abi wan toe wini foe di mi ben tan na a skoro, tokoe noti de moro prenspari leki a matifasi di mi abi nanga Jehovah.” — Naomi, di ben overtoigi en papa foe poeroe en foe kost-skoro.