Naḥmanides — A ben sori taki krestendom falsi?

DEN Mindri-jarihondro. Foe san den e meki joe prakseri? Kruistocht? Kroetoebangi foe Lomsoe Kerki? A pina di sma e pina trawan nanga skin-ati? Ala di a no ben de wan pisi ten di sma e si moro foeroe leki wan ten pe sma ben taki fri foe relisi afersi, tokoe na a ten dati, na ini a jari 1263, wan foe den moro aparti djoe-kresten haritaki na ini a historia foe Europa ben feni presi. Soema ben de na ini a haritaki? Sortoe penti ben opo? Fa a haritaki kan jepi wi na ini a ten disi foe kon sabi a troe relisi?

San ben meki a haritaki broko kon?

Na ini a heri pisi ten foe den Mindri-jarihondro, a Lomsoe Kerki ben pristeri ensrefi leki a troe relisi. Ma noiti a djoe pipel ben gowe libi a froeklari foe den taki den na a pipel di Gado froekisi. A man di a kerki no ben man foe overtoigi den djoe foe kenki a bribi foe den, ben meki a kerki ben broeja èn foeroe tron a ben abi ogri di doe nanga tranga èn froefolgoe leki bakapisi. Na ini den Kruistocht, den ben kiri foeroe tindoesoen djoe na ipi noso ben bron den na postoe te den ben moesoe teki a sei foe dopoe noso dede. Na ini foeroe kondre, a soetoe di kerki ben e soetoe faja teige den djoe ben de wan aladei sani.

Ma wan heri tra fasi foe denki ben de moro foeroe na Katolik Spanjorokondre foe a di foe twarfoe jarihondro èn di foe tinadri jarihondro. Djoe ben kisi pasi foe de fri na relisi sei — so langa leki den no ben doe sani teige a kresten bribi — èn den ben kisi so srefi prenspari posisi na ini na oso foe a kownoe. Ma baka pikinmoro wán jarihondro di den ben feni a boen disi, den dominicaner priester ben doe sani foe meki a makti foe den djoe na ini a libimakandra kon moro mendri èn foe bekeer den djoe kon na a Katolik bribi. Den dominicaner ben poti druk na tapoe Kownoe James a Fosiwan foe Aragon foe sreka wan officieel haritaki, èn a marki foe dati ben de foe boeweisi taki a djoe relisi ben moro lagi èn foe sori taki a de fanowdoe taki ala djoe moesoe bekeer.

Disi no ben de a fosi djoe-kresten haritaki. Na ini a jari 1240 wan officieel haritaki ben hori na Parijs, Fransikondre. A moro prenspari marki foe en ben de foe tjari a Talmud, wan santa boekoe gi den djoe, na kroetoe. Ma den djoe di ben teki prati na a haritaki, ben kisi pikinso fri nomo foe taki. Baka di a kerki ben froeklari taki a ben wini a haritaki disi, dan den ben bron boen foeroe kopie foe a Talmud na tapoe den poebliki pren.

Ma Kownoe James a Fosiwan foe Aragon di no ben de so strak, no ben gi pasi gi so wan spotoe kroetoe. Den dominicaner di ben froestan disi, ben proeberi wan tra sani. Soleki fa Hyam Maccoby ben skrifi na ini en boekoe Judaism on Trial, den dominicaner ben gi den djoe wan kari foe kon na a haritaki, „na wan fasi foe doe neleki den abi boen maniri èn foe overtoigi den, na presi foe kroetoe den neleki fa den ben doe dati na Parijs”. Den dominicaner ben poti leki a moro prenspari sma di ben o taki gi den, Pablo Christiani, wan djoe di ben bekeer go na a Katolik bribi èn di ben tron wan dominicaner priester. Foe di den dominicaner ben gebroiki a sabi di Pablo Christiani abi foe a Talmud èn foe den sani di den rabi ben skrifi, den ben de seiker taki den ben kan boeweisi taki Jesus ben de a Mesias.

Foe san ede den ben teki Naḥmanides?

Soso wán prenspari sma na Spanjorokondre ben abi a koni foe jeje afersi, foe taki gi den djoe na ini a haritaki — Moses ben Naḥman, noso Naḥmanides.a Na baka di Naḥmanides ben gebore na ini pikinmoro 1194 na ini a foto Gerona, a ben meki ensrefi bekènti kaba leki wan sabiman foe bijbel èn foe a Talmud di a ben de wan tini. Di a ben abi 30 jari, a ben skrifi froeklari foe a moro bigi pisi foe a Talmud, èn no langa na baka di a ben abi 30 jari, a ben de wan prenspari takiman na ini a haritaki di ben abi foe doe nanga den sani di Maimonides ben skrifi èn di ben de wan kefar di ben kan prati a djoe libimakandra.b Sma e si Naḥmanides leki a moro prenspari djoe sabiman foe a bijbel èn foe a Talmud na ini en geslakti èn kande a di foe toe sma na baka Maimonides, foe a makti di a ben abi na tapoe a djoe bribi na ini a pisi ten dati.

Naḥmanides ben abi bigi krakti na tapoe a djoe libimakandra na Catalonia, èn srefi Kownoe James a Fosiwan ben aksi rai na en foe difrenti Lanti afersi. Den djoe èn so srefi den heiden ben lespeki a srapoefasi fa a man denki. Den dominicaner ben froestan taki en, a moro prenspari rabi foe den djoe, ben sa moesoe de a sma di ben de ini a haritaki, so taki den kan lagi den djoe na wan boen fasi.

Naḥmanides no ben wani foe haritaki, foe di a ben froestan taki den dominicaner no ben abi na prakseri foe de eerlijk. A ben moesoe piki den aksi, ma a no ben mag poti no wan aksi. Ma a ben doe san a kownoe ben aksi en, èn a ben aksi foe kisi primisi foe taki fri te a e gi den piki foe en. Kownoe James a Fosiwan ben agri nanga disi. So wan sortoe primisi di ben gi foe taki fri, no ben feni presi bifo èn no ben sa feni presi moro na ini a heri Mindri-jarihondro, èn dati ben de wan soifri boeweisi foe a dipi lespeki di a kownoe ben abi gi Naḥmanides. Ma tokoe Naḥmanides ben loekoe boen. Efoe a ben sori taki a ben abi toemoesi foeroe feantifasi na ini a haritaki, dan takroe bakapisi ben sa de gi en èn gi a djoe libimakandra. Ogri di e doe nanga tranga ben kan broko kon ibri momenti.

Naḥmanides teige Pablo Christiani

A moro prenspari presi pe a haritaki ben hori, ben de a paleisi foe a kownoe na Barcelona. Fo takimakandra ben hori — 20, 23, 26, nanga 27 juli 1263. A kownoe srefi ben de fesiman na ibriwan foe den takimakandra, èn difrenti heihei man foe Kerki nanga Lanti ben de drape, èn so srefi djoe foe a libimakandra foe a presi drape.

A kerki ben de seiker fa a takimakandra ben sa waka. Na ini den officieel verslag, den dominicaner ben taki dati a marki foe a takimakandra ’no [ben] de foe haritaki foe a bribi neleki a ben de wan sani foe san den e tweifri, ma a marki ben de foe poeroe den fowtoe foe den djoe èn foe poeroe a tranga bribi foe foeroe djoe’.

Ala di Naḥmanides ben owroe pikinmoro 70 jari, tokoe a ben sori taki a man denki srapoe, di a ben proeberi foe meki a takimakandra go foe prenspari afersi nomo. A ben e bigin foe taki: „[Fosi] haritaki na mindri heiden nanga djoe ben abi foe doe nanga foeroe afersi foe relisi gwenti èn a prenspari gronprakseri foe bribi no e anga na den. Ma na a kroetoebangi disi foe a kownoe, mi wani taki soso foe afersi na san a heri haritaki disi e anga.” Den ben agri taki den ben sa taki nomo efoe a Mesias ben kon kaba ofoe no, efoe a ben de Gado noso libisma, èn efoe den djoe noso den kresten abi a troetroe wet.

Na ini den bigin wortoe foe en, Pablo Christiani ben froeklari taki a ben sa boeweisi na ini a Talmud taki a Mesias ben kon kaba. Naḥmanides ben piki taki efoe disi ben de troe, dan foe san ede den rabi di ben erken a Talmud, no ben erken Jesus? Na presi foe meki den sani di a e taki abi foe doe nanga krinkrin bijbel prakseri, ibri tron baka Christiani ben sori go na sani di den rabi ben skrifi èn di no de krin foe froestan, foe boeweisi den sani di a e taki. Ibri tron Naḥmanides ben boeweisi taki den fowtoe, foe di a ben e sori taki den sani disi di den rabi skrifi no ben froeklari na a joisti fasi. A ben de logis taki Naḥmanides ben kan sori taki a de moro bekwaam foe haritaki foe den sani disi di ben skrifi, sani di a ben studeri en heri libi langa. Srefi te Christiani ben sori go na den Boekoe foe bijbel, den sani di a ben taki ben poti krakti na tapoe penti di de makriki foe boeweisi taki den falsi.

Ala di Naḥmanides ben mag gi piki nomo na tapoe den aksi, tokoe a ben man gi krakti boeweisi di ben sori foe san ede djoe nanga tra sma di man denki, no ben sa man erken a posisi foe a Katolik Kerki. Foe a Dri-wánfasi leri, a ben froeklari: „A froestan foe ibri djoe noso foe ibri libisma no sa gi en pasi foe bribi taki a Mekiman foe hemel nanga grontapoe . . . ben sa gebore foe wan djoe oema . . . èn baka ten [ben sa] gi abra na ini na anoe foe den feanti foe en di . . . ben kiri en.” Naḥmanides ben taki soifri: „San joe e bribi — èn dati na a fondamenti foe joe bribi — na wan sani di a froestan [di man denki] no kan teki.”

Naḥmanides ben poti krakti na tapoe a bigi broedoe paiman foe a kerki, ala di a ben sori na tapoe a doe di den no e doe san den e leri èn te now ete dati tapoe foeroe djoe foe prakseri srefi efoe a kan taki Jesus na a Mesias. A ben taki: „A profeiti e taki dati na ini a ten foe a Mesias, . . . den sa moesoe naki den feti-owroe foe den kon tron proegoe èn den lansri foe den kon tron koti-nefi. Nâsi no sa opo feti-owroe teige nâsi, so srefi den no sa leri orlokoe moro. Foe den dei foe a Nasarener te leki now, a heri grontapoe lai nanga ogri di e doe nanga tranga èn nanga foefoeroe. [Ija], den kresten trowe moro foeroe broedoe leki den tra nâsi, èn den ben libi na wan fasi toe di no de akroederi boen gwenti nanga wet. O moeilek a ben sa de gi joe, mi masra kownoe, èn gi den ridder foe joe efoe den no ben sa leri feti moro!” — Jesaja 2:4.

Baka a di foe fo takimakandra, a kownoe ben tjari wan kaba kon na a haritaki. A ben taigi Naḥmanides: „Noiti ete mi si wan man di ben fowtoe, e taki-go-taki-kon so boen leki joe ben doe.” Soleki fa a ben pramisi foe gi en a djaranti foe man taki fri èn foe gi Naḥmanides kibri, Kownoe James a Fosiwan foe Aragon ben seni en go na oso, makandra nanga wan presenti foe 300 dinari. Foe di a biskopoe foe Gerona ben aksi en, Naḥmanides ben skrifi wan verslag foe a haritaki.

Ala di den dominicaner ben froeklari taki den ben wini krinkrin, tokoe den ben broeja srefisrefi. Baka ten den ben kroetoe Naḥmanides taki a ben taki ogri-ati lei teige a kerki, ala di den ben gebroiki den sani di a ben skrifi foe a haritaki leki boeweisi. Foe di den dominicaner no ben lobi a fasi fa a kownoe ben handri nanga Naḥmanides, meki den ben aksi jepi na paus Clemens a di foe Fo. Ala di a ben owroe moro leki 70 jari, den ben seni Naḥmanides gowe foe Spanjorokondre.c

Pe a waarheid de foe feni?

Den boeweisi foe ala den toe sei ben jepi foe meki sma kon sabi a troe relisi? Ala di den ala toe ben tjari den fowtoe foe a tra sei kon na krin, no wan foe den ben gi wan krin boskopoe foe waarheid. San Naḥmanides ben man foe boeweisi foe de falsi, no ben de a troe krestendom, ma na presi foe dati, den leri di libisma srefi meki, soleki a leri foe a Dri-wánfasi di a krestenhèit ben meki na ini den jarihondro na baka a ten foe Jesus. A fasi fa krestenhèit no ben tjari ensrefi akroederi boen gwenti nanga wet èn a trowe di a ben trowe broedoe na wan ogri-ati fasi, di Naḥmanides ben tjari kon na krin na wan deki-ati fasi, na so srefi sani foe a historia di skrifi èn di seiker de troe.

Na ini den situwâsi disi, a no moeilek foe froestan foe san ede den boeweisi foe a krestendom no ben naki na ati foe Naḥmanides nanga den tra djoe. Moro fara, den boeweisi foe Pablo Christiani no ben abi gron na tapoe soifri taki-go-taki-kon foe den Hebrew Boekoe foe bijbel, ma na tapoe a froeklari di a ben froeklari na wan fowtoe fasi den sani di den rabi ben skrifi.

Nôno, foe taki en leki fa a de troetroe, Naḥmanides no ben boeweisi taki a troe krestendom falsi. Na a ten foe en, den falsi froeklari ben meki a troe leti foe den leri foe Jesus èn foe den boeweisi taki En na a Mesias, no de krin foe si moro. Foe taki en leti, Jesus nanga den apostel ben taki na fesi taki den sortoe leri disi foe sma di fadon komoto na bribi, ben sa de. — Mateus 7:21-23; 13:24-30, 37-43; 1 Timoteus 4:1-3; 2 Petrus 2:1, 2.

Ma, na ini a ten disi a de krinkrin foe si san na a troe relisi. Jesus ben taki foe den troe bakaman foe en: „Na den froktoe foe den oenoe sa kon sabi den. . . . So srefi, ibri boen bon e meki boen froktoe, ma ibri pori bon e meki froktoe di no abi waarde” (Mateus 7:16, 17). Wi e gi joe a kari foe kon sabi a troe relisi. Meki Jehovah Kotoigi jepi joe foe ondrosoekoe den boeweisi foe bijbel na wan eerlijk fasi. Na so fasi joe sa leri san ala den pramisi foe Gado di abi foe doe nanga a Mesias èn en tiri wani taki troetroe.

[Foetoewortoe]

[Prenki na tapoe bladzijde 20]

Naḥmanides ben taki foe na afersi foe en na ini Barcelona

[Sma di abi a reti foe a prenki na tapoe bladzijde 19]

Den prenki tapoe bladzijde 19 nanga 20: Meki baka foe Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s