San na a Talmud?

„A Talmud de seiker wan foe den moro aparti boekoe di meki oiti.” — The Universal Jewish Encyclopedia.

„[A Talmud na] wán foe den moro boen koni wroko foe a libisma famiri, wan dokumenti di de so prenspari, so moeilek foe froestan, taki a tan hori den prakseri foe den kefalek konisma gi moro leki 1500 jari langa.” — Jacob Neusner, wan djoe sabiman nanga skrifiman.

„A Talmud na a moro prenspari stonfoetoe [foe a Djoe-bribi] di e seti a heri stroektoeroe foe a djoe libi na jejefasi èn na froestan sei.” — Adin Steinsaltz, wan sabiman nanga rabi foe a Talmud.

A TALMUD seiker ben abi wan kefalek bigi krakti na tapoe a djoe pipel foeroe jarihondro langa. Ma kontrari foe den prèise wortoe di skrifi na tapoesei, sma lagi a Talmud èn kari en „wan se foe dangra èn broeja sani”. Den kroetoe en leki wan Didibri wroko foe pori Gado nen. A komando foe paus foeroetron ben tapoe sma foe no meki a Talmud kon na doro, ben meki sma teki en ini beslag, èn srefi ben meki sma bron en bogobogo na ini poebliki presi foe Europa.

San na a boekoe disi troetroe, di ben meki so foeroe kesekese de? San e meki taki a Talmud de wan aparti boekoe na mindri den tra boekoe di djoe skrifi? Foe san ede a ben skrifi? Fa a doe kon taki a Talmud abi so wan bigi krakti na tapoe a Djoe-bribi? A de prenspari gi den sma di a no djoe?

Na ini den 150 jari baka di a tempel na ini Jerusalem ben pori, na ini 70 G.T., den akademia gi koni rabi na ini heri Israèl, ben e soekoe fajafaja wan njoen fondamenti foe tan hori den djoe gwenti. Den ben taki-go-taki-kon èn baka dati den ben tjari difrenti gwenti foe den wet di ben taki nanga mofo, kon na makandra. Nanga jepi foe a fondamenti disi den ben poti njoen sani di sma no mag doe èn njoen markitiki gi a Djoe-bribi, foe libi wan ibri-dei santa libi sondro wan tempel. A njoen jeje stroektoeroe disi ben skrifi na ini a misjna, di Judah ha-Nasi ben poti na makandra na ini a bigin foe a di foe dri jarihondro G.T.a

A misjna ben tanapoe na tapoe en eigi foetoe, èn no ben e soekoe reti na den sani di skrifi na ini bijbel. A fasi fa a e taki sani èn srefi a sistema foe a Hebrewtongo foe en ben de aparti, aparti foe bijbel. Den bosroiti di den rabi ben teki èn di skrifi na ini a misjna ben sa abi krakti na tapoe na aladei libi foe den djoe na ala presi. Ija, Jacob Neusner e taki: „A mamawet foe Israèl ben teki foe a misjna. . . . A ben aksi foe den taki den ben moesoe agri nanga den wet èn ben moesoe libi akroederi den.”

Ma fa a de te wan sma ben sa tweifri efoe a makti foe den koniman di kari na ini a misjna ben de troetroe a srefi leki san tjari kon na krin na ini den Boekoe foe bijbel? Den rabi ben sa moesoe sori taki den leri foe den Tanna-im (den man di ben e leri sma a wet di ben gi abra nanga mofo) di ben de foe feni na ini a misjna, ben de krinkrin akroederi den Hebrew Boekoe foe bijbel. A ben kon de fanowdoe foe gi moro froeklari. Den ben feni taki a ben de fanowdoe foe froeklari a misjna èn boeweisi taki a boen èn taki a ben bigin nanga a Wet di Gado ben gi Moses na tapoe Sina-i. Den rabi ben firi taki den abi a plekti foe boeweisi taki a mofowet nanga a skrifiwet ben abi a srefi prakseri èn a srefi marki. Na presi taki a misjna ben de a moro prenspari sani di e taki foe a Djoe-bribi, a ben tron wan njoen fondamenti gi relisi takimakandra nanga haritaki.

A Talmud e meki

Den rabi di ben teki a njoen tjalensi disi ben kisi a nen amora-im — „sma di e froeklari”, noso „sma di e tjari [a misjna] kon na krin”. Ibri akademia ben drai lontoe wan prenspari rabi. Wan pikin groepoe sabiman nanga studenti ben hori takimakandra a heri jari. Ma den moro prenspari programa ben hori toe leisi wan jari, na ini den moen Adar nanga Elul, te foeroe praniwroko no ben de foe doe èn hondrohondro sma noso srefi doesoendoesoen sma ben kan fisiti en.

Adin Steinsaltz e froeklari: „Na edeman foe na akademia ben de a fesiman, èn a ben sidon na tapoe wan stoeroe noso na tapoe spesroetoe matamata. Na den fesisei rèi abrasei foe en den prenspari sabiman ben sidon, so srefi den kompe foe en noso tra heri boen studenti, èn na baka den, ala den tra sabiman ben sidon. . . . A fasi fa den ben e sidon ben gron tapoe wan hierarchie [akroederi a prensparifasi foe den sma] di ben bepaal soifri kaba.” Den ben e leisi wan pisi foe a misjna. Dan den ben sa gersi disi nanga materiaal di e taki foe a srefi sani noso di e gi moro bodoi, di den Tanna-im ben tjari kon na wán, ma di no ben poti na ini a misjna. Dan den ben sa bigin foe ondrosoekoe sani finifini. Aksi ben e poti, èn den ben e ondrosoekoe den sani di ben de kontrari foe makandra, so taki den kan feni sani na ini den leri di e kroederi nanga makandra. Den ben soekoe tekst na ini den Hebrew Boekoe foe bijbel leki boeweisi di e hori baka gi den leri foe den rabi.

Ala di den ben abi wan boen stroektoeroe, tokoe den takimakandra disi ben faja èn son tron den ben djoegoedjoegoe. Wan koniman di den kari na ini a Talmud ben e taki foe „faja di ben e koti” na ini den mofo foe den rabi te den ben abi wan takimakandra (Hullin 137b, Talmud foe Babilonia). Steinsaltz e taki fa den sani e waka: „Na edeman foe na akademia, noso a koniman di e gi a leri, ben e gi en eigi denki foe den problema. Nofotron den sabiman na ini a poebliki ben e soetoe wan lo aksi gi en na tapoe gron foe tra boekoe, a fasi fa tra sma di e gi komentaar e denki, noso tapoe gron foe den eigi logis denki foe den. Son tron a takimakandra ben sjatoe srefisrefi èn ben gi pasi nomo gi wan piki di ben moesoe de krin èn sondro tweifri na tapoe wan spesroetoe aksi. Na ini tra kefal, tra sabiman ben e gi tra loesoe èn dan wan bigi haritaki ben e bigin.” Ala sma di ben de drape ben e kisi na okasi foe teki prati. Penti di ben tjari kon na krin na den programa ben sa tjari go na tra akademia so taki tra sabiman ben sa kan loekoe den baka.

Tokoe, den programa disi no ben de soso haritaki foe wet tori di no ben kon na wan kaba. Wet tori di ben abi foe doe nanga den reglementi nanga den ordroe foe a Djoe relisi libi nen Halacha. A wortoe disi e kon foe wan Hebrew roetoewortoe „go” èn e sori a ’fasi fa wan sma moesoe libi’. Ala tra afersi — tori di e taki foe den rabi nanga den bijbel sma, den koni sani di sma taki, bribi nanga filosofia — nen Haggadah, foe a Hebrew roetoewortoe „froeteri”. Halacha nanga Haggadah ben e moksi nanga makandra te den rabi ben e haritaki.

Na ini en boekoe The World of the Talmud, Morris Adler e taki: „Wan koni leriman ben e kon na mindri wan langa èn moeilek haritaki foe wet tori, foe di a ben e drai a tori kon tapoe wan sani di no de so hebi èn di ben e gi moro deki-ati. Na a fasi disi wi e si taki fositen-tori nanga historia, sabidensi nanga koeltoeroe foe a srefi pisiten, a froeklari foe bijbel nanga bodoi foe bijbel sma, relisi lezing nanga theologie, moksi nanga makandra, èn gi sma di no sabi den fasi fa den akademia e doe sani, a gersi wan freimde moksi patoe foe bodoi di no orga.” Gi den sabiman na tapoe den akademia, ala den sortoe fasi disi fa den e drai tori ben abi wan marki èn ben abi foe doe nanga a penti di den ben takimakandra foe en. Halacha nanga Haggadah ben de den bowston foe wan njoen relisi stroektoeroe di ben e bow na tapoe den akademia foe den rabi.

Toe Talmud e meki

Te foe kaba, a moro prenspari presi foe den rabi na ini Palestina ben froisi go na Tiberia. Tra prenspari akademia ben de na Sepphoris, Cesarea, nanga Lydda. Ma na ekonomia di ben e takroe moro nanga moro, doronomo politik djoegoedjoegoe, èn te foe kaba a druk nanga froefolgoe foe krestenhèit di ben fadon komoto na bribi, ben meki foeroe sma froisi go na wan tra prenspari presi pe foeroe djoe e tan na Owstoesei — Babilonia.

Foeroe jarihondro den studenti ben go na ini ipi-ipi foe Babilonia na Palestina foe studeri na ondro den bigi rabi na den akademia. Wán foe den studenti disi ben de Abba ben Ibo, di den ben e kari so srefi Abba Arika — Abba a langaman — ma baka ten den ben e kari en Rab wawan. A ben drai go baka na Babilonia pikinmoro 219 G.T. baka di a ben studeri na ondro Judah ha-Nasi, èn disi ben de wan prenspari kenki na jejefasi foe a djoe libimakandra na ini Babilonia. Rab ben seti wan akademia na Sura, wan kontren nanga foeroe djoe, ma nanga pikinso sabiman. A nen di a ben abi ben hari 1200 doronomo studenti go na en akademia, èn doesoendoesoen tra studenti ben e fisiti na akademia na ini den djoe moen Adar nanga Elul. Wan prenspari man na ini a ten foe Rab, Samuèl, ben seti wan akademia na ini Nehardea. Tra prenspari akademia ben seti na Pumbeditha nanga Mehoza.

A no ben de fanowdoe moro foe go na Palestina, bika wan sma ben kan studeri na ondro den bigi sabiman na ini Babilonia. A meki di den ben meki a misjna leki wan aparti tekst ben sreka a pasi foe no anga moro srefisrefi foe den akademia foe Babilonia. Ala di difrenti fasi foe studeri ben e meki na ini Palestina nanga Babilonia, tokoe doronomo komunikâsi nanga a seni di den ben e seni leriman go na den akademia foe makandra, ben hori a wánfasi na ini den akademia.

Na a kaba foe a di foe fo jarihondro èn a bigin foe a di foe feifi jarihondro G.T., a situwâsi ben kon spesroetoe moeilek gi den djoe na ini Palestina. Wan lo wet di ben abi foeroe sani na ini di den no ben mag doe èn froefolgoe na ondro a moro bigi makti foe a krestenhèit di fadon komoto na bribi, ben abi leki bakapisi taki wan lasti ogri ben miti den foe di a Sanhedrin nanga a posisi foe a Nasi (famiri-edeman) ben kon na wan kaba pikinmoro na ini a jari 425 G.T. Foe dati ede den Amora-im foe Palestina ben bigin poti den samenvatting foe den haritaki na ini den akademia kon na wán, na ini wan-enkri boekoe di abi wánfasi na ini, foe sorgoe taki den no lasi gowe. A boekoe disi di tjari esi-esi kon na wán, na ini a lasti pisi foe a di foe fo jarihondro G.T., ben kon de bekènti leki a Talmud foe Palestina.b

Ala di den akademia na ini Palestina ben e go na baka, den Amora-im foe Babilonia ben e doro a heimarki foe den sani di den ben man doe. Abaye nanga Raba ben tjari a posisi foe a haritaki kon tron wan dangra èn moeilek takimakandra di baka ten ben kon tron a fasi fa den ben ondrosoekoe a Talmud finifini. Baka dati, Ashi, na edeman foe na akademia na Sura (371-427 G.T.), ben bigin tjari den raport foe den haritaki kon na makandra èn ben bigin skrifi den verslag foe den haritaki na tapoe den konmakandra. Soleki fa Steinsaltz e taki, a ben doe dati bika a „ben e frede taki a kefar ben de, foe di sani ben broeja, taki den foeroe sani di ben e taki nanga mofo, ben kan frigiti safrisafri.

Den foeroe bodoi disi ben foeroe toemoesi gi wán man nomo noso srefi gi san wan geslakti ben man orga. A pisiten foe den Amora-im ben kaba na ini Babilonia, na ini a di foe feifi jarihondro G.T., ma a lasti skrifi foe a Talmud foe Babilonia ben go doro te na ini a di foe siksi jarihondro G.T., di wan groepoe ben doe di ben nen Sabora-im, wan Arameisi wortoe di wani taki „den man di e froeklari sani”, noso „sma di abi wan denki”. Den lasti skrifiman disi ben tjari den doesoendoesoen loesoe-loesoe pisi kon makandra nanga den haritaki foe den rabi na ini den foeroe jarihondro, èn ben poti wan stijl nanga wan sistema na ini a Talmud foe Babilonia, di ben meki a tron aparti foe ala den tra djoe boekoe di ben skrifi na fesi.

San a Talmud ben doe?

Den rabi foe a Talmud ben abi leki marki foe boeweisi taki a misjna ben kon foe a srefi presi leki den Hebrew Boekoe foe bijbel. Ma foe san ede den ben wani boeweisi disi? Jacob Neusner e piki: „A penti di ben meki bekènti ben de a posisi foe a misjna. Ma a moro prenspari tori ben sori foe de a makti foe a koniman srefi.” Foe tranga a makti disi foe a koniman, ibri lin foe a misjna, son tron srefi ibri wortoe, ben e ondrosoekoe, ben e kisi tjalensi, ben e froeklari èn ben e meki kroederi nanga makandra na wan sortoe fasi. Neusner e taki dati na a fasi disi den rabi „ben kenki a marki foe a misjna”. Ala di a misjna ben meki leki wan boekoe di boen dorodoro, tokoe a ben ondrosoekoe finifini baka. Ala di dati ben doe, den ben meki a misjna baka èn den ben ondrosoekoe en finifini foe kenki en baka.

A njoen boekoe disi — a Talmud — ben doro a marki foe den rabi. Den ben poti den lin foe ondrosoekoe sani, èn foe dati ede a Talmud ben e leri a pipel foe denki leki den rabi. Den rabi ben e bribi taki a fasi fa den e studeri èn e ondrosoekoe sani ben de wan prenki foe a fasi fa Gado e denki. A marki ben de foe studeri a Talmud srefi, a ben tron wan fasi foe anbegi — a gebroiki di den e gebroiki a froestan na a fasi fa Gado e doe en, soleki fa den e prakseri. Gi foeroe geslakti, sma ben e ondrosoekoe a Talmud srefi na a srefi fasi disi. San na a bakapisi? A historiaman Cecil Roth e skrifi: „A Talmud . . . ben gi [den djoe] wan dipi aparti marki di ben e meki den de difrenti foe tra sma, èn so srefi a kefalek aparti krakti di den abi foe no kenki èn a wroko di den e wroko na ini wánfasi. A taki di den e taki nanga makandra foe ondrosoekoe sani ben srapoe a koni di den abi foe froestan sani, èn ben gi den . . . a koni foe froestan srefi pikinpikin sani. . . A Talmud ben gi a djoe di ben kisi froefolgoe na ini den Mindri Jarihondro wan tra grontapoe pe a ben kan lowe gowe . . . A ben gi en wan agersi gebortekondre, di a ben kan tjari nanga en te en eigi kondre ben lasi.”

Foe di a Talmud ben leri tra sma fa den rabi ben e denki, meki a ben abi krakti seiker. Ma na aksi gi ala sma — djoe nanga sma di no de djoe — na disi: A Talmud de wan prenki troetroe foe a fasi fa Gado e denki? — 1 Korentesma 2:11-16.

[Foetoewortoe]

[Faki na tapoe bladzijde 31]

Den toe Talmud — fa den gersi?

A Hebrew wortoe „Talmud” wani taki „studeri” noso „leri”. Den Amora-im foe Palestina nanga Babilonia ben abi a marki foe studeri, noso ondrosoekoe a misjna. Ala toe Talmud (foe Palestina nanga foe Babilonia) e doe dati, ma fa den gersi? Jacob Neusner e skrifi: „A fosi Talmud e ondrosoekoe den boeweisi, a di foe toe Talmud e ondrosoekoe denki foe sma; a fosiwan e taki soso foe a tori di den e ondrosoekoe, èn a di foe toe e taki pasa srefisrefi foe a tori di den ben moesoe ondrosoekoe.”

A moro fajafaja èn finifini skrifiwroko di ben doe na a Talmud foe Babilonia no ben meki a moro bigi nomo, ma so srefi moro dipi èn moro finifini ini a fasi fa a e prakseri èn ondrosoekoe sani. Te a wortoe „Talmud” e gebroiki, dan moro foeroe den wani taki a Talmud foe Babilonia. Disi na a Talmud di studeri moro foeroe èn di sma ben taki sani moro foeroe foe en na ini den jarihondro di pasa. Soleki fa Neusner e prakseri, dan a Talmud foe Palestina „na wan boekoe gi wan marki”, èn a Talmud foe Babilonia „na wan boekoe foe bekwaam sma”.