Joe e memre disi ete?

Joe feni taki den uitgave foe A Waktitoren foe no so langa pasa, ben abi praktis waarde gi joe? Dan foe san ede joe no e ondrosoekoe nanga den aksi di e kon now, foe si san joe e memre?

◻ Fa Armagedon sa de? (Openbaring 16:14, 16)

A no sa de wan nucleair apocalyps, noso wan rampoe di kon foe libisma ede. Nôno, a de Gado en orlokoe di sa tjari wan kaba kon na ala orlokoe foe libisma èn di sa poeroe ala den sma di e meki orlokoe kon, èn di sa tjari troe vrede kon gi den sma di lobi vrede. A no sa skoifi go na wan tra ten (Habakuk 2:3). — 15/4, bladzijde 17.

◻ Sortoe trow e gi Jehovah grani?

Wan trow pe jeje afersi de moro prenspari leki a fasi fa grontapoe e doe sani, sa gi Jehovah grani troetroe. Kresten sa prisiri foe na okasi te den e wai pasi gi den lagi gwenti foe grontapoe, kroektoe bribi, èn den sani di den e doe pasa marki; efoe den no e meki a trowfesa toeka nanga den theokrasia aktiviteit di den e doe doronomo; èn efoe den e sori bescheidenfasi na presi foe meki modo. — 15/4, bladzijde 26.

◻ San na den eigifasi foe wan sma di abi soifri retifasi?

Wan sma di abi soifri retifasi de foe froetrow, no soso gi en kompe libisma, ma moro prenspari, gi Gado. A soifrifasi foe na ati foe so wan sma de foe si na den sani di a e doe. A no abi hoigrifasi. A no e bidrigi noso e doe kroektoedoe (2 Korentesma 4:2). — 1/5, bladzijde 6.

◻ Foe san ede Jeremia ben taki: „A boen gi wan man di gosontoe èn tranga na skinfasi, taki a moesoe tjari a tjatjari na ini en jongoe jari”? (Kragisingi 3:27)

Te wan sma e leri fa foe kakafoetoe gi tesi ala di a jongoe, dan dati e jepi en foe tjari den moeilek problema di bigisma e kisi (2 Timoteus 3:12). Den winimarki foe getrowfasi foeroe moro leki iniwan froelekti gi wan sjatoe pisi ten, di ben kan kon te wi e skeki. — 1/5, bladzijde 32.

◻ San a de di Moses nanga Elia ben de foe si na ini a transfigurâsi fisjoen, ben prenki?

Na ini a kontekst foe a transfigurâsi, Moses nanga Elia ben de boen simbôl foe den salfoe brada foe Jesus. Dati den, èn so srefi Jesus, „ben sori densrefi nanga glori” ben prenki taki getrow salfoe kresten ben sa „kisi glori makandra” nanga Jesus na ini a seti foe a hemel kownoekondre (Lukas 9:30, 31; Romesma 8:17; 2 Timoteus 1:10). — 15/5, bladzijde 12, 14.

◻ San na a „santa kibritori” foe Gado? (1 Korentesma 2:7)

A „santa kibritori” foe Gado e poti prakseri na tapoe Jesus Krestes (Efeisesma 1:9, 10). Ma, a no de soso a sabi di sma e kon sabi soema na Jesus leki a pramisi Mesias. A wani taki wan hemel tiri, Gado en Mesias Kownoekondre, èn a wani taki so srefi a ròl di Jesus kisi na ini a prakseri foe Gado. — 1/6, bladzijde 13.

◻ Fa wan kresten moesoe si na owroe di a e kon moro owroe noso siki?

Na presi foe si den sortoe tesi disi leki sani di e tapoe a diniwroko foe en gi Jehovah, a moesoe si den leki wan okasi foe froetrow moro na tapoe en. A moesoe hori so srefi na prakseri, taki a waarde foe wan kresten e marki, no nanga o foeroe a e doe na ini a wroko, ma nanga a bribi foe en èn a dipi foe en lobi (Markus 12:41-44). — 1/6, bladzijde 26.

◻ Fa a gebroiki di Jehovah ben gebroiki libisma foe skrifi bijbel na presi foe gebroiki engel, e sori a bigi koni foe En?

Efoe libisma no ben abi wan prati srefisrefi foe skrifi bijbel, dan wi ben sa kan abi problema foe froestan a boskopoe foe bijbel. So srefi, bijbel abi a waran firi, den difrenti, èn a krakti di a abi tapoe sma te libisma skrifi en. — 15/6, bladzijde 8.

◻ San na a sroto gi wan kolokoe osofamiri?

A sroto de foe feni na ini a Wortoe foe Gado, bijbel, èn te wi e gebroiki den gronprakseri di de na ini, soleki a dwengi di wan sma moesoe dwengi ensrefi, na erken di wi moesoe erken na edeman-wroko, boen komunikâsi, nanga lobi. — 15/6, bladzijde 23, 24.

◻ Fa a betre di Jesus ben meki sma kon betre, ben de heri tra fasi foe den sani di den sma e doe di e froeklari taki den abi krakti foe dresi sma na ini a ten disi?

Den ipi sma no ben meki opo-opo èn Jesus no ben rigeri na wan fajafaja fasi. Boiti dati, noiti a ben de so, taki Jesus no ben man dresi den swakiwan foe di a ben gi falsi reide taki na ofrandi foe den na moni sei no ben bigi nofo, noso taki den no ben abi nofo bribi. — 1/7, bladzijde 5.

◻ Fa Jehovah jepi en pipel foe abi wan presi na ini a prakseri di a abi, di abi foe doe nanga en nen nanga en Kownoekondre?

Na a fosi presi, Jehovah gi en pipel a waarheid. A di foe toe, a ben gi den en santa jeje. Èn a di foe dri, wi abi wi bradafasi na heri grontapoe èn a seti di Jehovah orga foe anbegi en. — 1/7, bladzijde 19, 20.

◻ San na boenfasi?

Boenfasi na troetroe boen na moreel sei, boen-atifasi, reti doe nanga reti denki. A no wan eigifasi di no e doe noti, ma na wan positief eigifasi di e doe wan sani. Boenfasi wani taki moro leki foe tan farawe foe sondoe nomo; a wani taki foe feti na baka san boen (1 Timoteus 6:11). — 15/7, bladzijde 14.

◻ San na a moro prenspari goedoe di papa nanga mama kan gi den pikin foe den?

A moro prenspari goedoe na a eksempre di densrefi e gi ini a sori di den e sori lobi gi tra sma. Na wan toemoesi boen fasi, pikin moesoe si èn jere a papa nanga mama foe den e taki èn e sori na opregti lobi gi Gado, na ini ibri sani di den e doe. — 15/7, bladzijde 21.

◻ San na wan toe prenspari sani foe abi wan boen osofamiri studie?

Wan osofamiri studie moesoe doe doronomo. Joe moesoe ’bai ten’ gi a studie (Efeisesma 5:15-17). Meki a ten te oenoe e studeri de wan sani di e meki den pikin kon de nanga faja foe di joe e meki a bijbel kon na libi. Efoe den pikin moesoe prisiri nanga a studie, dan den moesoe abi a firi taki a abi foe doe nanga den. — 1/8, bladzijde 26, 28.