2000—¿A De wan Aparti Yari?
¿A YARI 2000 na wan spesrutu yari? Moro furu sma di e libi na ini den Westsei kondre e si en leki a fosi yari fu a di fu dri pisi ten fu dusun yari. Sma bigin sreka bun furu sani fu hori fesa gi en. Den e poti bigi elektrik oloisi fu teri den sekonde te leki a nyun pisi ten fu dusun yari doro. Bigi Dansi gi Nyun Yari e orga. Wenkri na ini den pikin foto, so srefi bigi wenkri na ini den bigi foto, e seri ipi-ipi bosroko pe den skrifi sani na tapu di e taki fu a kaba fu a pisi ten disi fu dusun yari.
Bigi kerki nanga pikin kerki, o teki prati tu na fesa di sma o hori a heri yari langa. Na a bigin fu a yari di e kon, sma e fruwakti taki Pawsu Johannes Paulus II o go na Israèl fu de fesiman fu wan fesa di den Lomsu Katoliksma sa hori èn di den e kari „a Lomsu Katolik Kerki fesa di den e hori ibri tutenti na feifi yari èn di sa hori now na ini a nyun pisi ten fu dusun yari”. Den denki taki so wan tu nanga afu milyun te siksi milyun fisitiman, fayafaya anbegiman, so srefi den sma di wani sabi sani nomo, o fisiti Israèl a yari di e kon.
Fu san ede someni sma abi na prakseri fu fisiti Israèl? Roger Cardinal Etchegaray, wan heihei man na a Vatikan di e taki gi pawsu, ben taki: „A yari 2000 na wan gran fesa fu Krestes nanga a libi fu en na ini a kondre disi. Dati meki a de wan gewoon sani taki a Pawsu o kon dya.” San a yari 2000 abi fu du nanga Krestes? Moro furu sma e denki taki a yari 2000 abi soifri den 2000 yari na ini di yu e teri sensi a ten di Krestes gebore. ¿Ma dati de so? Wi sa si.
A yari 2000 de moro prenspari srefi gi memre fu son relisi grupu. Den e bribi taki na ini a yari di e kon, Yesus sa drai kon baka na a Olijfbergi, èn a feti fu Armagedon di a buku Openbaring e taki fu en sa feti na ini a lagi presi fu Megido (Openbaring 16:14-16). Fu di hondrohondro sma di e libi na Amerkankondre e fruwakti taki den sani disi o pasa, meki den e seri den oso fu den èn moro furu fu den sani di den abi èn den e froisi go na Israèl. ¡Sma e taki dati wan prenspari domri fu Amerkankondre pramisi den sma di no man gowe libi den oso, taki a sa bariwroko na tapu telefisi — na ini kloru — te Yesus drai kon baka!
Na ini den Westsei kondre, sma e sidon prakseri nomonomo fa den o bigin a di fu dri pisi ten fu dusun yari. Ma sma na ini tra kondre e du san den gwenti du ala dei. Den sma disi — a moro bigi pisi fu den sma di e libi na grontapu — no e bribi taki Yesus fu Nasarèt ben de a Mesias. Èn den no e bribi tu na ini a fasi fa sma e bereken a kalender nanga yepi fu ’bifo Krestes’ nanga ’Anno Domini’.a Fu eksempre, furu Moslimsma e gebroiki den eigi kalender, èn disi e sori taki a yari di e kon sa de 1420 — no a yari 2000. Moslimsma e bigin teri den yari fu sensi a ten di a profeiti Mohammed ben lowe fu Mekka go na Medina. Fu taki en leti, sma na heri grontapu e gebroiki so wan 40 difrenti kalender.
A yari 2000 musu taki wan sani gi Kresten? ¿A fosi dei fu yanuari 2000 trutru de wan tumusi prenspari dei? Den aksi disi sa kisi wan piki na ini na artikel di e kon.
[Futuwortu]
a Na ini a sistema di sma e gebroiki fu teri a kalender nanga yepi fu ’bifo Krestes’ noso ’Anno Domini’, den e kari den sani di pasa bifo a ten di sma taki dati Yesus ben gebore, den yari „b.Kr.” (bifo Krestes); den e kari den sani di pasa baka a pisi ten dati den yari „A.D.” (Anno Domini — „na ini a yari fu wi Masra”.) Ma son sabiman di sabi nofo, wani gebroiki a grontapu fasi fu kari en, „b.G.T.” (bifo wi Gewoon Teri) en „G.T.” (fu wi Gewoon Teri.)