Joe abi sari-ati gi sma?
1 Den e taki foe Jezus taki ’a ben abi sari-ati gi den sma’ (Matt. 9:36). A e firi na safoe lobifasi disi gi tra sma? (Matt. 9:36b, Kingdom Interlinear) O krakti disi e poesoe joe foe doe wan sani?
2 Efoe a oso foe joe buurman e bron èn a libi foe den de ini kefar, omeni horidoro joe o sori na ini joe moeiti foe miti den? (Matt. 22:39). Joe ben sa naki safri wán noso toe tron tapoe na fes’sédoro èn go baka na oso efoe no wan sma ben opo na doro? A no de foe taki dati joe o doe moeiti psa marki foe miti den èn foe jepi den foe den no lasi den libi! Nownow a libi foe den sma na ini na heri grontapoe de foe lasi. Foe na réde disi meki Jehovah ben sorgoe gi en boskopoe foe ferloesoe èn ben komanderi wi foe go na den sma èn tjari na boskopoe dati gi den, efoe den wani foe jere now ofoe no wani jere. — Ezech. 3:10, 11.
3 Ini wan moeiti foe miti ala sma meki wi moe teki prati na a oso foe oso wroko, èn dati moe doe na tapoe wan geregelde basis. Pionier morofoeroetron e teki aladé prati na a wroko disi. Foeroe foe wi e teki prati ibri wiki kaba na a oso foe oso wroko. Wi alamala moe poti leki marki na wi fesi someni leki wi kan foe teki prati na a wroko disi foe ferloesoe sma libi, moro spesroetoe na tapoe na fosi sonde foe a moen èn ooktoe na tapoe na di foe toe èn fo satra.
MITI IBRI SMA
4 Joe e poti na a préki foe na kownoekondre boskopoe na marki foe miti someni leki joe kan ibri sma? Son prékiman e teki prati na a oso foe oso wroko na mofoneti, foe di den e feni a den ten dati moro foeroe sma. Joe ben sa kan doe disi? Na ini na oso foe oso wroko joe e teki a okasi foe taki nanga sma di joe e miti na dorosé foe na oso? Foeroe boen bakapisi ben doe kon foe dati. Wan brada di a ben wroko oso foe oso ben si wan jongoe man e waka a strati. A brada foe wi waka go na en èn bigin wan takmakandra. Disi ben meki wan bijbelstudie kon. Na jongoe man go es’esi na fesi èn now a de wan actief prékiman foe na kownoekondre. — Tori. 13:48.
5 Nanga joe heri konsensi joe e go baka efoe wan sma no ben de na oso? Wan brada ben si dati foeroe foe den sma di no ben de na oso, pikinso ofoe noiti ben e kon a ini kontakti nanga na kownoekondre boskopoe. Te wi e miti den a e psa foeroetron dati den e sori warderi gi na wroko foe wi èn den e sori safrifasi. Joe ben teki na rai foe go fisiti baka den sma di no ben de, bifo joe gwe libi a gebied? (km 8/81, blz. 3) Prékiman di e doe disi e ferteri dati a di foe toe fisiti foe den, den e miti moro leki afoe foe den sma disi na oso. Na lobi nanga broko-ede foe wi gi tra sma moe poesoe wi foe tjari go baka foe proeberi foe opo bijbelstudie na den sma di e sori belangstelling. — Romeini 12:11.
6 Na ini na jari disi brada nanga sisa spesroetoe sa poti prakseri na a gebied di den no e wroko ala ten na ini. Joe ben sa man na a fasi disi foe gi jepi?
7 Kon wi taki now dati joe oso de e bron! Joe ben sa wani sote dati joe buurman ben horidoro foe naki joe doro foe warskow joe? Meki wi sori taki wi abi sari-ati gi trawan neleki Jezus, nanga den srefi sortoe firi gi trawan èn nanga wan firi foe a tranga fanowdoe foe a ten.