Meki moeiti foe kisi theocratis marki
1 Foe san-ede ibriwan foe wi moesoe poti theocratis marki na wi fesi? Wán gron de dati den gi wi dek’ati foe wroko moro tranga ini a dienst foe Jehovah. Paulus ben taki: „Na foe disi meki wi e wroko tranga èn wi e meki boen foeroe moeiti, bikasi wi ben poti wi fertrow na ini wan troe libi Gado, di de wan Jepiman foe ala sortoe foe sma, spesroetoe foe den getrowwan” (1 Tim. 4:10). Ija, wi e wroko tranga foe di wi wani kisi jepi gi wisrefi èn foe jepi trawan foe de getrow toe. Sortoe theocratis marki joe e feti foe kisi now?
MEKI MOEITI FOE KISI A LERI FOE GADO
2 Den difrenti sé foe na foeroetendienst de heri moi theocratis marki di wan sma ben sa kan poti en ati a tapoe. Ma san ben sa kan poeroe den sortoe marki disi ini na ati foe wan brada of sisa? Wan grontapoe héleri ben sa kan de wan gron, spesroetoe te a sma psa na middelbare skoro. Tapoe na fréda foe na „Kownoekondregro”-districtcongres na drama A leri foe Gado e tjari moro kownoekondre froktoe kon ben naki wi ati. Sondro degedege joe sa kan memre ete san ben de na sroto foe en: Na moro boen grontapoe leri di de no abi nowan enkri waarde efoe joe no e tan hori na joe jeje marki èn joe e go doro foe teki moro nanga moro a leri foe Gado ini joe! Joe ooktoe e si na afersi so?
3 Jezus ben aksi: „Bikasi sortoe winimarki a sa abi gi wan sma te a wini na heri grontapoe, ma a e lasi en sili?” (Matt. 16:26) Foeroe foe wi jongoewan e si fa a de sondro waarde foe feti baka grontapoe, materiële marki, san abi na ini toe wan hé grontapoe leri. Makandra nanga den papa nanga mama den kon kroederi taki den sortoe marki dati no warti den kefar di de na ini den. Den winimarki di den sortoe marki disi e tjari gi joe e go so langa leki na seti foe sani disi de ete, èn disi e lon go miti en volledig kaba. Wan finifini Gado-leri sa sreka wi na fesi foe feti na baka warti theocratis marki, soleki den difrenti sé foe na foeroeten-dienst, èn te foe kaba a e tjari go na a tégo jepi. — 2 Tim. 3:1-5, 14-17.
MARKI NA INI NA FOEROETEN DIENST
4 Foeroe papa nanga mama moe kisi gafa foe den jeje go na fesi di den ben meki den jari di ben psa. Wi ben kon si taki moro jongoesma e gi den kownoekondre afersi na fosi presi ini den libi. Tapoe na congres foe augustus nanga bigin september 40 sma teki dopoe foe soema a moro bigi pisi ben de jongoesma. Disi wani taki taki na nomroe foe den jongoewan di gi densrefi abra na Yehovah èn sori disi nanga jepi foe na dopoe ini watra, kon foeroe troetroe. Den abi na pionierdienst na prakseri? Gi soboen papa nanga mama leki gi den pikin a ben tjari foeroe winimarki foe feti baka den sortoe theocratis marki dati.
5 Wi alamala e prisiri foe di Jehovah e meki sani gro. Foe di na gro disi de, den na fanowdoe e kon moro bigi foe abi moro boekoe, sodati moro brada de fanowdoe tapoe Bethel. Ini a ten foe augustus 1977 te leki mei 1984 foe na wroko tapoe Brooklyn Bethel èn na Wachttorenboerderij a ben de fanowdoe foe meki 600 ekstra brada nanga sisa kon. Den brada nanga sisa disi no wawan ben tan hori den ai tapoe theocratis marki, ma den ben moesoe man de, soleki den hé markitiki na theocratissé ben e sori di den sma di wani kon ini aanmerking foe na troetroe aparti dienstgrani disi moesoe miti. A srefi de gi den sma di e meki moeiti foe kisi na Gilead-opleiding èn foe doe na zendingswroko.
JEPI JONGOEWAN FOE POTI MARKI GI DENSREFI
6 Papa nanga mama di e gebroiki den ferstan ben jepi den pikin jongoejongoe kaba foe poti theocratis marki na den fesi. Sonwan ben doe disi foe di den ben meki den pikin foe den kon miti nanga foeroeten-wrokoman èn den ben kisi winimarki foe na okasi foe teki opziener di e réis nanga den wefi, zendeling, Betheliet èn gewone pionier leki fisitiman ini den oso. Na a fasi disi den pikin kan si na prisiri foe den foeroeten-bedinari disi srefi. Foeroe foe den di e prisiri now ini wan heri boen libipasi ini na gewone pionierdienst, na Bethel-dienst, noso zendingsdienst e prakseri nanga prisiri foe na gesontoe demakandra disi di den ben abi ini den jongoedé. Meki den theocratis marki disi de wan geregelde pisi ini joe ibridé takmakandra nanga na osofamiri.
7 Den jongoewan foe wi moesoe abi wan realistis fasi loekoe tapoe jeje marki. Jepi den foe si den winimarki foe wan libipasi ini na foeroetendienst. Ini na kriboipisi foe na drama A leri foe Gado tapoe na districtcongres foe a dréten disi di psa den ben taki: „Efoe joe abi na firi foe poti bigi waarde na hé leri foe na grontapoe, prakseri dan disi, dati na tjari kon foe moro foeroe kownoekondre froktoe e aksi dati wi poti moro leki gewoon prakseri na a leri foe Gado.” Neleki Paulus papa nanga mama nanga jongoewan ini na kristen gemeente sa abi na faste wani foe teki na ’heri boen waarde foe na sabi foe Kristus Jezus’ na a joisti fasi (Fil. 3:7, 8). Gado leri sa gi wi dek’ati foe hori na wi fesi krinkrin theocratis marki.