Feni prisiri ini a meki kon moro bigi foe wi prijse gi Jehovah
1 Na ten di pasa ben de wan druk ten gi wi alamala, soboen na theocratis terrein leki na tra terrein. Osofamiri nanga pikinnengre di de na oso foe di den abi skorofakansi kande moesoe sorgoe foe spesroetoe frantwortoe foe sorgoe gi den. Wantoe foe den ben sa kan go foe wan ofoe toe moen na ini na jepi-pionierdienst. Na fakansi e gi foeroe foe wi wan kenki foe tempo èn dan san ben de ete ben de ala wroko na na sé foe na meki foe plan èn na fisiti foe na „Sma di e kibri den soifri-reti-fasi”-kongres.
2 Foe di a moen di e kon wi e go drai go baka na ini wi aladé routine a de na ten foe meki plan gi wi wroko ini den moen di didon na wi fesi. Na programma foe na kongres ben gi wi dek’ati foe meki wi Kownoekondredienst kon moro foeroe. Fa wi kan doe dati ini na njoen dienst-jari èn spesroetoe ini den moen di e kon?
3 O moro na dréten e pasa, wi kande e miti moro sma na oso. Te a weer switi dan kande dati e gi dek’ati foe abi moro langa dé ini a velddienst. Fa joe sa kan meki joe dienst-okasi kon moro foeroe ini a ten di de na wi fesi?
NA SKORO
4 Fa a de nanga oenoe jongoewan di de ete na skoro? Sondro degedege a skorojari di pasa joe ben kan gi kotoigi na kompe skoromati nanga den meester. Ma kande now joe abi tra meester nanga tra skoro mati. Den sabi taki joe de wan kotoigi foe Jehovah? Efoe dati no de so, dan joe sa wani foe taigi den disi na ini den fosi wiki foe na skorojari.
5 Efoe den grontapoefesa e kon baka, sonwan sa wani foe sabi foe san-ede joe no e teki prati na den. Meki boen gebroiki foe den gridi foe sabi sani èn den geest di opo foe di joe e gi den kotoigi. Kande den sa aksi joe foe hori wan takmakandra foe san joe ben doe na ini den moen di pasa. Ferteri den foe joe spesroetoe ondrofeni di joe ben kisi foe joe fisiti foe na districtskongres. Joe ben gi den njoen boekoe di joe ben kisi tapoe na districtkongres na den meester foe joe? Gebroiki disi foe gi den kotoigi noso ferteri trawan wan sani foe wantoe artikel di joe ben soekoe na ini Na Wachttoren nanga Ontwaakt! Foeroe foe wi brada nanga sisa ben jere na waarheid foe a fosi tron foe skoromati di ben de Kotoigi. Na skoro de troetroe wan terrein di kan meki boen froktoe foe joe kan meki joe Kownoekondredienst kon moro foeroe ini den moen di de na wi fesi.
DE WAN JEPI-PIONIER
6 Ini maart nanga april foeroe foe wi ben abi na grani foe abi prati na a jepi-pionierdienst. Joe ben prakseri efoe joe ben sa kan doe en baka na moen di e kon agen? Na ini oktober dréten de ete, november abi 5 satra èn ini december 5 sonde de nanga wantoe vrij dé foe den festidé di joe kan kisi foe skoro. Foe san-ede joe no sa bigin now kaba foe meki plan foe de wan jepi-pionier ini den moen disi. Den owroeman prisiri srefsrefi foe gi joe wan aanvraag formulier.
7 Kande den moen di e kon ete wantoe kenki kan kon ini joe persoonlek omstandigheden. Leki kristensma wi wani gebroiki den boen omstandigheden foe wi boen foe meki wi Kownoekondredienst kon moro foeroe. Disi sa gi wi persoonlek satisfaksi èn sa meki na prijse foe Jehovah nen kon moro foeroe.