Joe e ferstan a waarde foe en?
1 A ben de wan span momenti di na takiman tapoe na „Libi howpoe”-distriktcongres foe 1979 ben gi na njoen bijbelstudie jepi Mi boekoe nanga bijbeltori fri. Eri esi a ben kon a krin dati na boekoe disi ben gi na mogelijkheid foe leri na bijbel na jongoe sma èn na owroe sma. Bigisma ben prisiri foe sabi taki den tori ben de ini a volgorde leki fa den ben psa. Nanga disi foeroe sma ben kisi jepi foe kon sabi fa sani di pasa ini bijbel ben waka baka makandra.
2 Wán mama di a dri jari manpikin foe en di sani esesi ben e poeroe en prakseri, ben ferwondroe na wan switifasi dati a boi ben e studeri a boekoe rustig so wan 20 minuut. Heri esi disi ben tron wan gwenti gi en. Wan jongoe trowpaar ben bigin gi a manpikin foe den leri foe na Bijbeltori-boekoe sjatoe baka di den ben go studeri na bijbel. Di na osofamiri na wan okasi ben wani go njan, a boi ben wégri foe njan te leki den ben go begi.
3 Foe sensi na momenti dati na Bijbeltori-boekoe ben kon fri moro leki 8 jari psa kaba foe a fosi tron, dan moro leki 23 miljoen eksemplaar druk ini 66 tongo. Wi e ferstan a waarde foe na toemsi moi bijbel jepi disi èn wi de ini wan boen positsi foe pristeri en na ini januari nanga heri wi ati nanga sili na jongoe sma èn na owroe sma.
„LOEKOE!”-BROCHURE
4 Jehovah gi wi ini na kongres di psa ete wan diri kado ini na vorm foe na njoen brochure „Loekoe! Mi e meki ala sani kon njoen”. Wan sisa di de pionier ini Texas èn di e feni en moeilijk foe opo studie, ben skrifi no so langa psa kaba: „Te joe meki na ososma soso si na moi prenki tapoe na omslag, e taki foe en, e sori den tekst na ondro bladzijde 4 èn morofara e lési den fosi 4 paragraaf, dan joe opo wan studie kaba!”
DOE NA PRISTERI
5 Te joe e wroko ini joe birti, joe ben sa kan taki: „Leki wan foe den birtisma foe joe nanga ala prisiri mi ben sa wani joe abi wan prati ini a boen njoensoe foe wan pramisi di joe kan fertrow a tapoe, dati wani taki dati er’esi vrede sa de na a heri grontapoe. Joe no ben sa wani si dati? [Gi okasi foe piki.] Wi ben si alamala sortoe moeiti sma ben doe foe doro na marki disi. Ma loekoe pikinso soema na a sma leki fa a bijbel taki di sa tjari vrede kon di sa tan. [Lési Psalm 46:8, 9.] Te feti èn den sma di e meki disi go a fesi komopo kaba a pasi, dan Gado noiti moro sa gi pasi dati féjantifasi de na grontapoe. Wi e kisi a djaranti foe dati nanga den wortoe foe na skrifiman foe Psalm 72:7 di ben abi Gado jeje. [Lesi.] Den sma di Gado sa kibri foe libi tapoe wan vrede grontapoe, sa de den sma di ben leri sabi en èn dini en. Mi boekoe nanga bijbeltori ben jepi foeroe sma foe kon so fara. Mi abi na overtoigi taki joe sa kisi tranga srefsrefi te joe lési en. Na eksemplaar disi kan de foe joe foe wan pikinmoni foe soso f 5,00.”
6 Efoe na ososma abi na Bijbeltori-boekoe kaba ofoe a ben sa de wan sani di fiti moro foe pristeri na „Loekoe!”-brochure, dan joe kan gebroiki na rai di de na ini paragraaf 4. Ofoe joe ben sa kan sori na tapoe wan foe den edeprakseri ini na brochure di leki fa joe e si en ben sa kan abi na belangstellling foe na ososma. Na „Loekoe!”-brochure den ben meki spesroetoe foe opo njoen bijbelstudie. Te joe e meki na ososma soboen si foe sortoe tori den e taki na ini, poti dan ooktoe na prakseri na tapoe den aksi ondro na bladzijde, den tekst di skrifi èn den piki di abi na bijbel leki fundamenti na ini den paragraaf. Kande joe man foe opo wan bijbelstudie na a fosi fisiti foe joe.
7 Wi e gi tangi na Jehovah foe den santa Boekoe sodati „na sma foe Gado kan de bekwaam dorodoro, de srekasreka dorodoro foe ibri boen wroko” (2 Tim. 3:17). Wi de ooktoe grantangi foe den boekoe leki na Bijbeltori-boekoe èn na „Loekoe!”-brochure. Wi e ferstan a waarde foe en èn wi e prisiri dati wi kan pristeri den ini a moen januari na tra sma.