Studeri Mi boekoe nanga bijbel tori
1 Wi sa studeri Mi boekoe nanga bijbel tori, tapoe den gemeente boekoestudie. Foe di a boekoe meki pikinso trafasi leki tra boekoe di wi ben studeri, wan toe tirilin sa de wan jepi.
2 Foe di a boekoe no abi bladzijde nomroe, a schema di o kon ini Wi Kownoekondre Dienst sa sori den kapitel di moesoe studeri, foeroetron toe kapitel ibri wiki. Baka te wan bekwaam brada leisi a heri kapitel, a studieleider sa poti aksi di abi foe doe nanga a kapitel di den ben leisi di djonsrode. Sjatoe nanga wantewante piki moesoe gron tapoe a materiaal ini den les.
3 Baka dati, efoe ten e gi pasi foe dati, ala den tekst di skrifi na a kaba foe a kapitel, moesoe leisi. Langa bijbel leisi pisi kan prati ini moro pikin pisi so taki difrenti preikiman kan abi prati ini a leisi, èn baka dati piki kan gi tapoe san den ben leisi. Wantewante aksi di a studieleider ben sreka na fesi sa jepi foe gi piki, di wani taki wan sani, di e sori fa den tekst di ben leisi abi foe doe nanga san den ben taki krin ini a boekoe. Ala den aksi nanga piki moesoe jepi den wan di e fisiti, foe poti prakseri tapoe den troe tori di ben teki foe bijbel, a moro prenspari boekoe foe grontapoe.
4 Mi boekoe nanga bijbel tori e gi joe a historia foe grontapoe foe a ten di Jehovah ben bigin meki sani te leki ini a ten disi. Den tori di skrifi na a fasi so leki fa sani ben pasa ini historia baka makandra, e froeteri srefi san Gado pramisi foe doe ini a ten di o kon. Den ben prati den 116 bijbel tori ini aiti pisi. Na a bigin foe ibri pisi den e froeteri sjatoe san joe kan feni ini a pisi dati. Dati meki, joe moesoe de seiker foe taki foe den toemoesi moi kloroe prenki di de ini a boekoe.
5 A fosi wiki wi sa taki so srefi foe na inleiding foe a boekoe. Baka te wi leisi den paragraaf, a studieleider sa poti aksi di fiti di en ben sreka na fesi. A marki foe abi boen bakapisi foe behandel a stof, sa didon moro foeroe na a sreka di ala sma di e fisiti a boekoestudie sreka densrefi boen na fesi. Spesroetoe a studie leider moesoe sreka boen na fesi ibri wiki, so taki a kan jepi a groepoe foe kon sabi san a boekoe disi e froeteri foe sma foe bijbel nanga den sani di den ben doe. A sa sori so srefi a prenspari howpoe foe têgo libi na wan paradijs grontapoe di Gado ben gi na libisma.