Meki wan inleiding di e wiki a belangstelling foe sma
1 A Waktitoren nanga Ontwaakt! de wan jepi foe prani den siri foe waarheid ini a froestan nanga ati foe den leisiman. Dati ede, wi wani kweki fasi di e gi boen bakapisi, so taki wi kan kisi den tijdschrift disi ini den oso foe sma di kan njanboen foe den jeje goedoe di de na ini den.
2 Fa wi kan boeweigi ososma foe teki èn leisi den tijdschrift foe wi? Foeroe e anga foe a fasi fa wi e tjari den ondro na prakseri foe sma. Toemoesi moi idea foe sreka joesrefi boen tapoe inleiding, joe kan feni ini a Taki-go-taki-kon boekoe, bladzijde 9-15.
3 Te joe e pristeri A Waktitoren foe 1 oktober, kande joe kan proeberi foe gebroiki a di foe dri idea ondro „Sani di e feni presi now” na bladzijde 9 èn 10 foe a Taki-go-taki-kon boekoe.
Baka te joe taki soema na joe, joe kan taki:
◼ „Efoe joe ben mag taki sortoe wan foe den foeroe problema di de na grontapoe now, joe ben sa wani taki den loesoe fosi, sortoe wan joe ben o teki?” Arki san a ososma e piki èn agri nanga den broko ede foe en. Dan joe kan go doro foe taki wan sani leki: „Loekoe san bijbel e gi leki loesoe foe den sortoe problema disi. [Leisi Jesaja 9:6, 7]. So boen, a troetroe loesoe gi ala den problema foe libisma, didon ini a reti tiri foe na Mesias, Jesus Krestes.” Dan drai go na bladzijde 8 èn poti a sma prakseri tapoe den dri lasti paragraaf foe na artikel „A Mesias — Wan troe howpoe?”
4 Toe tra inleiding di joe kan gebroiki nanga A Waktitoren foe 1 oktober, joe kan feni tapoe bladzijde 14 foe a Taki-go-taki-kon boekoe, ondro „Wroko/Tanpresi”. Joe kan taki foe den prakseri èn den piki disi nanga joe eigi wortoe noso taki baka nomo san den e taki ini a Taki-go-taki-kon boekoe. Baka te joe agri nanga a piki foe a sma, go doro foe prati a toemoesi moi penti foe san den e taki ini a fosi paragraaf na bladzijde 4 ondro „Loesoe no de?” Dan te joe e leisi Jesaja 65:21-23, sori go tapoe den blesi di a tiri foe a Mesias sa tjari gi wi.
5 Efoe joe e gebroiki Ontwaakt! foe 8 oktober di e taki foe „Joe kan wini den negatief firi”, kande joe kan proeberi na di foe dri inleiding ondro na edeprakseri „Libi/Kolokoe” na bladzijde 12 foe a Taki-go-taki-kon boekoe. Baka te joe e taki foe Psalm 1:1, 2, joe kan poti prakseri tapoe wan penti ini na Ontwaakt!, di e fiti.
6 Joe sa miti kande nanga ososma di e taki dati den abi den eigi kerki boekoe. Joe kan froeteri taki wi abi boekoe toe di wi e gebroiki gi wisrefi (so leki Wi Kownoekondre Dienst); tokoe, miljoenmiljoen sma di no de Jehovah Kotoigi e leisi den tijdschrift foe wi. De seiker taki a sma abi opregti belangstelling, bifo joe o pristeri en wan abonnement. Wan traktaat kan de nofo efoe a sma no abi someni belangstelling.
7 Paulus ben taki na 1 Korentesma 3:6: „Mi prani, Apolos ben gi watra, ma na Gado ben tan meki a gro.” Efoe wi wani taki Jehovah e meki den siri foe waarheid gro ini den ati foe den sma di ben sori belangstelling, wi moesoe poti prakseri tapoe a prani foe den siri disi na wan fasi di e gi boen bakapisi, foe di wi e gebroiki inleiding di e wiki na belangstelling foe sma.