Meki trawan kon de fajafaja foe loekoe heri boen na Jesus
1 A moro bigi man di oiti ben libi de wan toemoesi moi boekoe. Den 133 kapitel kan meki taki leisiman e kon de fajafaja foe poti dorodoro prakseri na Jesus tapoe èn abi krakti tapoe den foe go doe akroederi na eksempel di en ben gi. Den ben taki krin foe en taki ala den kownoe di oiti ben tiri, alamala poti kon na makandra, no ben abi so wan bigi krakti tapoe a libi foe libisma na a grontapoe disi leki fa Jesus abi dati. Den sma di e loekoe heri boen na Jesus, seiker sa njanboen foe dati.
2 Jesus ben leri den disipel foe en foe en Tata èn a ben gi wan eksempel foe den toemoesi moi eigifasi foe Gado. A e naki wi ati efoe wi e loekoe a toemoesi moi eigifasi foe Jesus leki leriman, en fasi foe tiri sondro frede, èn en safoe sari-atifasi. Te wi e denki foe a pina di a ben moesoe pina di a ben gi en libi foe froeloesoe wi, dan dati e foeroe wi nanga warderi! A moro bigi man di oiti ben libi, kan jepi sma foe si Jesus na a fasi disi.
3 Sreka joesrefi dorodoro: Sreka joesrefi dorodoro so taki joe kan bigin wan bijbel takimakandra di sa meki trawan kon de fajafaja foe go poti dorodoro prakseri na Jesus tapoe. Osofamiri nanga trawan kan oefen nanga makandra. Feti na baka foe wiki a belangstelling èn foe kisi sma so fara foe leisi a Bigi man-boekoe. A kan taki moro leki wan takimakandra de fanowdoe nanga wan sma, foe doe disi. Efoe a sma no e sori someni belangstelling a fosi leisi, wi kan libi wan traktaat noso kande wan brochure noso wan tijdschrift a baka.
4 Den takimakandra foe wi di wi o hori oso-foe-oso ini a moen december, sa go spesroetoe foe Jesus èn sa gi sma deki-ati foe den leri sabi en moro betre. Foe taki foe prakseri di skrifi ini a Bigi man-boekoe, wi kan jepi sma foe den si Jesus, no wawan leki wan sma ini historia, ma leki a Manpikin foe Gado di e tiri leki Kownoe foe a tiri di sa loesoe ala den problema foe libisma.
5 So leki fa den ben poti krakti na tapoe ini Wi Kownoekondre Dienst a moen di pasa, wi wani gebroiki den poeblikâsi foe wi na wan konifasi. Fa wi kan si efoe wan sma abi opregti belangstelling? Efoe a sma e arki boen, e poti aksi, noso e poti spesroetoe prakseri tapoe san wi e leisi ini bijbel, dan disi kan sori na tapoe taki a sma abi opregti belangstelling. Sontron a ososma e taki, dati a e warderi den fisiti foe wi noso e taki, dati a ben prisiri foe leisi den tijdschrift foe wi. Efoe wi e sori a boekoe èn a e loekoe en wantewante noso e aksi fa a kan kisi wan, disi e sori taki a abi opregti belangstelling. Efoe a belangstelling dati no de krin foe si, wi kan libi wan traktaat, poti wan aksi foe kan abi wan takimakandra bakaten, èn seti sani foe go baka. Te wi e go baka, wi kan si moro boen omeni belangstelling a abi. — Loekoe Wi Kownoekondre Dienst foe mei 1990, bladzijde 6.
6 Wan sma di no lobi foe leisi ala ten, ben sori warderi gi a Bigi man-boekoe èn ben taki, dati a boekoe ben meki taki leisi ben tron wan sani di ben gi foeroe prisiri na a kaba foe en dei. Meki wi jepi trawan foe firi a srefi fasi, èn doe ala moeiti foe meki trawan kon de fajafaja foe loekoe heri boen na Jesus foe di den e leisi A moro bigi man di oiti ben libi nanga opregti belangstelling.