Jongoewan—tiri den stap foe joe na wan konifasi
1 Wi Tata, Jehovah, abi persoonlek belangstelling gi a go na fesi na jeje sei foe den jongoe sma. Foe di den jongoewan e arki nanga koni na den lobi komando foe en, den no wawan e meki en ati breiti, ma den e feni kowroe ati toe gi den sili (Odo 27:11; Mat. 11:28-30). Den e gi Jehovah na okasi foe gi koni tiri gi den foetoe stap foe den—Odo 16:9.
2 Krestes Jesus ben poti wan eksempre ini en jongoejari leki wan sma di Gado nanga libisma ben feni boen (Luk. 2:52). Jongoewan ini a ten disi moesoe span densrefi foe doe a srefi. A koni tiri foe den stap foe wan jongoesma moesoe de foe si ini a feti di a e feti baka jejesani. Di Jesus ben abi 12 jari, sma ben kon sabi en foe en lostoe di a ben lostoe foe taki nanga trawan foe Jehovah (Luk. 2:46, 47). Jongoesma ini a ten disi ben sori a srefi lostoe disi, foe froeklari den bribi gi trawan.—w90 1/7 blz. 29-30; w87 1/12 blz. 21 (Bakratongo).
3 San jongoewan kan doe nownow kaba èn spesroetoe ini den vakansi moen di e kon, foe „gi Jehovah grani nanga oenoe warti sani”? (Odo 3:9) Foe san ede joe no meki a joeroe di joe gwenti foe wroko ini a preiki wroko nanga a gi foe leri foe a boen njoensoe, kon moro foeroe, èn kande srefi leki wan jepipionier? Joe kande sa froewondroe nanga a kon moro foeroe foe joe prisiri èn tra wini, foe di joe e abi wan moro bigi prati ini a diniwroko. Disi sa gi joe so srefi na okasi foe wroko ini a velddienst nanga wan moro bigi nomroe foe difrenti preikiman. Joe ben sa man foe bigin nownow, foe di joe e kari wan noso toe preikiman di abi ondrofeni, foe wroko nanga joe a weekend disi.
4 Papa nanga mama kan gi foeroe deki-ati nanga jepi na den pikin foe den nanga jepi foe praktis konmakandra boiti taki den e go nanga den ini a diniwroko. Tra lepi wan ini a gemeente kan teki fesi foe di den e aksi jongoewan, foe go nanga den ini na oso-foe-oso-diniwroko nanga ini a gobaka nanga bijbelstudie wroko. Krosibei demakandra nanga den preikiman disi di de tranga na jeje sei, sa bow den jongoewan èn jepi den foe „tan go doro foe tron lepi sma”.—Hebr. 6:1.
5 A de fanowdoe gi ibriwan kresten sma foe meki a eigi fasi foe gi leri, kon moro boen. Jongoewan de na ini toe. Oenoe jongoewan, joe e sreka den toewijzing finifini di den e gi joe leki wan grani foe hori na a Theokrasia Diniwroko Skoro? Joe abi wan geregeld schema foe leisi èn foe persoonlek studie, so srefi foe meditatie? Joe e gebroiki a materiaal, di joe ben loekoe, wante wante gi joesrefi? Joe e sreka joesrefi boen gi den konmakandra so taki joe sa froestan a materiaal krinkrin èn de klariklari foe gi piki? Joe e poti prakseri na den penti di kan jepi joe, di den ben taki foe den na den konmakandra èn joe e proeberi foe gebroiki den prakseri di den ben taki foe den ini Wi Kownoekondre Dienst?
6 No meki den okasi foe abi wan prati ini a krin foe a Kownoekondrezaal pasa èn foe jepi den owroe noso swaki brada nanga sisa, nanga den oso wroko noso ini tra praktis fasi. No misi foe poti joe eigi friwanigi foe jepi sorgoe gi den paiman foe a Kownoekondrezaal èn gi a wroko foe a genootschap na heri grontapoe.
7 Efoe wi ’kibri oensrefi akroederi a wortoe foe Jehovah’ èn gi en pasi foe tiri wi stap, dan en sa tjari wi go na kolokoe èn gi moro foeroe grani foe dienst.—Ps. 119:9.