Kisi wini dorodoro foe a theokrasia diniwroko-skoro
1 A theokrasia diniwroko-skoro ben de wan jepisani foe leri wi foe abi a „koni foe gi leri” so taki wi kan tjari den bijbel waarheid gi trawan na wan boen fasi (2 Tim. 4:2). Ibri wiki wi e kisi inzicht di abi waarde, ini difrenti bijbel tori. Fa wi kan de seiker taki wi e kisi foeroe wini foe a prenspari leri di a skoro disi e gi?
2 Poti boen prakseri tapoe den bigin komentaar foe a skoro-opziener te a e poti krakti na tapoe wan toe foe den moi penti di joe kan leri na a ten foe a konmakandra. Prakseri foe iniwan aksi di a e poti kande èn fa joe kan gebroiki den piki ini joe diniwroko.
3 Na instruktielezing a no soso wan sjatoe loekoe baka foe a materiaal di skrifi ini a boekoe. A e poti prakseri tapoe a praktis waarde foe a bodoi èn fa joe persoonlijk kan kisi wini. Te joe e sreka joesrefi na fesi, dan dati sa jepi joe foe poti ala joe prakseri moro betre tapoe den moro prenspari penti èn foe teki prati na a overzicht foe aksi-nanga-piki di e kon baka dati.
4 Foe leisi na alawiki bijbel leisiprograma doronomo kan meki joe froestan a Wortoe foe Gado moro boen. Te joe e ondrosoekoe sani moro fara, dan dati kan tjari wan lo njoen finifini tori kon na krin, di e hari joe prakseri, so taki joe kan froestan a waarheid moro boen. Te den edepenti foe a bijbel leisipisi e hori, a de moro leki foe taki nomo foe a bijbel tori. Baka wan sjatoe algemeen overzicht, dan a takiman sa poti krakti na tapoe den prenspari penti foe a pisi di ben moesoe leisi èn a sa sori fa den abi foe doe nanga a libi nanga na anbegi foe wi. Arki boen so taki joe kan leri fa joe kan fiti den leri foe bijbel moro boen ini joe libi. — Ps. 119:105.
5 Efoe joe kisi a toewijzing foe hori wan oefenlezing, poti prakseri dan tapoe a penti tapoe a raibrifi di joe moesoe wroko na en now. Leisi den rai di gi ini a Handleiding-boekoe, di abi foe doe nanga a penti dati, èn doe moeiti foe gebroiki den. Te joe e teki materiaal gi joe lezing, proeberi dan foe poti krakti tapoe penti di sa de praktis ini a velddienst. — sg bladzijde 96-99.
6 Efoe joe na wan sisa di kisi a toewijzing foe hori lezing No. 3 noso lezing No. 4, proeberi dan foe pristeri a materiaal na wan fasi di de praktis. Kande na ososma e agri noso no e agri nanga alasani di joe e taki; doe moeiti foe sori fa joe ben sa jepi a sma foe taki-go-taki-kon nanga jepi foe den bijbel gronprakseri (sg bladzijde 153-158). Disi e jepi den arkiman foe si fa foe handri nanga sosortoe gens-taki di den e miti ini a velddienst. Sreka joesrefi boen na fesi, langaten bifo joe e hori a lezing, èn seti sani foe oefen froekoe nanga na ososma foe joe. A no moesoe de fanowdoe foe oefen baka te a konmakandra bigin.
7 Den studenti di o hori wan lezing e kisi a deki-ati foe sidon na fesisei ini a zaal. Disi e meki taki wi e wini ten èn a e meki a skoro opziener man gi den komentaar foe en na wan moro persoonlijk fasi. Ala sma kan kisi wini foe den spesroetoe rai di a e gi na wan switifasi, èn di abi den gron tapoe a Handleiding-boekoe. A no abi foe hori ensrefi na den penti so leki fa den skrifi a wan baka a trawan tapoe a raibrifi; a sa teki wan penti tapoe a raibrifi di e anga foe san joe abi fanowdoe nownow, so taki joe kan go na fesi moro boen.
8 Ala den sani disi na boen reide gi wi foe sreka wisrefi gi a theokrasia diniwroko-skoro èn foe fisiti en ibri wiki. Den rai di wi e kisi kan jepi wi foe de koni èn foe de bekwaam ini wi diniwroko. — Odo 1:5.