Mi abi foe kenki ala leisi?

Ibri eksemplaar foe Wi Kownoekondre Dienst e gi wi difrenti fasi foe pristeri di gron tapoe bijbel, di wi kan gebroiki te wi e gi kotoigi. Foeroe preikiman di de aktief, de fajafaja foe kisi njoen idea èn foe gebroiki difrenti fasi foe bigin wan takimakandra. Wi Kownoekondre Dienst e jepi den, foe di a e gi difrenti idea ibri moen.

Ma, a kan de so taki joe no e firi taki a de fanowdoe foe kenki san joe e gebroiki. Kande joe abi soso wan toe joeroe ibri moen foe teki prati na a oso-foe-oso-wroko. Baka wan pisi ten a kan de so taki joe ben meki difrenti pristeri di joe e feni makriki, èn joe abi boen bakapisi foe di joe e gebroiki den. Kande joe e froetrow tapoe wan toe tekst di wi e gebroiki foeroe, so leki Psalm 37:9-11, 2 Petrus 3:13, Openbaring 21:4, nanga trawan. Efoe a de so, dan joe no abi foe firi froeplekti foe kenki foeroetron go na wan tra sani. A moro prenspari marki foe wi na foe prati a Kownoekondre howpoe nanga trawan èn foe jepi den foe kon sabi san den moesoe doe foe kisi a blesi foe Jehovah. Efoe joe feni pristeri ini a Taki-go-taki-kon-boekoe di fiti èn di e hari sma, di joe e froekisi foe gebroiki èn di joe e feni boen bakapisi nanga den, no degedege dan foe gebroiki den.