Kweki belangstelling na den gobaka
1 Heri boen, sma ben teki a diniwroko gersi nanga a prani di wi e prani, èn den ben teki a tjari di wi e tjari gobaka, gersi nanga a kweki di wi e kweki prani èn a gi di wi e gi den prani watra (Mat. 13:23; Luk. 10:2; 2 Kor. 9:10). Leki „kompe-wrokoman foe Gado”, wi de froeplekti foe jepi ibri njoen siri di bigin gro, foe gro moro fara èn gi froktoe (1 Kor. 3:6, 9). Fa na a moro boen fasi foe doe dati?
2 No draidrai foe tjari gobaka na ala presi pe joe feni belangstelling. Loekoe joe oso-foe-oso raport baka, èn teki wan bosroiti soema joe sa fisiti èn foe san joe sa taki makandra. Foeroetron a tori di joe o taki, sa abi foe doe nanga san joe ben taki na a fosi fisiti. Foe di joe abi tra tekst na prakseri di joe kan tjari kon na fesi, dati meki joe moesoe foe man kenki makriki. Foe di joe e erken a krakti foe bijbel foe doro na ati foe sma, dati meki ala ten a boen foe gebroiki bijbel. — Heb. 4:12.
3 Efoe joe ben libi a brochure „Bekommert God zich werkelijk om ons?” („Gado e broko en ede troetroe nanga wi?”), dan joe kan bigin foe taki so wan sani:
◼ „Foeroe opregti sma e bribi taki Gado sa pori a grontapoe disi, ala di trawan e frede taki na libisma srefi sa doe dati. San joe e prakseri? [Gi okasi foe piki.] Bijbel e taigi wi, dati na presi foe pori grontapoe, Gado sa poeroe den onregtfardikifasi, èn meki grontapoe tron wan presi pe vrede nanga seikerhèit de.” Poti prakseri tapoe bladzijde 22, èn leisi Odo 2:21, 22, di skrifi drape. Efoe a sma abi belangstelling, dan tjari kon na krin den sani di wi seti gi oso-bijbelstudie noso pristeri den lasti tijdschrift, èn meki mofo foe go baka foe taki moro fara foe a njoen grontapoe di Gado pramisi.
4 Efoe joe ben libi a „Zie!” („Loekoe!”) brochure, dan joe kan taki:
◼ „Na mi fosi fisiti, wi ben leisi ini bijbel foe a pramisi foe Gado foe meki grontapoe kon tron wan paradijs, neleki fa a de foe si dja na fesisei foe a brochure di mi ben libi gi joe. Wi kan njan boen foe den blesi disi, foe di wi e leri moro sani foe a wani foe Gado èn fa a abi foe doe nanga wi.” Leisi Johanes 17:3, èn baka dati go na paragraaf 52 nanga 53, tapoe bladzijde 27. Taki sjatoe foe san ede sma moesoe kisi wan soifri reti sabi foe Gado Wortoe.
5 Te joe e go baka, baka di joe libi a „Doel van het leven” („Marki foe a libi”) brochure na wan sma di sabi sani foe relisi, dan joe kan si taki a fiti foe taki:
◼ „A no abi misi taki joe ben begi a begi foe Masra foeroetron. Osortoe sani joe e prakseri te joe aksi foe meki Gado Kownoekondre kon?” Baka a piki foe na ososma, sori go tapoe paragraaf 8 nanga 9 tapoe bladzijde 26, èn baka dati leisi Danièl 2:44. Kande joe kan go moro fara nanga a takimakandra, foe di joe e tjari kon na krin taki a kon di a Kownoekondre foe Gado sa kon, sa tjari wan kaba kon na ogridoe nanga njan pina. Sori a tapoe taki efoe wi de regtfardiki na ini na ai foe Gado, dan wi kan njan boen foe têgo libi na ini a paradijs na grontapoe.
6 Memre taki wan gobaka kan tjari na ibri sma di ben wani arki, a no abi bisi efoe wi ben libi tijdschrift na baka noso wi no ben libi tijdschrift na baka. Proeberi foe poti ten tapoe joe schema foe tjari gobaka ibri wiki. Jehovah sa blesi a moeiti di joe e meki foe kweki belangstelling, na presi pe joe e feni dati. Meki a gi froktoe, so taki sma sa prèise en. — Joh. 15:8.