Go baka na ala sma pe joe ben libi brochure na baka
1 Na apostel Paulus ben prèise den Filipisma, foe di den ’ben meki a fasi fa den ben denki kon njoen baka gi a boen foe en’ (Fil. 4:10). Efoe wi e gebroiki na eksempre foe den leki wan model gi a velddienst, dan wi sa ’meki a fasi fa wi e denki kon njoen baka’ gi a boen foe den wan di wi e gi kotoigi èn dati sa boeweigi wi foe go baka na den.
2 Efoe joe ben libi a brochure „Na Tiri Di Sa Tjari Na Paradijs Kon” na baka, dan joe ben sa kan taki wan sani leki disi:
◼ „Mi ben prakseri foe a takimakandra di wi ben abi a leisi di pasa, èn toe bijbel tekst ben kon na mi prakseri di mi ben sa wani foe taki foe den nanga joe. Kande joe e memre taki wi ben taki foe a teki di Gado sa teki a tiri foe grontapoe abra. Na ini bijbel, Jehovah Gado pramisi taki disi sa pasa. [Leisi Danièl 2:44.] Joe e bribi taki disi sa pasa troetroe? [Gi okasi foe piki.] Arki san Gado e taki foe a makti di a abi foe meki den pramisi foe en kon troe. [Leisi Jesaja 55:11.] Dati no moesoe gi wi tranga foe froetrow tapoe a Kownoekondre foe Gado? Ma, oten Gado sa meki den pramisi foe en kon troe?” Sori taki joe sa gi piki tapoe na aksi dati a tra leisi te joe kon baka.
3 Joe ben sa kan bigin na a fasi disi te joe go baka na wan sma di ben teki a brochure „Wanneer iemand die u dierbaar is, sterft” (Te wan sma di joe lobi, dede):
◼ „Foe di mi prakseri foe a takimakandra di wi ben abi foe a lasi di sma e lasi wan sma na ini dede, meki mi ben meki spesroetoe moeiti foe kon baka na joe.” Sori a prenki tapoe bladzijde 30 ala di joe e taki: „Joe e memre a prisiri situwâsi disi foe sma di ben kisi wan opobaka èn di ben kon makandra baka nanga den lobiwan foe den? Mi ben aksi joe pe disi sa pasa, na hemel noso na grontapoe. Kande joe ben feni a piki di bijbel e gi tapoe bladzijde 26 foe a brochure disi.” Taki foe den ede penti na ini a di foe dri paragraaf te nanga a di foe feifi paragraaf, èn leisi Johanes 5:21, 28, 29. Efoe ten de ete, dan leisi iniwan foe den tra bijbel tekst tapoe a bladzijde.
4 Joe ben opo wan studie nanga a brochure „Zie! Ik maak alle dingen nieuw” (Loekoe! Mi e meki ala sani kon njoen)? Te joe go baka, dan joe ben kan doe disi:
◼ Sori go tapoe bladzijde 30 baka, èn poti prakseri na tapoe na aksi: „Na sortoe fasi bijbel de prenspari srefisrefi? Go na bladzijde 3 nanga 4, èn loekoe paragraaf 1 te nanga 4, so srefi toe a prenki tapoe a kafti foe a brochure. Leisi wan noso toe bijbel tekst di skrifi na ini a foetoewortoe foe paragraaf 4. Tjari kon na krin taki bijbel na a wan-enkri boekoe di e gi so wan toemoesi moi howpoe. Meki mofo foe go baka wan tra leisi. Baka a di foe dri fisiti, efoe a gersi taki a studie sa go doro, dan joe kan poti tapoe joe velddienst raport taki joe abi wan njoen bijbel studie!
5 Joe ben sa kan go doro nanga wan takimakandra foe a brochure „De goddelijke naam die eeuwig zal blijven bestaan” ( A nen foe Gado di sa tan foe têgo ), na a fasi disi:
◼ „A leisi di pasa, mi ben man sori joe a nen foe Gado na ini bijbel. A sabi di wi sabi a nen foe Jehovah èn a gebroiki di wi e gebroiki a nen foe en, na wan prenspari pisi foe wi anbegi.” Opo bladzijde 31, loekoe den ede penti na ini den lasti fo paragraaf, èn leisi Johanes 17:3 nanga Mika 4:5. Sori taki wi e gi bijbel studie di kan sori fa Gado en nen sa kon santa na wan fasi di fiti èn fa wi kan njan boen foe den blesi foe wan paradijs grontapoe.
6 So boen, meki a fasi fa joe e denki kon njoen baka, gi a boen foe den wan di joe e miti. Horidoro na ini a go di joe e go baka, èn sreka joesrefi na fesi, so taki joe kan abi wan boen sani foe prati nanga trawan. Joe kan de wan sma „di troetroe e gi froktoe” na ini a meki di wi e meki njoen disipel.—Mat. 13:23.