A wortoe foe a Kownoekondre—Froestan san a wani taki
1 Ini Jesus en agersitori foe a saiman, A ben taki dati a siri di ben e fadon na tapoe „boen gron” ben prenki „a sma di e jere a wortoe èn di e froestan san a wani taki” (Mat. 13:23). Baka di wi jere foe a Kownoekondre, wi „froestan san a wani taki”? O foeroe krakti a abi na tapoe wi libi? Wi poti Kownoekondre afersi na a fosi presi, èn na so wan fasi wi e tjari kon na krin taki wi ben froestan san a boskopoe wani taki?
2 Efoe wi wani foe froestan a Kownoekondre boskopoe boen, dan a e aksi foe wi taki wi moesoe doe persoonlijk studie. Wi moesoe teki wi ten foe prakseri dipi foe a njanjan na jejefasi di den brada gi wi. Te wi e leisi A Waktitoren esi-esi, dan a de leki wi no e teki wi ten foe njan wan boen gosontoe njanjan di switi. Joe e teki joe ten foe poti boen prakseri na tapoe a njanjan na jejefasi? Foe kisi a moro boen wini foe dati, wan sma moesoe abi wan gosontoe angri na jejefasi di e troesoe en. Efoe disi e misi, dan tra sani kan meki den winimarki di e kon foe persoonlijk studie kon moro mendri, noso den tra sani disi kan teki a ten di wi abi fanowdoe gi a studie. A no de makriki foe hori wisrefi na wan boen schema foe studeri. Ala di wi moesoe loekoe finifini sortoe sani de moro prenspari, tokoe den goedoe na jejefasi di wi sa kisi, warti srefisrefi.—Odo 3:13-18; Kol. 1:27.
3 Ibri dei Ondrosoekoe den Boekoe foe bijbel e jepi wi foe prakseri foe positief sani di e bow sma èn di abi foe doe nanga a Kownoekondre. Den wan di „sabi a nowtoe na jejefasi foe den” e meki plan foe teki wan toe miniti ibri dei foe leisi a tekst nanga a komentaar foe a dei dati (Mat. 5:3). Foeroe tekst froeklari den difrenti sani foe a Kownoekondre. Foe eksempre, tapoe 22 november 1994 a tekst ben de Mateus 13:4. A komentaar ben poti prakseri na tapoe a Kownoekondre howpoe èn a komentaar ben memre wi foe a kefar foe abi demakandra di no de gosontoe, nanga famiriman èn nanga birtisma. Wan troe tori na, taki ibri mamanten foe ibri wroko dei, na den Bethel oso na heri grontapoe, wan 15 miniti takimakandra e hori foe a tekst foe a dei. A troe tori disi e poti krakti na tapoe den winimarki èn o serjoesoe a de taki wi moesoe poti prakseri na tapoe a dagtekst makandra. Joe osofamiri abi ini na aladei gwenti foe den, so wan poti di sma e poti prakseri na tapoe a tekst foe a dei?
4 Te joe e gro ini warderi gi a Kownoekondre, dan dati sa troesoe joe moro foe prati a Kownoekondre boskopoe nanga trawan. A Waktitoren nanga Ontwaakt! e gi wi san wi ben kan teki gersi nanga oli gi a prakseri foe wi so taki a prakseri foe wi kan kisi den lasti èn den moro njoen bodoi. Den tijdschrift e jepi wi foe tan froestan heri boen o tranga grontapoe abi Gado Kownoekondre fanowdoe. Den e jepi wi foe de sma di abi jejefasi, di „abi a prakseri foe Krestes” (1 Kor. 2:15, 16). Ala den sani disi kan meki a howpoe foe wi kon moro tranga, èn a kan meki a faja di wi abi foe prati a Kownoekondre howpoe nanga trawan, kon moro bigi.—1 Petr. 3:15.
5 A de prenspari taki ibriwan foe wi froestan san a Kownoekondre boskopoe wani taki. A Kownoekondre na a wrokosani di Gado sa gebroiki foe hori en soevereiniteit hei, foe tjari wan kaba kon na ogridoe, èn foe tjari wan njoen grontapoe kon—wan paradijs. Jesus ben gi wi a komando foe poti a Kownoekondre na a fosi presi ini wi libi. Wi moesoe de borgoe di wi kan teki gersi nanga skapoe, foe kan libi na ondro a tiri foe a Kownoekondre (Mat. 6:10, 33). Doe ala san joe man foe gebroiki na okasi di joe abi foe njan boen foe den blesi foe en.