De leriman foe Gado Wortoe—gebroiki den brochure
1 Ibri foetoeboi foe Jehovah di gi ensrefi abra na en, abi wan frantiwortoe foe abi wan prati na ini a wroko foe leri tra sma Gado Wortoe. O serjoesoe a frantiwortoe disi de, e kon de krin te wi e froestan taki na a sma di abi ala makti na hemel nanga na grontapoe, gi wi a wroko disi foe „meki disipel foe sma foe ala den nâsi, . . . e leri den” (Mat. 28:18-20). So boen, foe kan abi wan prati na a preiki foe a boen njoensoe na trawan, e aksi foe wi taki wi moesoe tron leriman!—2 Tim. 2:2.
2 Na ini augustus, wi kan gebroiki wi koni foe gi leri te wi e pristeri brochure. Wi kan teki wan moi bijbel prakseri na ini den, èn dan sreka wisrefi foe kan gi wan toe komentaar di sa jepi wi foe bigin wan takimakandra.
3 Te joe e pristeri a brochure „Bekommert God zich werkelijk om ons?” (Troetroe Gado e broko en ede nanga wi?), joe ben sa kan taki:
◼ „Wi fisiti foeroe foe den birtisma foe joe èn ben feni taki den e broko den ede nanga a gawgaw fasi fa ogridoe, terrorisme, nanga ogridoe e kon moro foeroe. San joe e prakseri, foe san ede meki disi kon tron so wan problema? [Gi okasi foe piki.] A de warti srefisrefi gi wi, taki bijbel ben taki na fesi dati disi ben sa pasa. [Leisi 2 Timoteus 3:1-3.] Poti prakseri na tapoe taki disi moesoe pasa na ini ’den lasti dei’. Disi e sori na tapoe taki wan sani de foe doro na en kaba. San joe denki na a sani disi? Gi okasi foe piki. Opo bladzijde 22, poti prakseri na tapoe a prenki, èn taki foe wán noso toe bijbel tekst di kari tapoe a bladzijde dati. Meki mofo foe go baka na wan tra ten, foe froeklari foe san ede meki wi e bribi taki den sani disi de so krosibei foe pasa.
4 Te joe e pristeri a brochure „Jeje foe den dedewan—Den kan jepi joe noso doe joe ogri? Den de troetroe?”, dan joe ben kan taki:
◼ „Gi foeroe sma a boen foe a libi kon tron noti moro leki soi, froeferi wroko. San joe prakseri, de fanowdoe foe meki a libi moro warti? [Meki na ososma taki san a e prakseri.] Bijbel e sori, taki Gado abi moro boen sani di e wakti wi. Loekoe san a e taki dja na Openbaring 21:4, 5.” Efoe a fiti, dan go moro fara nanga a takimakandra foe penti di skrifi na bladzijde 30 nanga 31 foe a brochure.
5 Joe ben kan pristeri a brochure „Njan Boen Foe Tégo Foe A Libi Na Grontapoe!” foe di joe e sori a sma a heri prenki na tapoe a fesisei nanga bakasei kafti èn e aksi:
◼ „Joe ben sa wani foe libi na ini wan grontapoe di foeroe nanga sma di kolokoe leki den sma disi? [Gi okasi foe piki.] Bijbel e taki dati Gado lobi libisma èn wani den foe libi foe têgo na ini kolokoe na grontapoe”. Drai go na prenki nomroe 49, èn leisi wan foe den bijbel tekst di kari drape. Dan, sori na tapoe prenki nomroe 50, èn froeklari san wi moesoe doe efoe wi wani foe libi na ini a paradijs disi. Aksi efoe joe kan kon baka, èn taki foe san ede bribi na ini Jesus de so prenspari.
6 Wi e plisi Jehovah te wi e ’go na fesi krinkrin, foe di wi e poti prakseri na tapoe a fasi fa wi e gi leri’ (1 Tim. 4:15, 16). Den brochure foe wi kan de wan troetroe jepi gi wi na ini den moeiti di wi e doe foe jepi den wan di e angri foe jere „boen njoensoe foe wan moro boen sani”.—Jes. 52:7.