Go baka nanga boen bakapisi e aksi foe joe foe gi boen leri
1 Foe meki gobaka na wan prenspari èn prisiri pisi foe wi poebliki diniwroko. Foe san ede wi moesoe de fajafaja foe go baka na den wan di sori belangstelling? Wi e meki a nen foe Jehovah bekènti èn a nen foe en e kisi glori foe di wi e doe a wroko disi foe meki disipel, èn den wan di e frede Gado e kisi jepi foe feni a pasi di e tjari go na libi (2 Kor. 2:17–3:3). Na erken di wi e erken taki a meki kon santa foe a nen foe Jehovah de na ini a tori èn so srefi den libi foe tra sma toe, moesoe boeweigi wi foe sreka wisrefi boen bifosi wi go baka.
2 Wan boen leriman sa jepi a studenti foe bow na tapoe a fondamenti di poti kaba. Neleki fa wan skoromeester noso skoromisi e bow na tapoe a sabi di den studenti e kisi foe sani di den e leri dei foe dei, na so wi moesoe abi a gwenti foe go baka na den sma, baka a fosi fisiti foe wi, foe kan gi den moro bodoi tapoe a srefi tori. Disi abi leki bakapisi taki a sma kan go doro foe prakseri foe den sani di wi ben taki, èn taki a fasi foe denki den sani disi kan gro safrisafri.
3 Te joe go baka, baka di joe ben pristeri a brochure „Bekommert Gado zich werkelijk om ons?” (Troetroe Gado e broko en ede nanga wi?), dan kande joe e feni a fasi disi wan di sa gi boen bakapisi:
◼ „A fisiti di mi ben tjari kon a lasti leisi, wi ben taki makandra foe ’den lasti dei’ di bijbel taki foe den, èn san dati wani taki gi wi. Kande a e froewondroe joe fa wi sabi taki wi e libi na ini den lasti dei (2 Tim. 3:1). Den disipel foe Jesus ben de fajafaja foe feni wan piki na tapoe na aksi dati. [Leisi Mateus 24:3.] Na ini a piki di Jesus ben gi, a ben taki foe situwâsi di wi e si e pasa tide na ala presi. Na ini den sani disi joe abi banawtoe nanga ogridoe toe leki noiti wi ben si bifo.” Sori na tapoe a pisi foe a marki di taki foe en na ini paragraaf 3 nanga 4 tapoe bladzijde 19. Efoe na ososma piki na wan boen fasi, dan sori na tapoe den tra pisi foe a marki na ini paragraaf 5 te go miti 8 tapoe bladzijde 20. Aksi efoe joe kan kon baka èn gi piki na tapoe den aksi di de na a fesisei foe a brochure.
4 Te joe e tjari wan gobaka, baka di joe libi a brochure „Zie! Ik maak alle dingen nieuw” („Loekoe! Mi e meki ala sani kon njoen”) na baka, dan joe ben kan bigin foe di joe e sori a prenki na fesisei èn baka dati poti na aksi:
◼ „Fa joe prakseri taki a ben sa de foe libi ini wan volmaakti grontapoe? [Meki na ososma gi komentaar.] San joe e si na a prenki disi, a no soso wan sani di sma kan prakseri foe dati wawan; a abi en fondamenti tapoe bijbel pramisi di de seiker. [Leisi Openbaring 21:4 nanga Psalm 37:11, 29.] Mi ben sa wani tjari kon na krin fa joe nanga joe osofamiri kan njanboen foe den blesi disi.” Efoe na ososma e sori belangstelling, dan go doro nanga a takimakandra, èn pristeri en wan bijbelstudie.
5 Te joe go baka na a sma di ben sori belangstelling gi a brochure „Njan Boen Foe Tégo Foe A Libi Na Grontapoe!”, dan joe ben kan sori en baka èn taki:
◼ „Wi ben taki kaba foe a moi grontapoe di wi e si na tapoe a kafti foe a brochure disi. Mi wani taigi joe foe san ede bribi na ini Jesus Krestes de so prenspari gi sma di wani foe libi drape.” Drai go na prenki 41, èn leisi Jesaja 9:6. Sori go na prenki 62, èn leisi Johanes 3:16, ala di joe e poti krakti na tapoe taki a de fanowdoe foe gi jesi. Froeklari taki Jehovah Kotoigi e jepi sma foe leri fa foe sori bribi foe di den e studeri bijbel èn e proeberi foe libi akroederi den rai foe en.
6 Baka ibri gobaka di joe ben meki, sidon prakseri foe en nanga a marki foe go na fesi na ini a fasi fa joe moesoe doe en foe kisi boen bakapisi. Aksi joesrefi: Mi ben sabi krinkrin san mi ben wani taki? Mi ben tan poti prakseri na tapoe bijbel? Mi ben bow go doro na tapoe a fondamenti di mi ben poti na a fosi fisiti? Mi ben doe a pristeri na so wan fasi taki mi ben sa kan bigin nanga wan bijbel studie? Efoe joe kan piki na wan positief fasi na tapoe den aksi disi, dan dati na a djaranti taki joe e meki moeiti foe de wan boen leriman foe Gado Wortoe.