Kisi winimarki foe a theokrasia diniwroko-skoro foe 1996 — Pisi 2
1 Sjatoe baka di wi begin nanga a theokrasia diniwroko-skoro na ini 1943, wán foe den bijkantoro foe a Genootschap ben skrifi: „A toemoesi moi seti disi, ben meki dati na ini wan sjatoe pisiten foeroe brada, di ben prakseri taki den no ben sa de poebliki takiman noiti, kon de bekwaam srefisrefi na tapoe a podium èn kon abi moro boen bakapisi na ini a velddienst.” A skoro tan gi toemoesi moi leri, wan sani di wi alamala abi fanowdoe.
2 Bijbel-leisipisi: A no den wan nomo di abi wan prati e kisi winimarki foe a skoro. Foe taki leti, wi alamala abi wan toewijzing — na alawiki bijbel-leisipisi. A skoro schema e sori sortoe kapitel wi moesoe leisi ibri wiki. Foeroe bijbelprakseri de, di e poti krakti tapoe a prensparifasi foe leisi bijbel ala dei (Jos. 1:8; Ps. 1:2; Tori. 17:11). Bijbel-leisi de prenspari gi wan boen jeje gosontoe; a e bow a froestan nanga na ati. Efoe wi e leisi bijbel no mendri leki feifi miniti wan dei, wi sa man foe hori skinskin nanga a skoro schema foe bijbel-leisipisi. Na a kaba foe a jari, dan wi ben sa leisi moro leki 150 kapitel foe Gado Wortoe. Efoe wi poti wan bijbel pe wi kan feni en makriki, wi moesoe man leisi wan pisi foe bijbel ibri dei.
3 Instruktielezing: Foe man boeweigi den brada nanga sisa foe de loyaal, foe de faja na ini a diniwroko, dan a takiman di abi na instruktielezing moesoe meki gebroiki foe boen fasi foe gi leri, foe meki sma froestan sani krinkrin, èn foe bow warderi gi Jehovah, en Wortoe nanga en organisâsi. Owroeman nanga dinari na ini a diniwroko kan doe disi te den e sreka densrefi boen, e bow a taki foe den lontoe a thema, e taki nanga overtoigi èn e tjari a materiaal fajafaja kon na fesi (Hebr. 4:12). A de prenspari taki a takiman hori ensrefi na a ten di a kisi foe en toewijzing. A Geïnspireerd-boekoe foeroe nanga bijbeltekst èn e pristeri span bijbelmateriaal wan baka trawan, di kan meki wi kisi winimarki na jejefasi. A Verkondigers-boekoe abi na ini a disiten historia foe na organisâsi foe Jehovah na tapoe grontapoe èn e froeteri foe sani di sma troetroe ondrofeni na ini den libi, èn fa den sori bribi, faja fasi, a gi di den gi den srefi ini a diniwroko èn lobi. Foeroe sani de foe leri foe den theokrasia sani di wi kisi èn a fasi fa Jehovah blèsi en pipel na ini a ten disi.
4 Edepenti foe a bijbel-leisipisi: Den brada di kisi a toewijzing disi, moesoe piki spesroetoe vers di den kan fiti tapoe wan praktis fasi foe meki a gemeente kisi winimarki. Disi e aksi foe den taki den leisi den kapitel na ini a toewijzing, prakseri dipi foe den, èn foe ondrosoekoe tekst di teki poeroe foe feni penti na ini di sa tjari a prakseri foe di den tekst dati kon na krin. Bakasei foe a Index van Wachttoren-publikaties joe e feni a „Schriftplaatsenindex”, di kan jepi joe foe feni den bodoi foe spesroetoe bijbeltekst. Den brada di abi a pisi disi moesoe sori taki den abi a koni foe si sani krin èn den no moesoe poti materiaal di no abi foe doe nanga a pisi. Den no moesoe sreka densrefi tapoe moro materiaal leki san den kan taki foe na ini siksi miniti nomo.
5 Wi alamala kan njan boen foe a theokrasia diniwroko-skoro. A kan jepi wi foe meki den bekwaamfasi foe wi foe gi lezing nanga foe gi leri kon moro boen. Te wi teki winimarki doronomo foe a seti disi, dan dati sa jepi wi seiker foe meki ’ala sma kan si a go-na-fesi’ foe wi. — 1 Tim. 4:15.