Doe santa diniwroko dei nanga neti
1 Wi kisi wan toemoesi bigi grani. Dati na a de di wi de kotoigi foe Jehovah. Wi de wan pisi foe na organisâsi foe preikiman na heri grontapoe di Jehovah e gebroiki foe doe a moro bigi Kownoekondre-bariwroko di doe oiti! (Mark. 13:10). Nanga a tranga fanowdoe foe a ten foe wi na prakseri, wi e doe ala san wi man foe abi wan prati na ini a wroko disi?
2 Wi no sabi omeni sma sa handri na tapoe a preikiwroko foe wi, te foe kaba . Jehovah e gi wi a djaranti taki a sa de „wan bigi ipi”, di trawan kon sabi leki sma di alamala ’e doe santa diniwroko gi en, dei nanga neti’ (Openb. 7:9, 15). Den moro leki feifi miljoen Kotoigi di e doe a diniwroko foe Gado kaba, no de sma nomo di e arki nanga belangstelling noso sma di e fisiti konmakandra nomo. Den de wrokoman di e meki a boen njoensoe bekènti na heri grontapoe!
3 Ibri dei, okasi de foe prèise Jehovah, na ini a velddienst noso na okasi-preiki. Prakseri foe a bigi kotoigi di ben kan gi, efoe iniwan foe wi teki fesi foe prati waarheid nanga wán sma nomo, ibri dei. A warderi di wi abi gi Jehovah moesoe boeweigi wi foe taki foe en nanga faja. — Ps. 92:1, 2.
4 Jepi trawan foe doe santa diniwroko: Jehovah e tan blesi wi nanga gro (Hag. 2:7). Na ini a dienstjari di pasa, wan gemiddelde foe 2132 oso-bijbelstudie ben hori ibri moen na ini Sranan. A marki di wi abi te wi e studeri nanga den sma disi, na foe jepi den foe tron disipel foe Jesus (Mat. 28:19, 20). Foeroe foe den meki moi go na fesi kaba, foe di den e fisiti den konmakandra doronomo. Den bigin foe taki nanga sma di den sabi „foe den toemoesi moi sani foe Gado” di den leri (Tori. 2:11). Den kan kisi a kari now foe abi wan prati na ini a poebliki diniwroko?
5 Na ini april wi moesoe meki spesroetoe moeiti foe gi njoenwan di doro den markitiki, a kari foe kon nanga wi na ini a velddienst. A sma di joe e studeri nanga ben taki dati a abi a winsi foe doe disi? Efoe dati de so, a doro den markitiki foe bijbel? (Loekoe a Georganiseerd-boekoe, bladzijde 99-102.) Te a studenti wani abi wan prati na a velddienst, dan taki nanga a fesiman opziener foe a winsi foe a bijbelstudenti foe joe, èn na opziener sa aksi toe owroeman foe loekoe a tori. Efoe a bijbelstudenti doro den markitiki foe de leki wan preikiman di no dopoe ete, gi en wan kari foe wroko nanga joe na ini a diniwroko. Den dienstopziener nanga den boekoestudie leider spesroetoe moesoe sabi taki, den moesoe jepi den wan di doro den markitiki foe bigin foe preiki na ini april.
6 Papa nanga mama ben sa kan loekoe efoe den pikin foe den doro den markitiki foe tron preikiman di no dopoe ete (Ps. 148:12, 13). Efoe joe pikin abi a winsi foe gi kotoigi na ini a Kownoekondre-diniwroko èn a e tjari ensrefi boen, dan joe kan go na wan foe den owroeman foe a dienst-komte foe taki foe a situwâsi. Baka te den kon makandra nanga joe èn nanga a pikin foe joe, toe owroeman sa bosroiti efoe a pikin foe joe doro den markitiki so taki den kan teri en leki wan preikiman. Wan spesroetoe reide de foe prisiri te pikin e moksi nanga wi na ini a prèise di wi e prèise Gado!
7 Jehovah wawan warti foe kisi a santa diniwroko foe wi (Luk. 4:8). Meki ibriwan foe wi gebroiki a toemoesi moi grani foe wi foe prèise en „boen foeroe”. — Ps. 109:30; 113:3.