Jepi den wan di de inaktief foe kon de aktief baka
1 Foe di na apostel Paulus ben e si a bigi kefar na jeje sei di ben kan kon gi den kompe kresten foe en, a ben skrifi: „A joeroe doro kaba foe oenoe wiki foe sribi, bika now a froeloesoe foe wi de moro krosibei leki na ini a ten di wi ben tron bribiman” (Rom. 13:11). Paulus ben broko en ede nanga den brada foe en di ben sribi na jejefasi; a ben de fajafaja foe jepi den foe kon kisi njoen krakti foe bigin wroko baka.
2 Wi kan taki troetroe taki a neti foe na owroe grontapoe disi de fara kaba èn taki a moesoedei foe a njoen grontapoe de leti na wi fesi (Rom. 13:12). Wi abi boen reide foe broko wi ede nanga den brada foe wi di tapoe foe abi demakandra nanga wi leki preikiman foe a boen njoensoe. A dienstjari di pasa, na ini Sranan 22 preikiman ben kisi jepi foe kon de aktief baka. Fa wi kan jepi tra sma di de inaktief foe bigin dini Jehovah baka?
3 San owroeman kan doe: A moro bigi pisi foe sma di de inaktief no libi waarheid; den tapoe nomo foe preiki foe lasi-ati ede, persoonlijk problema ede, lobi gi goedoe ede, noso tra broko ede foe a libi (Luk. 21:34-36). Efoe a kan, a moro boen foe jepi den bifo den kon de sma di de inaktief. A gemeente sekretarsi moesoe taigi a gemeente boekoestudie leider wantenwanten te wan preikiman no e gi raport foe en diniwroko ala moen. Sani kan sreka foe tjari wan herder fisiti. Den moesoe proeberi foe kon sabi a troetroe reide foe a problema, èn fa den kan gi jepi. — Loekoe De Wachttoren foe 15 september 1993, bladzijde 20-23.
4 Fa trawan kan jepi: Foeroe foe wi sabi wan sma di kon de inaktief. A ben sa kan de wan sma nanga soema wi ben abi wan krosibei matifasi na ini a ten di pasa. San wi kan doe foe jepi en? Kande wi kan tjari wan sjatoe fisiti go na en oso. Taigi en taki joe e misi a demakandra nanga en. Abi switifasi èn de positief. Taki foe a broko ede di joe abi gi en sondro foe sori taki a siki na jejefasi. Froeteri foe ondrofenitori di e gi deki-ati noso tra boen sani di a gemeente doe. Taki fajafaja nanga en foe a „Boskopoeman foe a vrede foe Gado”-distriktkongres, èn gi en deki-ati foe de drape. A demakandra di a sa abi nanga trawan ini a gemeente baka, kan jepi en moro leki iniwan tra sani. Taki dati joe wani go nanga en na den konmakandra. Meki den owroeman sabi foe a piki di joe ben kisi foe en.
5 Te wan sma di kon de inaktief kon na den konmakandra baka, a kan taki a sa firi froeferi te a miti nanga trawan di a sabi kaba. No aksi: „Pe joe ben de?” Na presi foe dati, meki a firi taki a boen dati a kon. Meki a abi wan prati na ini takimakandra. Meki a miti den sma di a no sabi. Sidon nanga en na a konmakandra, sorgoe taki a abi wan singiboekoe nanga a materiaal di wi e studeri na a momenti dati. Gi en deki-ati foe kon baka, èn taigi en taki joe wani gi jepi efoe dati de fanowdoe.
6 Na abi di Jehovah nanga Jesus abi waran firi gi den wan di lasi pasi, meki den e prisiri te den sortoe sma disi e kon tranga baka na jejefasi (Mal. 3:7; Mat. 18:12-14). Wi kan ondrofeni a srefi prisiri efoe wi man foe jepi trawan foe dini Jehovah baka.