Jepi den wan di no abi ondrofeni, foe kon froestan
1 Nanga jepi foe a wroko foe meki disipel, wi e leri tra sma san Gado e aksi foe den (Mat. 28:19, 20). Moro leki feifi miljoen Kotoigi na heri grontapoe e doe kefalek foeroe moeiti foe doe dati. Boen bakapisi no e anga foe omeni joeroe wi ben gebroiki, den poeblikâsi di wi ben prati, noso den bijbelstudie di wi ben bigin. Wi e doro a marki foe wi te sma e froestan èn e doe san den e leri.
2 Foe jepi tra sma na jejefasi abi foe doe nanga a ’meki di wi e meki den wan di no abi ondrofeni, kon froestan’ (Ps. 119:130). Soso te sma e ’froestan san a wani taki’ a kan naki den ati èn kan boeweigi den (Mat. 15:10). Foe di a wroko foe wi e kon moro foeroe èn e doe moro foeroe, wi e kon froestan moro nanga moro taki a de fanowdoe foe taki èn foe gi leri na wan makriki fasi. Dati na foe san ede a Genootschap tjari a brochure kon na doro: San Gado e aksi foe wi? A abi wan kompleet studie kursus na ini di e taki foe den prenspari leri foe bijbel. Den lès sjatoe, den wortoe no moeilek, èn a bodoi de makriki foe froestan, èn dati e meki a brochure e hari sma na ala sei.
3 Na ini den moen april nanga mei wi sa pristeri a brochure disi makandra nanga den tijdschrift. Wi e rikomanderi taki te joe e meki plan gi joe alawiki diniwroko, joe moesoe seti sani foe pristeri den tijdschrift na tapoe den satra, ma pristeri a brochure na ini joe diniwroko na tapoe den tra dei foe a wiki. Tjari a brochure gi sma di ben teki poeblikâsi wantewante kaba. Hori na prakseri taki joe kan gebroiki en boen spesroetoe foe leri pikin-nengre, sma di e taki wan tra tongo, èn den sma di no sabi leisi boen.
4 Gebroiki wan makrikifasi foe bigin taki: Te joe e pristeri a San Gado e aksi-brochure, sori go na bladzijde 2, pe a e froeklari taki „a brochure disi meki leki wan bijbel studie kursus”. Taki foe paragraaf 3 na tapoe bladzijde 3 foe sori foe san ede a sma moesoe studeri bijbel. Wiki en belangstelling nanga wan toe foe den titel foe den lès, di e tjari makriki bijbel waarheid kon na krin. Demo fa a brochure disi e meki a de wan prisiri foe kisi leri, èn aksi en foe jepi en persoonlijk.
5 Hori wan studie di e go na fesi: A marki foe wi a no soso foe hori bijbelstudie—wi wani meki disipel di sa tron sma di e horibaka tranga gi a troe anbegi. Wi kan klari a brochure na ini wan toe wiki èn a moesoe abi leki bakapisi taki wi sa studeri a Sabi-boekoe wantewante. (Loekoe a foetoewortoe na tapoe bladzijde 31.) Na a bigin kaba joe moesoe jepi a studenti foe kon sabi na organisâsi foe Jehovah. (Loekoe a Redeneren-boekoe, bladzijde 337.) Poti krakti na tapoe a waarde foe gemeente konmakandra, èn taki dati te wi e fisiti den dan dati e meki wi froestan finifini fa foe doe a troe anbegi.—Hebr. 10:24, 25.
6 Te wi abi wan doronomo prati na ini a spesroetoe wroko disi na ini april nanga mei, dan seiker dati sa gi wi a prisiri di wi e kisi foe a jepi di wi e jepi opregti sma foe „kisi froestan” di e tjari libi kon.—Odo 4:5.