Leri tra sma san Gado e aksi foe den
1 Foeroe sma de foe feni ete di no kisi na okasi na jejefasi foe „jere a wortoe foe Jehovah” (Amos 8:11). Ala di son sma e bribi taki Gado de, tokoe den no sabi a prakseri foe en èn den sani di a e aksi foe den. Foe dati ede, a de fanowdoe taki wi e leri den a Kownoekondre waarheid di kan kibri den libi. Te wi abi den joisti wrokosani foe wi èn te wi sreka na wan joisti fasi foe gi kotoigi na ibri okasi, wi kan feni den sma di wani sabi san Jehovah e aksi foe den.
2 Na ini april nanga mei wi sa abi den uitgave foe A Waktitoren nanga Ontwaakt! foe prati, di kon na a joisti ten srefisrefi. Moro fara, gi a fosi leisi, wi sa pristeri a brochure San Gado e aksi foe wi? Nanga den moi prenki foe en èn den aksi foe en di e meki sma denki, a brochure disi sa hari sma prakseri na ala sei. Den idea disi di e kon now sa jepi wi foe gebroiki den kefalek boen poeblikâsi foe wi nanga boen bakapisi.
3 Soekoe den sma boen: Na ini kontren pe foeroe sma no de na oso te wi e wroko oso-foe-oso, a sori taki a boen foe soekoe den sma boen èn foe taki nanga sma awansi pe wi feni den. Na inlegvel foe Wi Kownoekondre Dienst foe september 1996, ben gi wi a deki-ati foe preiki a boen njoensoe na ala presi—na strati, na ini bus, na presi pe sma e koiri, na parkeerpresi, èn na bisnis presi. A ben meki wi froestan so srefi a fanowdoe di de foe meki okasi foe preiki na informeel fasi. Leki wan eksempre foe disi, wan pionier sisa ben go na a dierentuin èn ben tjari wan ipi foe na Ontwaakt! foe 8 augustus 1996, di abi den seri artikel „Bedreigde soorten—Vanwaar de bezorgheid”? Na ini wán joeroe, a ben prati 40 eksemplaar na wan toe sma di lobi meti èn di e froestan a waarde foe den! Sortoe boen bakapisi joe ben abi te now nanga a preiki di joe e preiki a boen njoensoe na ala presi? A Waktitoren nanga Ontwaakt! èn so srefi a San Gado e aksi-brochure e fiti spesroetoe gi ala sortoe fasi foe gi kotoigi bika den e taki foe bodoi di abi krakti na tapoe a libi foe sma èn a e poesoe den foe denki.
4 Bigin takimakandra: A bladzijde na bakasei foe Wi Kownoekondre Dienst foe oktober 1996 e gi finifini bodoi fa foe sreka joe eigi pristeri foe den tijdschrift A Waktitoren nanga Ontwaakt! Den srefi idea sa abi boen bakapisi te joe e sreka joe pristeri foe a San Gado e aksi-brochure. A sani di wi e taki kan sjatoe wan toe zin nomo noso a kan langa nofo foe taki foe wan bijbel prakseri toe. A de prenspari foe soekoe den bigin wortoe heri boen, foe di den kan bepaal efoe a sma nanga soema joe e taki, sa tan arki. Wan toe sma ben abi boen bakapisi nanga den bigin wortoe disi: „Mi ben leisi wan artikel di ben gi mi deki-ati, èn mi wani prati en nanga joe.” Noso joe kan poti wan moi aksi foe hari a tra sma kon na ini a takimakandra.
5 Efoe a e fiti na ini joe kontren, joe ben sa kan proeberi foe poti den aksi soleki den disi di e kon now na ini den pristeri foe joe a moen disi:
◼ „Na ini a ten disi wi e si taki den skrifiskrifi foeroe sani na tapoe gebow nanga skotoe, doti lai na ala sei, èn sani di doti a natoeroe. San sa de fanowdoe foe krin grontapoe èn foe meki a tron wan moro betre presi pe wi kan libi na tapoe?” Gi okasi foe piki, èn froeteri dan dati joe abi bodoi di e gi wi a djaranti fa èn oten a heri grontapoe sa tron wan djari. Taki foe wan spesroetoe komentaar, wan sjatoe tekst, èn wan moi prenki na ini wan njoen tijdschrift, èn pristeri en baka dati gi a sma so taki a kan leisi en. Bifo joe tapoe a takimakandra, proeberi foe sreka sani foe go doro nanga a takimakandra na tapoe wan tra ten.
◼ „Joe denki taki Gado ben wani taki wi ben moesoe libi nanga so foeroe problema soleki den wan di wi e miti na ini a ten disi?” Baka te a sma e gi piki, joe ben kan taki: „Kande joe sabi a begi di Jesus ben leri en bakaman foe begi, pe a ben e aksi taki Gado Kownoekondre moesoe kon. Joe prakseri san na troetroe a Kownoekondre foe Gado?” Drai go na lès 6 na ini a San Gado e aksi-brochure, èn leisi den aksi di poti na a bigin foe a lès. Baka dati, te joe e leisi paragraaf 1, sori a piki na tapoe a fosi aksi. Taki dati den tra aksi e piki na tapoe a srefi sjatoe fasi. Pristeri a brochure, taki san na a bijdrage, èn aksi en foe miti baka nanga en foe gi en moro bodoi foe a Kownoekondre.
◼ „Foeroe sma di e denki foe sani, e bigin si den relisi foe grontapoe leki a reide foe san ede den problema foe libisma de, na presi taki den e si den leki a loesoe gi den problema foe libisma. San joe e denki foe dati?” Baka te joe arki san a sma e prakseri, sori wan sani foe wan foe den njoen tijdschrift di kan hori en belangstelling, di abi foe doe nanga a doro di falsi relisi no doro en marki noso foe a fadon di falsi relisi sa fadon heri esi. Aksi en efoe a ben sa wani leisi en. Gi joe nen èn aksi a sma en nen, èn aksi en foe meki kontakti baka so taki joe kan froeklari fa a doe kon taki troe relisi no ben gi a libisma famiri brokosaka.
◼ „Foe di so foeroe problema de na ini na osofamiri libi na ini a ten disi, oiti joe aksi joesrefi san na a sroto foe kisi kolokoe na ini na osofamiri?” Wakti na tapoe wan piki, èn froeklari taki Gado e tjari kon na krin na ini bijbel, san na a troetroe sroto gi wan kolokoe osofamiri. Kande joe ben kan leisi Jesaja 48:17. Baka dati, go na lès 8 na ini a San Gado e aksi-brochure, èn taki foe wan toe foe den bijbeltekst di skrifi èn di e gi tiri di wi kan froetrow èn di de gi ibri memre foe na osofamiri. Leisi den groepoe aksi na a bigin foe a lès. Aksi efoe a sma ben sa wani leisi den piki. Efoe a wani, gi en a brochure èn taigi en san na a bijdrage. Aksi en foe kon baka wan tra leisi foe froeteri en moro foe den praktis tiri di bijbel abi gi wan kolokoe osofamiri libi.
6 Na inlegvel foe Wi Kownoekondre Dienst foe maart 1997 ben gi wi deki-ati foe teki deki-ati foe tjari gobaka. A ben rikomanderi wi foe gebroiki a San Gado e aksi-brochure foe bigin bijbelstudie, efoe a no man na a fosi fisiti, dan na a gobaka. A moro bigi fanowdoe di a libisma famiri abi, na foe leri san Gado e aksi foe den èn dan foe doe en (Kol. 1:9, 10). Wi sa gi tra sma foeroe winimarki na ini april nanga mei, efoe wi kan bigin foe leri den san wi sabi foe den sani di Jehovah e aksi foe den foe kan kisi libi.—1 Kor. 9:23.