Joe e leisi den tijdschrift?
1 Wan zendeling trowpaar na Afrika ben taki disi foe den tijdschrift foe wi: „A Waktitoren e jepi wi foe tan na ai na jejefasi ini a gebied foe wi. Wi e kisi deki-ati nanga krakti foe ibri uitgave.” Joe abi a srefi dipi warderi gi den tijdschrift foe wi? Èn joe abi a srefi faja foe leisi den?
2 A e teki foeroe ten foe sreka tijdschrift artikel di sma kan leisi na ini wan toe miniti nomo. Di joe sabi disi, joe sa fringi wan ai nomo tapoe den artikel, loekoe den prenki noso leisi wanwan tron wan artikel di a kon so taki joe ai fadon na en tapoe? Wi koni efoe wi doe moro leki dati. Wi moesoe teki ten foe leisi èn ondrosoekoe ala den artikel ini ibriwan uitgave foe den tijdschrift foe wi. A Waktitoren na a moro prenspari tijdschrift foe kisi jeje njanjan na a joisti ten. Ontwaakt! abi moi artikel di e gi foeroe leri foe foeroe sortoe tori. San wi e leri te wi e leisi den tijdschrift disi no wawan e gi wi krakti na jejefasi ma a e sreka wi toe foe wi kan abi wan moro boen prati na ini a diniwroko. Efoe wisrefi de getrow leisiman, dan wi sa abi a faja foe pristeri tra sma den tijdschrift.
3 Fa foe meki a gwenti foe leisi kon moro boen: Joe ben sa kan go na fesi nanga a leisi di joe e leisi den tijdschrift? Djaso wi abi toe rai di e wroko boen gi foeroe sma. (1) Meki wan schema foe leisi na wan fasti ten. Efoe joe e poti 10 te leki 15 miniti nomo na wan sei foe leisi ibri dei, joe sa froewondroe omeni joe sa kan leisi na ini wan wiki. (2) Soekoe wan sistema foe memre joe san joe leisi kaba. Kande joe kan poti wan marki di e sori taki joe leisi dati kaba, na a bigin foe ibriwan artikel di joe e leisi. Efoe joe no e doe disi a kan taki joe misi foe leisi wan toe artikel noso kande wan heri tijdschrift srefi. A de prenspari foe wroko na wan gwenti foe leisi di e wroko boen gi joe èn foe tan hori joesrefi na en. — Teki gersi Filipisma 3:16.
4 Na wan koni fasi „a getrow èn koni srafoe” doe wan sani na tapoe a kenki di den ten e kenki, foe di a e tjari artikel kon na doro di abi foe doe nanga den troetroe nowtoe foe sma (Mat. 24:45). Foe troe, den tijdschrift doe foeroe na ini a libi foe wi. A fasi fa wi e go gaw na fesi na jejefasi, abi moro foeroe foe doe nanga a kwaliteit foe den theokrasia leisi gwenti foe wi di e tiri dati. Foeroe blesi na jejefasi de gi den sma di e meki ten foe leisi ala den tijdschrift.