„Sai Kownoekondre siri” na sma di e teki tijdschrift doronomo
1 Singi 55 ini Singi Prèise Singi gi Jehovah abi a nen „Sai a Kownoekondre siri”. A gron tapoe na agersitori foe Jesus di e agersi a wroko foe meki disipel nanga a sai foe siri (Mat. 13:4-8, 19-23). Den wortoe foe a singi de so: „Ofoeroe f’ den siri fadon tap boen gron/E anga foe omen oen doe.” Fa wi kan meki taki a diniwroko foe wi kon moro boen? Wan fasi na foe feni sma di e teki tijdschrift doronomo èn foe tan tjari den tijdschrift go na den.
2 Joe kan doro difrenti marki te joe abi sma di e teki tijdschrift doronomo. (1) Doronomo fisiti ibri toe wiki e jepi joe foe bow wan switi matifasi nanga a sma di abi belangstelling. (2) Joe e meki a sma dati tan kisi a bodoi di e kibri sma libi èn di de foe feni ini A Waktitoren nanga Ontwaakt! doronomo. (3) Nanga den takimakandra foe joe, joe kan jepi a sma foe kweki wan angri foe kon sabi bijbel waarheid, èn dati kan meki joe bigin wan bijbelstudie. — 1 Petr. 2:2.
3 Fa foe bigin soekoe sma di e teki tijdschrift doronomo: Ibritron te wan sma sori taki a abi belangstelling gi den tijdschrift, dan froeklari taki toemoesi moi artikel e kon na ini ibri uitgave èn taki joe sa feni en boen foe tjari den kon gi en ibri toe wiki. Baka te joe gowe, skrifi a sma nen nanga en adres, a dei di joe go na en, den datum foe den uitgave di joe libi na baka, na artikel di joe poti prakseri na en tapoe, èn den tori di a sma ben abi spesroetoe belangstelling gi.
4 Joe kan bigin nanga wan toe sma nomo. Doe moeiti baka dati foe skrifi tra nen toe pe joe libi tijdschrift na baka. Te joe e feni moro sma, dan joe kan orga en akroederi a birti pe den e tan, so taki a sa de makriki foe wroko en. Meki wan soifri raport di e sori sortoe uitgave joe libi na baka èn o ten, ibritron te joe e go na den. Skrifi moro bodoi foe den takimakandra foe joe èn fa joe kan meki a belangstelling foe a sma gi a waarheid tan gro te joe e go fisiti a sma agen.
5 Teki bisnis sma toe èn sma di kisi hei skoro foe a wroko di den e doe: Ondrofeni sori taki wenkriman nanga tra sma di kisi hei skoro foe a wroko di den e doe lobi foe teki den tijdschrift foe wi doronomo. Wan owroeman ben skrifi a borgoepapa foe a foto foe en na den nen foe sma di e teki tijdschrift doronomo. Wan preikiman ben bigin wan studie nanga wan man foe 80 jari, na eiginari foe wan wrokope di e seri sani foe bow, baka di a ben tjari den tijdschrift gi en tin jari langa!
6 Wan pionier sisa ben go na ini wan wenkri èn a miti wan man nanga en wefi di no ben ontfanga en na wan switi fasi. Ma foe di den ben teki den tijdschrift, dan a sisa teki a bosroiti foe meki den tron sma di e teki tijdschrift doronomo. Baka wan pisi ten, a sisa ben wani stòp foe go na den bika den no ben e sori switifasi srefisrefi èn noiti den ben abi foeroe foe taki, srefi di a ben aksi den wan sani foe sabi fa den ben e prakseri. Ma a sisa begi foe na afersi èn te foe kaba a ben libi a Libi foe têgo-boekoe na baka gi a man nanga en wefi. Baka di den leisi en, a wefi bari taki: „Ai, now fosi mi feni waarheid!” Den ben bigin wan bijbelstudie èn baka ten a man nanga en wefi ben teki dopoe. A horidoro foe a pionier meki boen froktoe foe troe.
7 Tjari den gobaka: Te joe e kisi wan njoen tijdschrift, dan leisi ibri artikel. Soekoe penti di sa hari a belangstelling foe ibriwan sma di e teki tijdschrift doronomo na joe. Dan te joe go baka, joe kan taki: „Di mi ben leisi na artikel disi, mi ben prakseri joe èn fa a sa abi a belangstelling foe joe.” Preikiman foe ala sortoe jari kan abi a prisiri foe abi sma di e teki tijdschrift doronomo na den. Srefi wan jongoe pikin kan taki: „Mi prisiri foe si joe agen. Den moro njoen uitgave foe A Waktitoren nanga Ontwaakt! foe joe doro. Mi denki taki joe sa lobi na artikel disi di nen . . .”
8 Wiki na angri gi artikel di sa kon foe di joe e poti prakseri tapoe a boksoe di nen „Na ini wi tra uitgave”. Te wan lo artikel e kon na doro di e taki foe wán sortoe tori, dan taigi a leisiman èn gi en deki-ati foe no misi no wan pisi foe en. No frigiti taki ibritron te joe e tjari den tijdschrift gi wan sma di e teki tijdschrift doronomo, joe kan teri wan gobaka. Èn san moro prenspari, hori na prakseri taki a marki foe wi na foe meki den gobaka disi gro kon tron bijbelstudie.
9 Fisiti sma ibritron baka di e teki tijdschrift doronomo na joe: Joe kan fisiti den sma di e teki tijdschrift doronomo na joe na iniwan ten di fiti — wan mamanten na mindri wiki, na lati bakadina, na mofoneti, noso na a kaba foe a wiki baka te joe go na ini na oso-foe-oso wroko. Efoe joe no man fisiti den sma di e teki tijdschrift doronomo na joe foe di joe siki noso joe moesoe gowe nanga fakansi, dan aksi wan tra preikiman na ini joe osofamiri noso na ini joe gemeente foe tjari den tijdschrift gi joe. Na a fasi dati, dan den sma di e teki tijdschrift doronomo na joe seiker sa kisi den tijdschrift foe den biten.
10 Wán fasi foe sai Kownoekondre siri na foe tjari A Waktitoren nanga Ontwaakt! doronomo gi ala den sma di e teki tijdschrift doronomo na joe. Te joe e leri den a waarheid foe bijbel, dan den kan froestan a wortoe foe a Kownoekondre èn te foe kaba, den kan meki froktoe makandra nanga joe. — Mat. 13:8, 23.