Bigin wan Bijbelstudie nanga sma pe yu gwenti tyari tijdschrift
1. Fu san ede na organisâsi fu Yehovah gi den preikiman a deki-ati langa ten kaba fu tan tyari tijdschrift gi den sma di lobi leisi den?
1 Furu sma no wani studeri Bijbel nanga wi, ma den lobi leisi den tijdschrift fu wi. Fu dati ede na organisâsi fu Yehovah gi den preikiman deki-ati langa ten kaba fu tan tyari tijdschrift gi sma di lobi leisi den tijdschrift fu wi. Te sma gwenti leisi den tijdschrift fu wi, dan nofo tron den o wani sabi moro fu a Wortu fu Gado (1 Petr. 2:2). Baka wan pisi ten, wan sani di den leisi kan naki den ati so taki den o wani studeri Bijbel.
2. Fa wi kan yepi den sma di gwenti teki den tijdschrift fu wi, so taki den wani kon sabi moro?
2 Meki den siri fu a bun nyunsu gro: Na presi fu libi soso den tijdschrift gi na ososma, abi wan takimakandra nanga en èn pruberi fu kon leri sabi en. Disi o yepi yu fu kon sabi san na a situwâsi fu en, san a lobi, èn san a e bribi. Na so fasi yu o sabi fa yu musu taki nanga en (Odo 16:23). Sreka ibri leisi te yu o go na a sma. Efu a kan, dan taki syatu fu wan penti na ini den tijdschrift èn taki fu wan tekst di e horibaka gi a penti dati. Na so fasi yu e meki a siri fu a bun nyunsu gro na ini en ati (1 Kor. 3:6). Ibri leisi te yu go na en, dan yu musu skrifi sortu tijdschrift yu gi en, sortu tori yu ben taki nanga en èn sortu tekst yu ben gebroiki.
3. Omeni leisi wi musu go baka na wan sma pe wi gwenti tyari den tijdschrift?
3 Omeni leisi yu musu go baka? Wan leisi ibri mun yu musu go baka na den sma pe yu gwenti tyari den nyun tijdschrift. Ma efu yu man èn efu a sma wani sabi moro, dan yu kan go na en moro leisi. Fu eksempre, wán noso tu wiki baka di yu gi a sma den tijdschrift, yu kan go baka èn taigi en: „Mi kon na yu fu taki syatu nanga yu fu wan tu moi penti na ini den tijdschrift di mi ben libi gi yu.” Disi o gi a sma na angri fu leisi wan spesrutu artikel. Efu a ben leisi en kaba, yu kan aksi en fa a feni na artikel èn kande yu kan taki syatu nanga en fu na artikel. Noso efu a sma lobi leisi den buku fu wi, dan yu kan go baka èn sori en a traktaat, brochure noso wan buku di wi e pristeri a mun dati.
4. San wi kan du wanwan leisi fu kon sabi efu den sma pe wi gwenti tyari den tijdschrift, wani studeri Bijbel?
4 No wakti teleki na ososma aksi yu fu studeri Bijbel nanga en. Yusrefi musu aksi en. Srefi efu a no ben wani fu studeri Bijbel di yu ben aksi en wan leisi kaba, dan a ben o bun wanwan leisi fu sori en na artikel na ini A Waktitoren di nen „Piki tapu aksi fu Bijbel” èn yu kan luku efu a wani taki fu en. Kande yu kan bigin wan Bijbelstudie na en mofodoro. Ma efu yu no man bigin wan Bijbelstudie, dan yu kan tan tyari den tijdschrift gi en fu meki a wani kon sabi moro.