Bow joe libi lontoe a diniwroko foe Jehovah
1 Jesus ben agersi den arkiman foe en nanga toe sortoe bowman. A wan man ben bow en fasi foe libi na tapoe a klipston foe di a ben gi jesi na Krestes èn a ben man kakafoetoe gi den bigi winti foe gens nanga banawtoe. A trawan ben bow na tapoe a santi foe di a no ben gi jesi èn a ben prakseri ensrefi nomo, èn a no ben man foe tan tanapoe di kwinsi ben kon (Mat. 7:24-27). Foe di wi e libi na a kaba foe a seti foe sani disi, meki wi e ondrofeni foeroe bigi winti foe problema. Te wi e loekoe boen, dan wi kan si taki den doengroe wolkoe foe a bigi banawtoe e kon na wán esi-esi. Wi sa horidoro te na a kaba èn a bribi foe wi sa boen ete? (Mat. 24:3, 13, 21) Foeroe e anga foe a fasi fa wi e bow wi libi now. So boen, a de toemoesi prenspari foe aksi wisrefi nownowde: ’Mi e bow mi kresten libi steifi lontoe a gi di mi e gi jesi na Gado èn mi e doe en diniwroko?’
2 San a wani taki foe bow wi libi lontoe a diniwroko foe Jehovah? A wani taki foe meki Jehovah de a moro prenspari sma na ini wi libi. A abi foe doe nanga a poti di wi e poti prakseri na tapoe a Kownoekondre leki a moro prenspari sani gi wi. A wani taki foe gi jesi na Gado na ini ala den sani di wi e doe ibri dei. A e aksi foe wi taki nanga wi heri ati wi e doe wi persoonlijk studie, wi osofamiri studie, nanga wi gemeente studie foe bijbel èn so srefi wi velddienst, ala di wi e meki den sani disi de den moro prenspari sani gi wi (Preik. 12:13; Mat. 6:33). So wan fasi foe waka pe wi e gi jesi, abi leki bakapisi taki wi sa abi wan bribi di tranga leki wan klipston, èn a no sa lasi te bigi winti foe problema sa naki wi.
3 A de wan prisiri foe si miljoenmiljoen sma di nanga froetrow, e bow den libi nanga a howpoe foe den gi a tamara, lontoe a diniwroko foe Gado, neleki fa Jesus ben doe dati (Joh. 4:34). Den e hori na wan fasti schema foe theokrasia wroko èn den e njan boen foe moi blesi di e kon leki bakapisi. Wan mama ben froeteri fa en nanga en masra ben kweki den toe manpikin foe den nanga boen bakapisi foe dini Jehovah. „Wi ben foeroe a libi foe wi nanga a waarheid — foe di wi ben go na ala den kongres, ben sreka gi konmakandra èn ben fisiti den, èn foe di wi ben meki a velddienst tron wan doronomo pisi foe wi libi.” En masra ben taki moro fara: „A waarheid a no wan pisi foe wi libi, a de wi libi. Ala tra sani e drai lontoe a waarheid.” Joesrefi poti a diniwroko foe Jehovah na a srefi fasi leki a moro prenspari sani na ini joe osofamiri?
4 Meki wan schema gi a heri wiki di e wroko boen: Na organisâsi foe Jehovah e jepi wi foe abi wan boen jeje gwenti foe doe sani, foe di a e seti feifi konmakandra na ini wán wiki. Kresten di e bow den libi lontoe a dini foe Jehovah, e seti den grontapoe nanga osofamiri afersi na so wan fasi, taki den kan fisiti ala den prenspari konmakandra disi. Den no e meki sani di no de so prenspari, kon na mindri a fisiti di den e fisiti den konmakandra doronomo. — Fil. 1:10; Hebr. 10:25.
5 Kresten di de lepi e erken taki, neleki fa a de prenspari foe njan na wan fasti ten ibri dei, na so a de prenspari toe foe meki wan fasti schema gi a studeri di den e studeri nanga densrefi noso nanga na osofamiri, èn dati abi na ini toe, a sreka di den e sreka gi den konmakandra (Mat. 4:4). Joe ben sa kan poti 15 noso 20 miniti na wan sei ibri dei foe studeri nanga joesrefi? A sroto na taki joe no moesoe meki tra sani safrisafri teki a ten di joe poti na wan sei foe studeri. Meki a tron wan gwenti di wani taki wan sani. Disi ben sa kan aksi foe joe, foe opo moro froekoe ibri mamanten leki joe e doe now. Den 17000 memre foe a Bethelfamiri e opo froekoe mamanten foe abi wan takimakandra foe a deitekst. A no de foe taki, dati efoe joe wani opo froekoe, dan joe moesoe poti wan boen joeroe foe go sribi te neti, so taki joe kan bigin a tra dei boen foe di joe rostoe boen.
6 Efoe joe na wan edeman foe wan osofamiri, dan teki fesi na ini na orga di joe e orga joe osofamiri schema gi theokrasia wroko. Son osofamiri e leisi bijbel, a Jaarboek (Jariboekoe), noso wan tra poeblikâsi makandra te den e rostoe baka di den njan na mofoneti. Foeroe papa nanga mama di si taki den pikin foe den gro kon tron kresten di de tranga na jejefasi, e taki dati wán sani di ben jepi den foe abi boen bakapisi, na a osofamiri gwenti foe poti ten na wan sei wán neti ibri wiki, pe den ben njan boen foe a bow di den ben bow makandra na jejefasi. Wán foe den papa disi ben taki: „Mi e feni taki a fasi fa den pikin foe wi ben gro na jejefasi, ben de foe di wi ben hori wan doronomo osofamiri studie ibri dridewroko, èn dati ben bigin so wan 30 jari pasa kaba.” Ala den dri pikin foe en ben teki dopoe di den ben jongoe ete, èn baka ten den ala dri ben go na ini a foeroeten diniwroko. Boiti taki na osofamiri studie e doe, dan joe kan oefen pristeri foe velddienst noso pisi foe den konmakandra, èn joe kan doe tra sani di e bow makandra toe.
7 Na ini joe ibriwiki schema, joe ’bai a ten’ foe doe a Kownoekondre preikiwroko? (Kol. 4:5) Foeroe foe wi abi en druk, foe di wi abi osofamiri èn gemeente frantiwortoe di wi moesoe sorgoe gi den. Efoe wi no e seti sani na so wan fasi taki wi kan abi wan prati na a preikiwroko èn a wroko foe gi leri ibri wiki, dan a sa de toemoesi makriki foe tra sani kon na ini a presi foe a prenspari wroko disi. Na eiginari foe wan boerderij di abi foeroe meti ben taki: „Na ini den jari lontoe 1944 mi ben froestan taki a wan-enkri fasi fa mi ben sa go na ini a velddienst ben sa de efoe mi ben poti wan spesroetoe dei gi dati. Te nanga now mi e teki wan dei na ini a wiki gi a diniwroko.” Wan kresten owroeman si taki, foe di a abi wan fasti schema foe gi kotoigi, a ben man wroko wan gemiddelde foe 15 joeroe wan moen na ini a preikiwroko. Efoe a moesoe doe iniwan grontapoe sani na tapoe satra, dan a e poti dati baka di a go na ini velddienst na mamanten. Joe nanga joe osofamiri kan poti no moro mendri leki wán dei ibri wiki gi a diniwroko, èn na so fasi e meki disi kon tron wan pisi foe joe jeje fasi foe libi? — Fil. 3:16.
8 Ondrosoekoe a gwenti di joe abi foe doe sani na ini a libi: Sani de di e wroko kontrari a bow di wi e bow wi libi lontoe a diniwroko foe Jehovah. Sani di wi no sabi na fesi kan broeja a schema foe wi di wi seti finifini foe studeri, foe go na den konmakandra èn foe doe wi diniwroko. Èn a Gensman foe wi, Satan, sa doe ala san a man foe „tapoe a pasi gi wi” èn gens den plan foe wi (1 Tes. 2:18; Ef. 6:12, 13). No gi pasi meki den problema disi meki joe lasi-ati, so taki joe e stòp. Tjari iniwan kenki kon di de fanowdoe, foe doe joe theokrasia wroko di joe poti tapoe schema. Wan fasti bosroiti èn horidoro de fanowdoe foe doe sani di warti troetroe.
9 Wi no moesoe meki den krakti foe grontapoe èn a takroe krakti di wi onvolmaakti skin abi na wi tapoe, tjari wroko kon di no e bow wi na jejefasi, èn di ben sa kan bigin teki moro nanga moro foe wi ten èn foe wi prakseri. A de fanowdoe foe ondrosoekoe wisrefi, ala di wi e aksi wisrefi: ’A de so taki a fasi fa mi e libi, safrisafri e lasi a balansifasi di a ben abi, noso mi meki sani poeroe mi prakseri? Mi bigin foe bow mi libi lontoe sani na ini a grontapoe disi di e pasa gowe? (1 Joh. 2:15-17) O foeroe ten mi e gebroiki gi sani di mi e feti na baka gi misrefi, gi a rèis di mi e rèis foe prisiri ede, gi sport, noso gi tra fasi foe prisiriten — di abi na ini toe a loekoe di mi e loekoe telefisi noso a soekoe di mi e soekoe sani na tapoe na Internet — efoe mi ben sa teki a ten disi gersi nanga a ten di mi e gebroiki foe doe sani di e bow mi na jejefasi?
10 Efoe joe kon si taki joe libi kon broeja nanga aktiviteit di no de fanowdoe moro nanga moro, dan san joe kan doe? Neleki fa Paulus ben begi taki den brada foe en „ben [sa kan] kon boen baka”, noso „den ben [sa kan] kon na tapoe a joisti pasi baka”, dan foe san ede joe no e begi Jehovah tranga èn nanga sakafasi foe jepi joe foe meki a diniwroko foe en kon tron ete wan tron a moro prenspari sani gi joe? (2 Kor. 13:9, 11, foetoewortoe.) Baka dati, abi a fasti bosroiti foe doe san joe ben bosroiti, èn tjari den kenki kon di de fanowdoe (1 Kor. 9:26, 27). Jehovah sa jepi joe foe joe no go na a reti-anoesei noso na a kroektoe-anoesei na ini joe diniwroko gi en di joe e doe foe di joe e gi jesi. — Teki gersi Jesaja 30:20, 21.
11 Tan abi foeroe foe doe na ini a prisiri diniwroko foe Gado: Miljoenmiljoen sma e soekoe kolokoe nomonomo, soso foe kon si baka ten taki, te a kaba foe a libi e doro, den materia sani di den ben soekoe fajafaja, no tjari kolokoe gi den di e tan. A ben de „wan strei foe kisi a winti” (Preik. 2:11). Na a tra sei, te wi e meki Jehovah de a moro prenspari sani na ini wi libi, èn e ’poti en na wi fesi doronomo’, dan wi e ondrofeni troetroe satisfaksi (Ps. 16:8, 11). Disi de so, bika Jehovah na a Sma di meki taki wi de (Openb. 4:11). Sondro en, a Gran Sma di abi wan prakseri, dan a libi no wani taki noti. A dini di wi e dini Jehovah e foeroe wi libi nanga wroko di warti èn di abi wan marki, èn den wroko disi e gi wi èn so srefi trawan, winimarki di e tan, ija, di e tan foe têgo.
12 A de prenspari foe no tron sma di e firi satisfaksi nanga a fasi fa wi de èn e lasi wi serjoesoefasi foe a ten ini a tori foe a kaba foe a grontapoe foe Satan di e kon heri esi. A fasi fa wi e si a ten di e kon, abi krakti na tapoe wi aladei libi. Den sma na ini den dei foe Noa, di no ben bribi taki wan froedoe ben o kon na a heri grontapoe, „no ben poti prakseri na tapoe”, èn den ben bow den libi lontoe den persoonlijk sani di den ben feti na baka — njan, dringi, èn trow — te leki a froedoe „ben figi den alamala poeroe” (Mat. 24:37-39). Na ini a ten disi, den wan di e bow den libi lontoe a grontapoe disi sa si taki den froewakti di den abi gi a ten di e kon, sa broko na pisipisi na ini a moro bigi pori di libisma oiti ondrofeni, „a dei foe Jehovah”. — 2 Petr. 3:10-12.
13 Foe dati ede, go doro foe bow joe libi lontoe a libi Gado, Jehovah, èn lontoe a doe di joe e doe a wani foe en. No wán sani de di joe ben kan kibri leki wan goedoe ini a libi disi, di abi so wan Sma di e Horibaka gi joe èn di joe kan froetrow leki Jehovah. A no man lei — a sa hori ensrefi na den pramisi foe en (Tit. 1:2). A no man dede — no wan sani di Jehovah e teki foe hori, e lasi (Hab. 1:12; 2 Tim. 1:12). A libi di wi e bow now, pe wi e gi jesi èn e bribi, na soso a bigin foe a libi di sa tan foe têgo ini a prisiri diniwroko foe wi kolokoe Gado! — 1 Tim. 1:11; 6:19.
[Prenspari pisi na tapoe bladzijde 3]
„A waarheid a no wan pisi foe wi libi, a de wi libi. Ala tra sani e drai lontoe a waarheid.”