Preiki a boen njoensoe fajafaja
1 „Mi e angri foe si oenoe . . . Mi e angri foe meki a boen njoensoe bekènti toe na oenoe.” Disi na san na apostel Paulus ben taki na a bigin foe en brifi gi den brada na Rome. Foe san ede Paulus ben de fajafaja foe go na den? A ben taki: „So taki mi ben sa feni wan toe froktoe na oen mindri toe . . . Bika mi no e sjen gi a boen njoensoe; foe taki en leti, a de a krakti foe Gado foe froeloesoe [sma].”—Rom. 1:11-16.
2 Paulus ben sori a srefi faja disi di a ben taki nanga den owroe man foe Efeise. A ben memre den: „Foe a fosi dei di mi kon na ini a distrikt Asia . . . , mi no ben draidrai . . . foe leri oenoe na poebliki èn oso foe oso toe. Ma mi ben gi kotoigi finifini na den Djoe èn na den Grikisma” (Tori. 20:18-21). Na ini a heri gebied di Paulus ben moesoe wroko, a ben abi na prakseri foe prati a boen njoensoe foe froeloesoe sma èn foe feni Kownoekondre froktoe. Fa disi na wan toemoesi boen jeje di wi kan sori toe!
3 Wi ben sa kan aksi wisrefi: ’Mi abi a srefi faja foe prati a boen njoensoe na ini mi birti? Na presi taki mi e si a preikiwroko leki wan plekti nomo, mi de fajafaja foe prati a boen njoensoe nanga someni sma leki mi kan? Mi loekoe a situwâsi foe mi foe di mi begi foe en? Mi proeberi ala den sani di man doe na ini wi gebied, so leki preiki oso foe oso, na tapoe strati, na ini bisnis presi, nanga a telefon, èn na wan informeel fasi?’
4 Abi wan prati fajafaja na ini april: A moen april na wan boen ten foe abi wan moro bigi prati na a preikiwroko. Foe di den saka den joeroe di pionier moesoe doro, meki moro sma sa man doe a jepipionierwroko. Kande joe situwâsi de so taki joe man de wan jepipionier na ini april nanga mei. Noso, foe di den joeroe di pionier moesoe doro kon kenki, dan kande joe sa man gi joe nen leki wan gewoon pionier. Efoe joe na wan gemeente preikiman, dan joe kan gi moro ten leki san joe ben gi na a diniwroko a moen disi èn tra moen, èn nanga dati e horibaka gi den wan di man pionier? Dati ben sa prisiri na ati foe Jehovah!
5 Ala Kownoekondre preikiman moesoe tan sori taki den de fajafaja neleki Paulus, foe di den e doe moro na ini a preikiwroko. Efoe wi e doe ala san wi man na ini a diniwroko, dan a sa prisiri wi troetroe. Paulus ben prisiri na a fasi disi te a ben doe en santa diniwroko. A ben sa boen efoe wi e teki a toemoesi boen eksempre foe en.—Rom. 11:13; 1 Kor. 4:16.