Preiki èn gi wan finifini kotoigi fu a bun nyunsu
1 Leki „wan fesiman nanga kapten”, Yesus ben sreka den disipel fu en gi a bigi preikiwroko di ben de na den fesi (Yes. 55:4; Luk. 10:1-12; Tori. 1:8). Na apostel Petrus ben taki disi fu a komando di Yesus gi den: ’A ben gi wi a komando tu fu preiki gi a pipel èn fu gi wan finifini kotoigi, taki disi na a Sma di Gado poti leki krutuman fu den libiwan nanga den dedewan’ (Tori. 10:42). Fa wi e gi wan finifini kotoigi fu a bun nyunsu?
2 Wi kan leri furu te wi e poti prakseri na a fasi fa na apostel Paulus ben gi kotoigi. Di a ben miti nanga den owruman fu a gemeente fu Efeise, dan a memre den na wan sani fu di a taki: „Mi no ben draidrai fu fruteri unu ala san ben bun èn fu leri unu na publiki èn oso fu oso tu. Ma mi ben gi kotoigi finifini na den Dyu èn na den Grikisma fu a berow na Gado èn a bribi na ini wi Masra Yesus.” Aladi Paulus ben kisi fu du nanga tesi, toku a ben suku ala sortu fasi fu fruteri someni sma leki a kan fu a bun nyunsu. A no ben de tevrede nomo fu fruteri den arkiman den prenspari sani fu a waarheid nomo, ma a ben suku fu fruteri den „ala rai fu Gado”. Fu di a ben wani du disi, meki a ben de klariklari fu meki muiti èn fu gi ensrefi dorodoro. A ben taki moro fara: „Mi no e meki mi sili de fu iniwan waarde, neleki a ben sa de diri gi mi, efu soso mi ben sa man klari a libiwroko nanga a diniwroko fu mi di mi ben kisi fu Masra Yesus, fu gi kotoigi finifini fu a bun nyunsu fu a no-frudini bun-ati fu Gado.”—Tori. 20:20, 21, 24, 27.
3 Fa wi kan waka baka na eksempre fu Paulus na ini a ten disi? (1 Kor. 11:1) Wi kan du dati te wi e suku den sma di warti aladi wisrefi abi fu du nanga tesi. Sosrefi te wi e meki muiti fu fruteri a bun nyunsu na sma fu ala kulturu nanga tongo, èn te wi de fayafaya fu yepi den wan di wani sabi moro (Mat. 10:12, 13). Disi wani taki dati wi e gi wi ten, wi e meki muiti èn wi e sori lobi gi sma.
4 Yu man dini leki wan yepipionier? Maart nanga april na wan bun okasi fu gi wan finifini kotoigi fu a bun nyunsu, fu di yu kan go na ini a yepi-pionierwroko. A ben gi wi deki-ati trutru taki someni preikiman meki spesrutu muiti fu go na ini a yepi-pionierwroko na ini a yari di pasa!
5 Wan sisa di abi 80 yari èn di abi furu problema nanga en gosontu, ben kisi tranga di na organisâsi fu Yehovah ben gi deki-ati fu go na ini a yepi-pionierwroko. A ben skrifi: „A sani disi meki mi kisi wan faya di mi ben abi wan langa pisi ten kaba na ini mi ati, èn mi firi taki mi ben musu pionier ete wan lasti tron baka.” A ben poti a marki fu go na ini a yepi-pionierwroko na ini a mun maart. „A fosi sani di mi ben du”, na so a e taki, „na fu sidon èn teri den kostu. Mi ben taki nanga mi umapikin fu di mi ben o abi en yepi fanowdu. Mi fruwondru di ensrefi gi en nen fu go na ini a yepi-pionierwroko.” Na ini a mun dati, na owru sisa wroko 52 yuru na ini a preikiwroko. „Furu tron te mi ben weri trutru, mi ben aksi Yehovah fu gi mi krakti baka. Na a kaba fu a mun mi prisiri srefisrefi, èn furu leisi mi taki Yehovah tangi fu di a yepi mi. Mi wani pruberi fu go na ini a yepi-pionierwroko baka.” A e gi wi deki-ati fu yere fa a sisa disi ben prisiri fu di a ben meki so wan muiti. A e gi spesrutu deki-ati na den wan di wani go na ini a yepi-pionierwroko trutru aladi den e siki.
6 Di wan brada lasi en wroko sondro taki a ben fruwakti dati, dan a meki gebroiki fu a situwâsi disi fu go na ini a yepi-pionierwroko. Na ini a mun di a brada disi ben de na ini a yepi-pionierwroko, a kon kisi moro faya gi a preikiwroko, èn na a kaba fu a mun a ben abi wan nyun bijbelstudie. Te a e denki baka fu na ondrofeni di a ben abi, dan a e taki: „Disi na wan mun di ben gi mi wini trutru!” A ben prisiri trutru fu a tiri nanga a yepi di a ben kisi fu Yehovah! Iya, Yehovah ben blesi a brada disi trutru fu a muiti di a ben meki na ini a preikiwroko, èn Yehovah sa du a srefi gi yu tu.—Mal. 3:10.
7 A no de wan makriki sani gi furu preikiman fu go na ini a yepi-pionierwroko. Ma aladi den abi frantwortu na ini na osofamiri noso na wrokope èn aladi densrefi abi tyalensi, toku furu brada nanga sisa ben man go na ini a yepi-pionierwroko. Te wi wani gi wan finifini kotoigi fu a bun nyunsu, dan furu tron wi abi fu gi wi ten nanga krakti di de tumusi prenspari. Ma den blesi di wi sa kisi warti moro leki iniwan tra sani.—Odo 10:22.
8 A bun fu go na ini maart nanga april na ini a yepi-pionierwroko. Feifi satra nanga sonde de na ini a mun maart. Den wan di e wroko furuten èn di wani go na ini a yepi-pionierwroko, kan meki bun gebroiki fu disi èn den kan go mofoneti na ini a preikiwroko. Boiti dati, yu kan meki bun gebroiki fu den fesadei di de na ini april. Sonwan kande abi fakansi fu skoro nanga grontapuwroko èn a sani disi e yepi den fu doro a marki fu 50 yuru. Yu man gebroiki wan fu den schema na ini na artikel disi di de gi den yepipionier, so taki yu man wroko 50 yuru na ini maart nanga april? Taki nanga yu osofamiri noso tra preikiman fu a schema fu yu. Te yu sa taki nanga den, dan disi sa gi den deki-ati fu go makandra nanga yu na ini a preikiwroko. Efu yu no man go na ini a yepi-pionierwroko, dan poti wan marki gi yusrefi na ini den mun disi èn horibaka gi den wan di de na ini a yepi pionierwroko. Sreka sani now so taki yu man du moro na ini a preikiwroko na ini maart nanga april.
9 Sori warderi gi a Memrefesa: Warderi gi a lusu-paiman e meki furu sma ’bai a ten’ fu go ibri yari na ini maart nanga april na ini a yepi-pionierwroko (Ef. 5:15, 16). A yari di pasa na ini Sranan, dan 134 yepipionier ben de na ini maart èn 584 na ini april. Dati wani taki dati sowan 359 sma ben go na ini a yepi pionier na ini ibriwan fu den tu mun disi. Teki dati gersi nanga sowan 73 sma di ben de na ini a yepi pionierwroko na ini den mun na fesi fu a dienstyari dati. Na ini a pisi ten fu a Memrefesa disi wan tra okasi de fu sori o dipi a warderi fu wi de gi a frulusu-ofrandi fu Krestes. Wi sa sori a warderi disi te wi e du moro na ini a preikiwroko.
10 Te 16 april e doro, dan prakseri dipi san a Memrefesa wani taki gi yu. Prakseri fu den sani di ben pasa fosi Krestes dede èn den sani di ben pasa te fu kaba di a dede. Denki dipi fu den sani di ben de na en prakseri èn den sani di ben de tapu en ati. Denki dipi fu a prisiri di Yesus ben o abi bakaten èn fa disi ben yepi en fu horidoro di den ben handri nanga en na wan ogrifasi. Prakseri fu a posisi di a abi now leki Edeman fu a gemeente, èn fa a e tiri a wroko di wi e du fu preiki èn meki disipel (1 Kor. 11:3; Hebr. 12:2; Openb. 14:14-16). Sori warderi gi ala sani di Krestes du fu di yu e du so furu leki yu man na ini a preikiwroko.
11 Gi trawan deki-ati fu gi wan finifini kotoigi fu a bun nyunsu: Owruman nanga dinari ini a diniwroko abi na okasi fu gi trawan na ini a gemeente deki-ati te densrefi e teki prati na ini a yepi-pionierwroko. Te den e wroko makandra nanga den preikiman na ini a preikiwroko èn te den e go fu luku den skapu, dan den abi wan moi okasi fu yepi trawan teki prati dorodoro na a spesrutu wroko disi. Meki wi alamala poti disi na ini begi so taki wi alamala e kisi moro krakti fu du muiti fu gi wan finifini kotoigi fu a bun nyunsu.
12 Aladi ala den owruman nanga dinari ini a diniwroko sa wroko makandra nanga den seti fu a gemeente fu du moro na ini a preikiwroko na ini den mun maart nanga april, dan spesrutu a dienstopziener abi a frantwortu fu seti sani bun fu go na ini a preikiwroko. A musu seti a dei, a yuru nanga a presi fu hori den velddienst konmakandra èn a sani disi musu fiti gi a moro bigi pisi fu den preikiman. Den seti disi musu meki bekènti na den Diniwroko Konmakandra doronomo. Sani kan seti fu hori den velddienst konmakandra na difrenti ten na ini wan dei. Na so wan fasi a heri gemeente kan kisi na okasi fu teki prati na difrenti fasi fu gi kotoigi. Den difrenti fasi disi kan de fu gi kotoigi na bisnispresi, na strati, na oso fu oso, na den go-baka, èn fu gi kotoigi nanga yepi fu telefon. Boiti dati, a musu sorgu taki na ini den mun dati nofo buku, tijdschrift nanga birti de pe a gemeente kan wroko.
13 Wi sa pristeri a Sabi-buku na ini a mun maart nanga a marki fu bigin nanga bijbelstudie. Na ini na inibere pisi fu Wi Kownukondre diniwroko fu yanuari 2002, moi eksempre gi fa fu prati a Sabi-buku. A pristeri fu april sa de A Waktitoren nanga Ontwaakt! Pruberi fu gebroiki den takimakandra di e kon na ini a pisi „Sani di yu kan fruteri fu den tijdschrift”. Ala sma musu teki ten fu sreka densrefi bun na fesi so taki den kan gi wan finifini kotoigi fu a bun nyunsu.
14 A de wan prisiri sani fu wroko na ondro a tiri fu na Edeman fu a gemeente, Krestes Yesus, èn wi abi a grani fu prati a bun nyunsu nanga trawan! Wi musu meki muiti baka fu meki den mun maart nanga april tron den moro bun mun di wi oiti ben abi na ini a preikiwroko. Te wi e du dati dan wi e gi yesi na a komando fu Krestes fu preiki èn fu gi wan finifini kotoigi fu a bun nyunsu.
[Faki na tapu bladzijde 4]
Difrenti schema di yu kan gebroiki na ini maart nanga april 2003 fu go na ini a yepi-pionierwroko
Dei Yuru
Munde 1 2 — — 2 —
Tudewroko 1 — 3 — — —
Dridewroko 1 2 — 5 — —
Fodewroko 1 — 3 — — —
Freida 1 2 — — — —
Satra 5 4 3 5 6 7
Sonde 2 2 3 2 2 3
Maart 56 56 54 55 50 50
April 50 50 51 53 — —
Wan fu den schema disi fiti gi yu?