Fa memre foe na osofamiri e wroko makandra foe abi wan prati dorodoro—Na a diniwroko
1 San ben sa kan waran wi ati moro, leki foe si masra nanga wefi, papa nanga mama nanga pikin e wroko makandra na ini a kresten diniwroko, e prèise a nen foe Jehovah na poebliki? (Ps. 148:12, 13) Ala osofamiri moesoe abi a gwenti foe abi wan prati doronomo na a velddienst. Joe osofamiri abi wan fasti dei ibri wiki foe abi wan prati na a diniwroko? Efoe dati de so, dan ibriwan sma sabi soifri sortoe sani den moesoe sreka èn den kan abi wan prati dorodoro na a preikiwroko.—Odo 21:5a.
2 Ala di joe e wakti a dei di joe sa go na ini a diniwroko leki osofamiri, dan foe san ede joe no e oefen den pristeri makandra di joe osofamiri sa gebroiki? A kan jepi joe te joe e poti ten na wan sei foe oefen, èn disi kan meki wan troetroe jeje kon di e sori taki na osofamiri e wroko makandra. A e gi troetroe satisfaksi te a heri osofamiri e wroko makandra na ini a velddienst èn te ala memre de srekasreka!
3 Wan opziener di e rèis ben wroko makandra nanga wan heri osofamiri foe doe a tijdschriftwroko. Di a ben wroko oso foe oso nanga wan foe den oemapikin, na oemapikin aksi en: „O langa joe o wroko nanga mi?” A ben froeklari taki a ben o wroko nanga en papa baka dati. A ben de krin taki na oemapikin nanga a papa foe en ben abi prisiri foe doe a diniwroko makandra. Disi na troetroe wan boen jeje di na osofamiri e sori!
4 Kande son osofamiri man doe a jepi-pionierwroko makandra wán moen na ini a jari. Noso kande soso wán memre foe na osofamiri kan de wan jepipionier doronomo, noso gi en nen srefi leki wan gewoon pionier. Te den e orga sani boen èn e wroko makandra na wan boen fasi, dan kande ala memre foe na osofamiri kan abi wan moro bigi prati na a diniwroko, foe di den e horibaka gi a wan di e pionier. Na osofamiri seiker sa kisi blesi foe di den e wroko moro tranga èn foe den boen ondrofeni ede di den abi na ini a diniwroko.—Mal. 3:10.
5 Te osofamiri abi wan prati dorodoro na a evangeliewroko, dan dati sa jepi den foe tan krosibei na makandra, foe tan de fajafaja, foe tan abi boen bakapisi, èn foe tan de kolokoe na ini a diniwroko foe Jehovah!—Teki gersi Filipisma 2:1, 2.