Nyun Spesrutu Dei-konmakandra Programa

A spesrutu dei-konmakandra programa di e bigin na ini september 1999 abi a thema: „Ondrosuku den Dipi Sani fu Gado” (1 Kor. 2:10). Sortu warti sani wi sa leri?

Ala di furu sma e suku sabi, toku den sani di den e feni no e gi den kowru-ati. Bijbel e gi wi krakti, soleki fa a kringopziener sa sori na ini a pisi fu en di abi leki titel „A E Gi Kowru-ati te Wi E Ondrosuku a Wortu fu Gado”. A fisiti takiman sa sori san na a koneksi na mindri a ondrosuku di wi e ondrosuku den dipi sani fu Gado èn a preiki fu a bun nyunsu, te a sa taki fu na aksi „Fa Yu E Si a Kownukondre Preikiwroko?”

Fa papa nanga mama kan yepi den pikin fu den fu diki dipi na ini a Wortu fu Gado? Bun rai sa gi na ini a pisi „Poti Gado Wortu na ini den Pikin fu Yu”. Demakandra nanga sma di lepi na yeye fasi na ini a gemeente, abi wan bun krakti na tapu den Kresten yonguwan. Eksempre fa sma abi bun krakti na den tapu, sa sori na ini a pisi „Yonguwan di E Leri fu den Moro Owruwan”.

Fu san ede wi musu suku fayafaya den yeye gudu di kibri, na ini a ten disi? Yehovah na a Sma di e tyari kibritori kon na krin. A fisiti takiman sa fruklari san Yehovah ben tyari kon na krin na ini owruten èn na ini a ten disi, na ini a lezing „Safrisafri Yehovah E Tyari Dipi Sani Kon na Krin”. Disi sa tranga a bosroiti di wi abi fu tan „ondrosuku den dipi sani fu Gado”.

Meki plan now fu fisiti a konmakandra. Den wan di wani sori nanga yepi fu dopu taki den gi den libi abra na Yehovah, musu taigi a fesiman opziener so esi leki a kan. Den sani di wi sa yere sa tranga na opregti angri di wi abi fu ondrosuku Gado Wortu finifini. ¡Fu dati ede, no misi a spesrutu dei disi pe yeye leri sa gi!