Suma Ben Sa Kan Teki wan Bijbelstudie?
1 A profeiti Amos ben fruklari taki wan angriten ben o de na ini a kondre Israèl, „a no wan angriten fu brede, èn a no wan dreiwatra fu watra, ma fu sma yere den wortu fu Yehovah” (Amos 8:11). Fu a bun fu den wan di e angri èn di e dreiwatra na yeye fasi, na organisâsi fu Yehovah e prati bun furu Bijbel publikâsi na heri grontapu.
2 Te nanga now, wi druk 70 milyun Sabi-buku nanga 91 milyun San Gado e aksi-brochure. Te wi e leri sma a waarheid, dan wi e kon frustan o makriki èn o bun den buku disi de. Ma trutru, ipi-ipi sma di kisi den publikâsi fu wi no studeri Bijbel nanga wi ete. San wi kan du ini a tori disi?
3 ¡Ibri Sma Di Teki Buku Kan Tron wan Studie! Prakseri na ondrofenitori fu wan preikiman di ben pristeri wan studie na wan uma a fosi leisi di a ben taki nanga en na en oso. Na uma ben teki a studie wantewante. Baka ten a ben fruteri a preikiman: „Yu na a fosi sma di oiti aksi mi fu studeri Bijbel nanga mi.” Na ini a kontren fu yu, ¿omeni sma di abi den publikâsi fu wi kaba ben sa kan taki a srefi sani? Na ibri sma di teki buku, yu abi na okasi fu tyari gobaka èn fu opo wan oso-bijbelstudie.
4 Fu di furutron wi e miti sma di abi den publikâsi fu wi kaba, fa wi kan wiki a belangstelling fu den fu kon sabi san de na ini den publikâsi fu wi? Sondro draidrai wán Kotoigi ben aksi wan ososma di ben de wan uma efu a ben abi iniwan Bijbel aksi, ma a ben kisi fu yere: „Nôno.” A sisa ben go doro: „Mi de seiker taki yu musu abi wan tu aksi.” Na uma ben abi aksi, èn a kon tron wan studie. Fu san ede yu no e aksi na ososma efu a ben o wani fu kon sabi san Bijbel e taki fu wan aksi noso wan afersi di a e broko en ede nanga en? Yu musu de srekasreka fu poti wan aksi di e wiki a belangstelling fu en efu a no man feni wan sani fu taki. Den sortu takimakandra disi kan opo a pasi fu hori wan studie doronomo fu den fondamenti waarheid fu Bijbel.
5 Bijbelstudie-wroko na a moro prenspari sani fu wi diniwroko. Fu di wi no sabi noiti suma ben sa kan teki wan studie, meki yu no musu draidrai fu aksi ibri sma di yu e miti. Taki nanga Yehovah fu na afersi na ini begi, èn du soleki fa yu begi. ¡Yu sa kon si heri esi kande taki wan sma di yu pristeri wan studie sa teki en!—1 Yoh. 5:14, 15.