Aksi Boksu

◼ Suma abi a frantwortu fu krin a Kownukondre zaal?

Wan Kownukondre zaal di krin èn di moi, abi wan bun krakti tapu a boskopu di wi e preiki (Teki gersi 1 Petrus 2:12.) A de trutru prenspari fu hori a zaal krin èn na wan orde fasi, èn ala sma kan abi wan prati ini a wroko fu sorgu fu a Kownukondre zaal. Wi no musu fruwakti taki wan tu sma nomo musu du ala a wroko. Furutron a krin fu a zaal seti so taki den Gemeente Bukustudie grupu du en, èn a bukustudie-leider noso a sma di e asisteri en e teki fesi. Ini zaal pe moro leki wan gemeente e kon makandra, dan den owruman sa orga sani so taki ala den gemeente abi wan prati fu sorgu fu a zaal.

Fa wi kan du a frantwortu disi na a moro bun fasi? A Kownukondre zaal musu krin nanga yepi fu wan schema fu du sani ala ten baka. Wrokosani musu de fu kan gebroiki fu e krin a zaal. Wan lijst nanga sani di musu du, musu anga na wan presi pe den wrokoman kan luku san de fu du. Yu kan abi tu lijst, wan gi wan pikin krin baka ibri konmakandra èn wan trawan gi wan moro finifini alawiki krin. A bukustudie-leider musu teki wan dei nanga yuru di bun gi ibri sma fu a bukustudie di kisi a wroko fu teki prati na a finifini krin fu a zaal. Prakseri musu poti doronomo fu sorgu a grasi, den bromki nanga den tra prani. Den presi pe sma e waka nanga den parkeerpresi musu de krin fu doti. Ala yari wi musu abi wan bigi krin, kande leti bifo a Memrefesa. Na a bigi krin disi, dan yu ben sa kan wasi den fensre noso shutter nanga den skotu, den tegel nanga den garden tu.

Ma wi alamala kan lekti a wroko, fu di wi no sa trowe kawgum noso tra doti inisei noso dorosei fu a zaal. Wi musu hori a toilet krin ibri leisi te wi gebroiki en so taki wi libi en krin gi wan tra sma. Luku bun taki yu no e broko den wrokosani noso den sani di de na ini a Kownukondre zaal. Poti prakseri na tegel nanga mata-mata di flaka, sturu di broko, problema nanga peipi di e leki, lampu di bron èn so moro fara. Baka dati taki so esi leki a kan fu den sani disi nanga a brada di abi a frantwortu fu na ondrow fu a Kownukondre zaal.

Meki wi alamala de klariklari fu du wi pisi fu a wroko. Disi e sorgu taki wi abi wan presi fu anbegi di e gi prisiri èn di e poti wi aparti leki wan krin pipel di e gi grani na Yehovah Gado (1 Petr. 1:16).