¿Yu Abi a Yeye fu Gi Yusrefi?
1 A warderi di wi e warderi san Yesus Krestes ben du gi libisma sondro fu denki ensrefi, musu meki wi alamala gebroiki den bekwaamfasi nanga a krakti fu wi na wan fasi di e sori taki wi e gi wisrefi. Den Buku fu Bijbel e gi wi a tranga: „Pristeri un skin leki wan ofrandi di de libilibi, santa èn e fiti Gado ai, wan santa diniwroko” (Rom. 12:1). Efu yu e ondrosuku yusrefi ten na ten, dan dati sa yepi yu fu si efu yu e sori a sortu yeye dati someni leki yu man du dati na ini a situwâsi fu yu.
2 Te Yu E Suku Sabi fu Bijbel: ¿Yu poti ten na wan sei fu leisi Bijbel èn fu studeri gi yusrefi doronomo? ¿Yu e hori yusrefi na a schema dati? ¿Yu abi a gwenti fu sreka yusrefi bun gi den gemeente konmakandra? ¿Efu yu na wan osofamiri edeman, dan yu abi wan bijbelstudie nanga yu osofamiri doronomo? Te yu o du den sani disi, dan kande a ben sa wani taki dati yu musu teki ten fu a ten di yu e sidon na fesi a telefisi noso a computer noso yu musu teki ten fu tra sani di yu ben sa wani du. Ma disi na trutru wan pikin fasi nomo fu gi yusrefi, te wi sabi taki a ten di wi e gebroiki gi a Wortu fu Gado e tyari wi go na têgo libi.—Yoh. 17:3.
3 Te Yu E Leri Yu Pikin: A moro bun ten taki sma kan bigin leri a fasi fa den musu gi densrefi na te den de pikin-nengre. Leri den pikin fu yu taki ala di wan ten de fu prei, toku wan ten musu de tu fu wroko èn fu du theokrasia wroko (Ef. 6:4). Meki den yepi pikinso nanga oso wroko. Seti en so, taki yu kan abi wan prati na a diniwroko doronomo nanga yu pikin. Poti moro krakti tapu a rai di yu e gi fu di yusrefi de wan bun eksempre.
4 Te Yu E Du Wroko fu a Gemeente: A sa go moro bun nanga wan gemeente te ibriwan sma na ini a gemeente e gi densrefi fu doro marki fu a bun fu ala sma (Hebr. 13:16). ¿Yu sa man wroko moro langa na ini a Kownukondre preikiwroko èn a wroko fu meki disipel? ¿Yu kan gi yu nen fu yepi den siki sma noso den owru sma, kande fu tyari den go na den konmakandra?
5 Bifo Yesus ben tyari a moro prenspari srakti-ofrandi leki libisma, dan a ben gi den disipel fu en a rai fu poti prakseri na den afersi fu a Kownukondre, èn na so wan fasi den ben musu meki taki ala tra sani na ini a libi kon baka dati (Mat. 6:33). Efu wi e suku fu kisi so wan yeye fu gi wisrefi, dan disi sa meki wi kon abi a moro bigi koloku, ala di wi e go doro fu dini Yehovah nanga prisiri.