„Wan Wortu Di Taki na a Yoisti Ten”
1 A de wan tyalensi gi yu fu prati a boskopu fu libi nanga tra sma? Yu e firi taki yu musu taki wan kefalek koni sani fu man naki na ati fu den sma di e arki yu? Di Yesus ben seni den disipel fu en fu go preiki, a taigi den: „Un preiki te unu de na pasi èn taki: ’A kownukondre fu hemel kon krosibei’”(Mat. 10:7). A boskopu no ben frekti èn a no ben muilek fu prati en nanga trawan. A de a srefi na ini a ten disi.
2 Furutron wan tu wortu nomo de fanowdu fu bigin wan takimakandra. Di Filipus ben miti na eunuch fu Etiopia, dan a aksi en: „Yu e frustan san yu e leisi?” (Tori. 8:30) A takimakandra di ben de a bakapisi fu „wan wortu di taki na a yoisti ten”, fu tru ben tyari wini kon!—Odo 25:11.
3 Yu kan bigin wan takimakandra na a srefi fasi na ini yu diniwroko. Fa yu kan du dati? Yu kan du dati fu di yu e arki bun èn fu di yu e gebroiki wortu di fiti gi a situwâsi dati. Poti wan aksi èn arki a piki fu a sma.
4 Wan Tu Prenspari Aksi: Fu bigin wan takimakandra, yu kan gebroiki iniwan fu den aksi disi:
◼ „Yu e gebroiki a Begi fu Masra (noso, Wi Tata) ini yu anbegi?” (Mat. 6:9, 10) Meki na arkiman yere wan pisi fu a begi disi, èn taki baka dati: „Wan tu sma e aksi, ’San na a nen fu Gado di Yesus taki a musu kon santa?’ Tra sma e aksi, ’San na a Kownukondre di Yesus taki wi musu begi fu en?’ Yu kisi bun piki tapu den aksi disi?”
◼ „Yu aksi yusrefi wan leisi kaba: ’Fu san ede wi e libi?’” Sori a sma taki a tori disi abi fu du nanga a sabi di sma musu sabi Gado.—Preik. 12:13; Yoh. 17:3.
◼ „Yu denki taki oiti dede no sa de moro?” Gebroiki Yesaya 25:8 nanga Openbaring 21:4 fu gi a sma wan piki di a kan frutrow.
◼ „Wan makriki fasi de fu puru a bruya di de na grontapu?” Sori a sma taki Gado e leri wi fu „lobi a sma na yu sei”.—Mat. 22:39.
◼ „A de so taki wan rampu na ini na universum sa pori wi grontapu wan dei?” Meki a kon sabi a pramisi di Bijbel e gi taki a grontapu sa tan fu têgo.—Ps. 104:5.
5 Preiki a bun nyunsu na wan makriki fasi di e meki taki sma e frustan sani wantron, èn so srefi bigin wan takimakandra nanga switifasi. Yehovah sa blesi a muiti di yu e du fu prati srefi „wan wortu” fu a waarheid nanga trawan.