„Pe Mi O Feni a Ten?”

¹ Na dati furu fu wi lobi fu taki, fu di wi abi so furu sani fu du na ini a libi. Sma taki dati ten na wan fu den moro prenspari sani di wi abi èn so srefi wan fu den sani di e pasa gowe gawgaw. So bun, pe wi o feni a ten fu du sani di prenspari trutru, soleki fu leisi èn studeri Gado Wortu?​—Fil. 1:10.

² A prenspari sani no de taki wi e pruberi fu feni moro ten, ma taki wi musu bosroiti san wi wani du nanga a ten di wi abi. Wi alamala abi 168 yuru wan wiki. Wi e gebroiki so wan 100 yuru fu a ten disi fu sribi èn fu wroko. So bun, fa wi kan gebroiki a ten di tan abra na a yoisti fasi? Efeisesma 5:15-17 e gi leki rai fu no waka ’leki sma di no koni, ma leki sma di koni, fu di wi e bai a yoisti ten gi wisrefi . . . èn e tan si krin san na a wani fu Yehovah’. Disi e sori taki wi musu gebroiki ibri okasi fu du den sani di prenspari na Yehovah ai.

³ Yesus ben agersi den dei fu wi nanga di fu Noa (Luk. 17:26, 27). Den sma di ben e libi na a ten dati ben e poti prakseri soso na den aladei sani fu a libi. Ma Noa ben feni ten fu bow wan kefalek bigi ark èn a ben feni ten fu preiki tu (Hebr. 11:7; 2 Petr. 2:5). Pe a ben feni a ten fu du dati? We, a ben poti a wani fu Gado na a fosi presi na ini en libi èn a ben gi yesi na Gado fu du sani „leti so”.​—Gen. 6:22.

⁴ San Musu Kon na a Fosi Presi? Yesus ben taki: „Libisma no musu libi fu brede wawan, ma fu ibri wortu di e kon fu Yehovah en mofo” (Mat. 4:4). Ibri wiki wi e kisi yeye ’nyanyan na a reti ten’ (Luk. 12:42). Efu wi wani kisi wini trutru fu a yeye nyanyan disi, dan wi musu poti ten na wan sei fu leisi èn fu studeri doronomo, so taki wi kan teki ala den leri disi na ini wi. Fu di wi abi furu warderi gi a yeye nyanyan di wi e kisi, meki wi no e si dati leki nyanyan di wi musu nyan esi-esi; wi no wani leisi frafra leki son sma di lobi fu nyan esi-esi. Ma na presi fu dati, te wi e warderi a yeye nyanyan, dan dati e meki taki wi e teki ten fu studeri èn fu nyan bun fu den sani di wi e studeri.

⁵ Te wi e teki yeye nyanyan na ini wi, dan dati kan meki taki wi o kisi têgo libi (Yoh. 17:3). Ma a musu teki wan prenspari presi na ini wi aladei libi. Wi o man feni a ten fu leisi Bijbel ibri dei? Wi o man feni a ten fu sreka wisrefi tu gi den Kresten konmakandra? Iya wi man. We, dan wi o kisi a „bigi paiman” di den sma e kisi di sabi Gado èn di e du a wani fu en.​—Ps. 19:7-11.