„Du muiti ala ten fu du san bun”
1 A libi fu wan Kresten e aksi fu en taki a musu ’du muiti ala ten fu du san bun gi ala sma’ (1 Tes. 5:15). Te wi de na den distrikt kongres fu wi, dan wi abi furu okasi fu du bun gi trawan. Na den momenti dati ala sma e luku wi, èn ala sma di e miti wi e krutu wi akruderi a fasi fa wi e libi nanga den. Wi kan tan hori wan bun nen leki Kotoigi fu Yehovah, ma dan wi abi fu sori nanga a fasi fa wi e tyari wisrefi taki wi e „gi grani na ala sortu sma” (1 Petr. 2:17). Dati wani taki sosrefi dati wi „no e luku soso [wi] eigi afersi, ma sosrefi den di fu trawan” (Fil. 2:4). Luku san disi abi fu du nanga den sani di seti gi den wan di aksi fu sribipresi di de krosibei fu a presi pe a kongres e hori, awinsi a de na ini wan hotel noso na ini na oso fu wan sma.
2 Leri den pikin fu yu fa fu du bun: Son leisi a pasa taki pikin gi sma bigi problema, fu di den ben tan den wawan na ini wan hotel noso na ini na oso fu wan sma, sondro taki bigisma ben de fu luku den (Odo 29:15). Fu eksempre na ini Amerkankondre, wan tu sani ben pasa pe papa nanga mama ben go du tra sani, aladi den libi den pikin na ini a kamra fu den, sondro taki wan sma ben de fu luku den, noso den libi den pikin na presi pe sma e swen, noso kande na wan tra presi na ini a hotel. Son leisi a pasa taki den pikin tyari densrefi na so wan fruferi fasi taki den sma fu a hotel ben abi fu taki dati den pikin dati no ben musu go moro na son presi na ini a hotel. Son leisi den ben abi fu go so fara srefi taki den tapu a swen presi noso tra presi pe sma kan go fu du wan prisiri sani, so taki nowan sma no ben man go drape moro. A sani disi no ben switi gi den tra fisitiman na ini a hotel; a no ben switi gi den Kotoigi, èn a no ben switi gi den sma di no de Kotoigi.
3 Papa nanga mama, fosi a kongres hori, a bun fu teki pikinso ten fu sidon taki nanga den pikin fu unu fu a fasi fa wan Kresten musu tyari ensrefi alaten èn na ala sei (Ef. 6:4). Fruteri den fu eksempre taki tru Kresten lobi „no e tyari ensrefi na wan fasi di no e fiti, no e suku en eigi wini nomo, no e kisi atibron” (1 Kor. 13:5). Bigisma kan meki den wortu disi abi moro krakti efu den gi den pikin fu den wan bun eksempre. Pikin, unu kan meki muiti fu du bun sani fu di unu e gi yesi na unu papa nanga mama, aladi unu e sori lespeki gi den sani fu den sma pe unu e tan, èn fu di unu e hori den tra sma na prakseri di de drape lontu unu (Kol. 3:20). Te wi e meki muiti leki wán man fu du bun gi ala sma, dan wi e „meki a leri fu wi Frulusuman, Gado, kon moi na ini ala sani”.—Tit. 2:10.
4 A moi fasi fa wi e tyari wisrefi no abi krakti wawan tapu den sma di e luku wi, ma sosrefi tapu den wan di lobi fu suku fowtu na wi tapu fu wan noso tra reide ede. Awinsi san wi e du te wi de na a kongres èn na ini a foto pe a kongres e hori, efu na waka wi e waka na strati, efu na nyan wi e nyan, noso kande wi e rostu pikinso na ini a hotel noso na ini na oso fu sma pe wi e tan, awinsi wi e du okasi preiki, leki Kresten a fasi fa wi e taki èn a fasi fa wi e tyari wisrefi musu sori taki wi wani tan du san bun.
[Faki na tapu bladzijde 4]
Grantangi no frigiti disi:
Den wan di e sorgu gi sribipresi gi sma di musu go na a kongres, sa meki muiti fu sorgu gi bun tanpresi gi den preikiman di abi a yepi dati fanowdu. Den preikiman disi kan taki nanga a sekretarsi fu a gemeente fu a problema fu den. A sekretarsi musu taki nanga a Dienstkomte fu a gemeente fu luku efu wan sani de di a gemeente srefi kan du fu yepi den preikiman fu sorgu gi den eigi sribipresi. Efu a gemeente no man gi a yepi dati, dan a sekretarsi kan gi a sma a papira di nen Kameraanvraagformulier voor bijzondere omstandigheden (Papira fu aksi sribipresi gi sma di abi spesrutu nowtu). Soso den wan di abi spesrutu nowtu kan kisi a papira disi. A sma di e aksi fu a sribipresi musu piki den sani di den e aksi na tapu a papira. Dan a musu gi a papira baka na a sekretarsi di sa luku efu a sma piki ala sani di den aksi, efu den sani skrifi bun, èn a sa luku efu a de so tru taki a sma disi kan kisi a yepi di a e aksi fu dati. Tapu a papira yu abi wan presi pe a sekretarsi musu FRUTERI FINIFINI na ini sortu problema a sma de. Ala den sani disi wi musu seti langa ten bifo a kongres hori. Dan a sekretarsi sa seni a papira go na den wan di e sorgu gi sribipresi. Wantewante baka dati a sma di ben aksi fu a sribipresi sa yere san den sreka gi en.