De wan eksempre na ini a du fu bun wroko
1. Fu san ede wi musu luku bun spesrutu fa wi e tyari wisrefi na a distrikt kongres?
1 Te wi e kon makandra na ini wan bigi grupu na a distrikt kongres, dan sma e luku spesrutu fa wi e tyari wisrefi èn fa wi e handri nanga trawan. Fu dati ede ibriwan fu wi musu gi yesi na a frumane di Bijbel e gi: ’Abi wan krin frustan, gi na eksempre na ala fasi, so taki sma kan sabi fa fu du bun’ (Tit. 2:6, 7). Kande wi musu du moro muiti fu ’no poti prakseri na wi eigi afersi wawan, ma wi musu poti prakseri na den afersi fu trawan tu’ (Fil. 2:4). Meki wi poti prakseri na wan tu fasi fa wi kan gebroiki a deki-ati disi na a „Gi Gado glori” Distrikt Kongres di e kon.
2. Sortu sani wi musu hori na prakseri di abi fu du nanga sani di seti gi sribipresi?
2 Sani di seti gi sribipresi: Efu yu abi wan bun nen na ini a gemeente èn efu yu abi spesrutu yepi fanowdu di yu noso a gemeente fu yu no man gi, dan yu kan aksi yepi fu kisi wan sribipresi. Grantangi no wakti te yu doro na a kongres fu aksi wan sribipresi. Den brada di e sreka sribipresi sa du ala san den man fu yepi yu. Grantangi teki a sribipresi di den feni gi yu, fu di den wroko tranga fu sreka den seti disi. Fu di a muilek fu gi wan bigi grupu sma sribipresi na wán presi, meki a sa de bun te yu sreka pikin grupu fu tu te go miti fo sma. Disi sa meki en moro makriki fu sreka sribipresi gi a grupu fu yu.
3. Fa wi kan sori taki wi e hori na ososma na prakseri?
3 Te yu feni wan sribipresi na wan sma oso, dan a de wan bun sani fu kontakti na ososma pe yu o tan, fu taigi en tapu sortu dei èn o lati yu sa doro drape. Sensi yu na wan fisitiman na ini den oso, dan gebroiki koni fu suku wan bun ten fu doro na oso so taki yu no e meki en muilek gi den ososma. Wi musu sori taki wi no e denki wisrefi nomo te wi e gebroiki den sani di seti gi a mamanten nyanyan. A no ben o fiti fu fruwakti taki na ososma pe wi e tan sa sorgu gi nyanyan di wi kan tyari go na a kongres. Den ososma sa warderi en te wi e sori taki wi e hori den na prakseri, fu di wi e sorgu taki a kamra e tan krin. A fasi fa yu e handri nanga na ososma èn a fasi fa yu e tyari yusrefi aladi yu e tan na en oso musu sori taki yu e libi akruderi den moi Kresten gronprakseri nanga maniri.—Gal. 5:22, 23.
4, 5. Fa pikin kan prèise Yehovah èn sortu frantwortu papa nanga mama abi?
4 Papa nanga mama èn den pikin fu den: Ini wan grontapu pe someni yongusma no abi bun maniri, den pikin fu wi e sori krinkrin taki den de tra fasi. A fasi fa den e tyari densrefi e prèise Yehovah nanga na organisâsi fu en. Son tron problema kon fu di sma no ben luku den pikin bun (Odo 29:15). Papa nanga mama no musu libi den pikin fu den wawan na a presi pe den e tan èn na presi pe a kongres e hori.
5 Fosi a kongres, son papa nanga mama ben feni en wan bun sani fu memre den pikin fu den fa den musu tyari densrefi èn san den e fruwakti fu den (Ef. 6:4). Den e yepi den pikin fu frustan taki trutru Kresten lobi „no e tyari ensrefi na wan fasi di no e fiti” noso a „no e suku en eigi bun nomo” (1 Kor. 13:5). A distrikt kongres na a ten di wi e gebroiki fu kisi leri fu Yehovah, èn pikin èn sosrefi papa nanga mama kan sori taki den abi lespeki gi den sani di seti. Den kan sori dati na a fasi fa den e tyari densrefi na a presi pe a kongres e hori, ma sosrefi na tra presi.—Yes. 54:13.
6. Te wi e tyari wisrefi na wan bun fasi, dan sortu bakapisi a kan abi tapu trawan?
6 Nanga a fasi fa wi e tyari wisrefi wi kan du furu fu puru fowtu prakseri di sma abi èn wi kan hari sma kon na a tru anbegi (Mat. 5:16; 1 Petr. 2:12). Meki ala den sma di wi sa miti na a distrikt kongres kisi wan bun kotoigi fu a fasi fa wi e tyari wisrefi èn fu a fasi fa wi e handri nanga den. Na a fasi disi wi de ’wan eksempre ini a du fu bun wroko’ èn wi e gi Yehovah glori.—Tit. 2:7.
[Faki na tapu bladzijde 4]
Hori tra sma na prakseri
▪ Grantangi teki a sribipresi di den seti gi yu
▪ Meki na ososma kon sabi o ten èn o lati yu sa go na den
▪ No fruwakti taki a sma pe yu sa tan sa sorgu gi nyanyan
▪ Luku yu pikin na wan bun fasi
▪ Sorgu taki a kamra pe yu e sribi e tan krin