Wi musu de santa na ini ala san wi e du
1. Fu san ede a de prenspari fu de santa na ini ala san wi e du?
1 Leki dinari fu Yehovah, a santa Gado, wi wani de santa na ini ala san wi e du (1 Petr. 1:15, 16). Disi wani taki dati wi e meki muiti fu hori wisrefi na den markitiki fu Yehovah na ini ala san wi e du. Na a distrikt kongres fu a yari disi, wi sa kisi a spesrutu okasi fu sori taki wi e tyari wisrefi na wan santa fasi.
2. Te wi de na a konmakandra-presi, dan fa wi kan tyari wisrefi na wan fasi di fiti?
2 Na a kongres: Spesrutu na a presi pe a kongres sa hori, wi musu tyari wisrefi na wan bun fasi. Grantangi, wroko makandra nanga den brada di e dini leki yepiman na a parkeerpresi èn na ini a konmakandra-presi (Hebr. 13:17). Memre fu wán osofamiri musu sidon sei makandra, na presi taki den pikin go sidon nanga tra yonguwan, noso tra tini. Yu no musu poti sani soleki cassette-recorder nanga felem-kamera na a stroom, noso na den apparaat di den brada e gebroiki fu meki sma yere a programa bun. A no abi trobi te sma e meki felem noso e teki a programa tapu cassette lolo, ma den musu du dati sondro fu hari sma prakseri. Efu yu o meki fowtow aladi a programa e hori, dan yu no musu meki a kamera koti faya te yu e puru fowtow. Cellulair telefon musu seti na so wan fasi taki den no e puru sma prakseri na a programa. Efu wan sma kisi mankeri na a presi pe a kongres e hori, dan yu kan taigi a brada di e teki fesi na a E.H.B.O.-afdeling (Eerste hulp bij ongelukken). Sma de drape di kan yepi te wan sma siki.
3. Fa a fasi fa wi e tyari wisrefi e gi Gado glori na a kongres?
3 A fasi fa wi e tyari wisrefi e meki wi de tra fasi leki sma fu a grontapu disi èn wi e gi a Gado fu wi glori (1 Petr. 2:12). Na a kongres, sma sa man si fa Yehovah Kotoigi e tyari densrefi. Fu dati ede, abi a fasti bosroiti fu de santa na ini ala san yu e du.
[Faki na tapu bladzijde 5]
Tyari yusrefi na wan santa fasi
◼ Luku den pikin fu yu bun
◼ Hori trawan na prakseri