Poti yeye marki gi yusrefi
1 A sa de wan bigi grani fu prèise Yehovah fu têgo! Ma fu kisi a blesi dati, dan wi kan poti yeye marki nownow gi wisrefi èn wi kan wroko tranga fu man doro den. Disi sa meki taki wi sa man gebroiki wi krakti tapu wan koni fasi (1 Kor. 9:26). Sortu marki di yu kan doro yu kan poti gi yusrefi?
2 Bijbelstudie: Yu e sreka yusrefi gi ala den gemeente konmakandra? Efu dati de so, yu e teki ten fu ondrosuku sani finifini èn fu denki dipi fu den sani di yu e studeri? Leki eksempre, te yu e sreka yusrefi gi a Waktitoren-studie nanga a Gemeente Bukustudie, dan a de so taki yu e hari soso lin na ondro den piki? Noso yu e suku ala den bijbeltekst di skrifi? Yu e teki ten fu denki dipi fu ala den fruklari san gi? Yu ben man meki muiti fu ondrosuku wan tu penti ibri wiki fu a pisi fu Bijbel di wi musu leisi gi a Theokrasia Diniwroko-skoro? A e teki furu ten nanga muiti te wi e ondrosuku yeye afersi, ma a e tyari furu blesi kon.—Odo 2:4, 5.
3 Gemeente konmakandra: Wan tra marki di wi kan poti, na fu go na ala den feifi gemeente konmakandra doronomo. Te wi e doro fruku na den konmakandra disi, dan wi kan gi a gemeente krakti, bika wi man abi demakandra nanga tra Kresten èn wi kan teki prati na a fosi singi èn na a fosi begi. Wi kan meki muiti tu fu gi komentaar na ala den konmakandra èn sosrefi fu gi moro bun komentaar. Kande yu kan sori san wan tekst ini a paragraaf abi fu du nanga a takimakandra, noso kande yu kan sori fa wi kan fiti den rai na ini wi aladei libi.—Hebr. 10:24, 25.
4 Preikiwroko: A preikiwroko fu wi e kon moro bun te wi e poti yeye marki. Omeni yuru yu man poti leki marki fu doro ala mun? Son sma e feni en wan yepi te den e du disi. Kande yu kan du moro na ini a fasi fa yu e du a preikiwroko. Kande yu man gebroiki a Bijbel ini na oso-fu-oso wroko. Kande yu man tyari moro bun gobaka na sma èn pruberi fu bigin wan bijbelstudie. Noso kande yu man gi moro bun leri te yu e studeri nanga sma.
5 Papa nanga mama, yu e gi yu pikin deki-ati fu poti marki na ini a diniwroko fu Yehovah? Yepi den fu frustan taki te den e dini leki pionier, zendeling noso leki memre fu a Bethelfamiri, dan dati na wan tumusi bun fasi fu sori taki den abi dipi warderi gi Yehovah.—Preik. 12:1.
6 Te wi e ondrosuku a wroko fu wi, dan wi musu poti marki gi wisrefi èn meki muiti fu man doro den. Te wi e du disi, dan wi sa kisi moro bigi prisiri na ini wi diniwroko èn wi sa gi trawan deki-ati tu.—Rom. 1:12.