Sori warderi gi den theokrasia yepisani
1 Di Kownu Yosia ben seti sani fu meki a tempel bun baka, a prèise den sma di ben o du a wroko. A taki: „Den sma di kisi a moni no abi fu gi frantwortu gi dati, bika den e wroko na ini getrowfasi” (2 Kow. 22:3-7). A fasi fa den man disi ben gebroiki a moni di den kisi, ben sori krin taki den ben abi warderi gi santa sani. Na ini a ten disi, te wi e du a santa wroko fu a bun nyunsu fu Gado, dan wi tu musu sori taki wi de getrow na ini a fasi fa wi e gebroiki den yepisani di wi kisi.
2 Na ini a preikiwroko: Wi e warderi a tumusi prenspari boskopu di de fu feni na ini den publikâsi fu wi, èn wi e frustan taki furu moni de fanowdu fu tyari den kon na doro. Dati meki wi e warderi den publikâsi sote. Fu dati ede, wi no musu prati den publikâsi fu wi gi ibri sma di wi miti, sondro fu si fosi efu a sma e sori trutru warderi gi a boskopu fu a Bijbel. Te wi si taki wan sma e sori pikinso warderi nomo, dan wi kan gi en wan traktaat na presi fu wan buku noso tijdschrift.
3 Wi musu prati den tijdschrift na wan fasi di e sori taki wi sabi o warti den de. Wi no musu libi den publikâsi fu wi na presi pe furu sma e kon, pe sma o panya den go na wan sei nomo. Luku fosi omeni èn sortu publikâsi yu abi na oso, bifo yu e teki moro publikâsi. Na a fasi disi yu e sorgu taki yu e gebroiki ala den tijdschrift bun. Te yu e si taki furu tron yu abi tumusi furu tijdschrift di yu no e gebroiki, dan yu kan bosroiti fu no teki so furu moro.
4 Publikâsi di yusrefi e gebroiki: Wi musu aksi soso den tijdschrift noso buku di wi e gebroiki trutru. Wi musu hori na prakseri taki wi no wani teki publikâsi fu soso, spesrutu den luxe Bijbel, Studiebijbel met verwijzingen, nanga tra bigi buku soleki a Concordance, na Index, den tu Inzicht-buku, nanga a Verkondigers-buku. Furu moni de fanowdu fu meki den buku disi.
5 Yu abi a gwenti fu skrifi yu nen nanga yu adres na ini den publikâsi di yusrefi e gebroiki? Disi kan yepi yu fu no lasi yu buku so gaw, so taki yu abi trawan fanowdu. Te yu lasi yu singi buku, yu Bijbel, noso wan tra publikâsi, dan kande yu kan feni en na mindri ala den sani di sma lasi èn di tra sma feni, na a Kownukondre zaal, noso na a presi pe wi e hori den bigi konmakandra.—Luk. 15:8, 9.
6 Meki wi pruberi fu gebroiki den publikâsi na wan bun fasi. Te wi e du disi, dan wi e sori taki wi de getrow na ini a fasi fa wi e gebroiki den yepisani di Yehovah e gi wi.—Luk. 16:10.