Leri trawan a soifri tongo
1 Aladi Yehovah Kotoigi na sma di komoto na furu ’kondre, lo, pipel nanga tongo’, toku den na wan pipel di de na ini wánfasi; den de na ini wan trutru bradafasi na heri grontapu (Openb. 7:9). Disi na wan tumusi aparti sani na ini a ten disi pe so furu pratifasi de na grontapu. Fa disi kan? Disi kan fu di wi e „taki wan soifri tongo”.—Sef. 3:9.
2 Tumusi bun bakapisi: San na a soifri tongo disi? A soifri tongo na a yoisti sabi fu a waarheid di abi fu du nanga Yehovah èn nanga den sani di a abi na prakseri. Den sani disi de fu feni na ini a Wortu fu Gado, spesrutu a waarheid di abi fu du nanga a Kownukondre fu Gado. Soleki fa Yesus ben taki na fesi, dan a waarheid disi e prati gi ala sma nanga yepi fu a wrokosani fu en na grontapu di ala sma kan si, namku „a getrow èn koni srafu”. Disi abi leki bakapisi taki sma „fu ala tongo fu den nâsi” e kon na ini a tru anbegi.—Mat. 24:45; Sak. 8:23.
3 Te sma e leri a soifri tongo, dan disi e meki taki den wani tyari den libi akruderi den markitiki fu Yehovah. Den e leri fu de „na ini wánfasi soleki fa a fiti, nanga a srefi denki èn nanga a srefi fasi fu prakseri” (1 Kor. 1:10). A leri di den e kisi fu Gado e meki taki den e tyari densrefi na wan yoisti fasi, den e taki fu sani di fiti èn di de tru, spesrutu te den e fruteri trawan fu a bun nyunsu (Tit. 2:7, 8; Hebr. 13:15). Te sma e tyari den sortu kenki disi kon, dan dati e gi Yehovah glori.
4 Fu eksempre, wan man di ben yere a bun nyunsu ben abi furu aksi. Nanga yepi fu Bijbel a ben kisi piki tapu ala den aksi fu en. Den sani di a yere ben naki en ati. A bigin studeri tu leisi ini wan wiki èn a bigin go na den konmakandra. A ben fruwondru taki sma ben gi en so wan switikon na a Kownukondre zaal, fu di furu sma di ben de drape ben de fu difrenti ras. Na ini wan syatu pisi ten, en nanga a wefi fu en ben tyari kenki kon na ini den libi èn den teki dopu. Sensi a teki dopu, a yepi sowan 40 sma èn sosrefi furu famiriman, fu dini Yehovah. Aladi a siki, toku no so langa pasa a bigin dini leki wan pionier.
5 Gi trawan leri: Den sani di e pasa na grontapu e meki taki furu opregti sma ondrosuku finifini baka efu a fasi fa den e denki èn e libi, bun. Neleki Yesus, wi musu wani yepi den sortu sma disi. A de prenspari fu tyari gobaka èn fu hori bijbelstudie nanga den opregtiwan disi. Te wi e du dati, dan wi sa yepi den fu leri sabi a soifri tongo.
6 Wan fasi fu taki nanga sma di abi furu fu du, na fu hori wan syatu bijbelstudie nanga den, aladi yu de na den mofodoro. A sani disi e wroko furu tron (km 5/02 blz. 1). Yu pruberi disi kaba? Te yu e sreka yusrefi fu go baka na a sma, dan yu kan gebroiki wan penti di e fiti na ososma. Yu kan teki dati puru fu na inibere pisi fu Wi Kownukondre diniwroko fu yanuari 2002. Furu fu den rai di gi drape, sa yepi yu fu abi wan takimakandra nanga a sma fu a San Gado e aksi-brochure noso a Sabi-buku. Sreka yusrefi bun so taki yu kan bigin nanga a takimakandra sondro fu wakti tumusi langa fu go doro fu taki fu wan fu den paragraaf. Leisi èn taki fu wán noso tu bijbeltekst di de na ini a paragraaf. Baka dati yu kan tapu a takimakandra nanga wan aksi di yu e poti gi a sma. Te yu go baka, dan disi sa yepi yu fu taki nanga a sma fu a paragraaf di yu wani taki nanga en.
7 A pipel fu Yehovah e kisi furu blesi fu di den e leri a soifri tongo. Meki wi de fayafaya fu yepi trawan, so taki makandra nanga wi den kan ’kari a nen fu Yehovah’ èn ’dini en leki wán man’.—Sef. 3:9.