Yu kan seti sani so taki wan gemeente konmakandra e hori na yu oso?
1 Na ini a fosi yarihondro, furu Kresten ben gi okasi fu a gemeente gebroiki den oso fu den fu hori gemeente konmakandra (1 Kor. 16:19; Kol. 4:15; Fileim. 1, 2). Na ini son gemeente na ini a ten disi, nofo presi no de fu hori Gemeente Bukustudie grupu èn preikiwroko konmakandra. A bakapisi fu disi kan de taki son bukustudie grupu abi 30 noso moro sma. Wi ben kisi a rai fu abi sowan 15 sma na ini wan bukustudie grupu, sobun a nomru fu 30 sma pasa a nomru fu 15 sma krinkrin.
2 Wan tumusi moi grani: Noiti yu no prakseri fu seti sani so taki wan Gemeente Bukustudie kan hori na yu oso? Efu yu abi wan kamra di bigi nofo, di krin, di abi nofo faya, èn di no banawtu, dan dati kan de wan bun konmakandra presi. A de wan bigi grani fu abi wan bukustudie na ini yu oso, fu di a bukustudie na wan gemeente konmakandra èn a de wan fu den sani di Yehovah seti fu gi en pipel leri. Furu brada nanga sisa taki dati den kisi furu wini na yeye fasi di den gi a gemeente okasi fu gebroiki den oso na so wan fasi.
3 Efu yu denki taki yu abi wan kamra di fiti fu hori konmakandra, dan grantangi, meki den owruman sabi disi. Kande den e suku so wan presi. Awinsi den no sa gebroiki en fu hori bukustudie, toku kande den sa gebroiki en fu hori preikiwroko konmakandra. Ma awinsi den owruman no abi a presi fanowdu wantewante, toku den sa breiti fu sabi taki yu abi so wan presi. Kande bakaten yu o kisi a grani fu abi wan bukustudie na yu oso.
4 Sori bun maniri: Den wan di e kon makandra na a oso fu wan brada noso wan sisa, no musu fasifasi den sani fu a brada noso a sisa dati. Papa nanga mama musu sorgu taki den pikin e tan na a presi pe a konmakandra e hori; den no musu go na tra pisi fu na oso. Den musu hori den birtisma na prakseri tu fu di den e sorgu taki den no e du wan sani di den sma disi sa feni fruferi.—2 Kor. 6:3, 4; 1 Petr. 2:12.
5 Hebrewsma 13:16 e gi wi a deki-ati fu no frigiti „fu du bun èn fu prati sani nanga trawan, bika den sortu ofrandi dati e plisi Gado srefisrefi”. Te yu e gi okasi fu a gemeente hori wan konmakandra na yu oso, dan dati na wan moi fasi fu prati bun sani nanga trawan èn fu „gi Yehovah grani nanga den warti sani fu yu”.—Odo 3:9.