Yehovah musu kisi bun furu prèise
A Memrefesa sa hori tapu 16 april
1 Wi de srekasreka èn wi e prisiri moro nanga moro te 16 april 2003 e doro. Na a neti dati wi sa memre a dede fu Yesus. Makandra nanga den milyunmilyun tra anbegiman di de na heri grontapu, wi sa prèise Yehovah en nen. Yehovah abi a grani fu kisi prèise fu wi alamala fu di a seti sani gi wi nanga yepi fu a lusu-paiman. Nanga yepi fu a lusu-paiman a sa gi a heri libisma famiri di e gi yesi, tumusi moi blesi. Nanga wi heri ati wi sa taki a srefi sani di a psalm skrifiman ben bari taki: „Yehovah bigi èn a musu kisi bun furu prèise.”—Ps. 145:3.
2 Wi musu denki dipi fu a bunfasi fu Gado na a pisi ten fu a Memrefesa. Wi musu taki Yehovah tangi fu di a seni „en wan-enkri Manpikin di ensrefi meki, kon na grontapu so taki nanga yepi fu en wi ben kan kisi libi” (1 Yoh. 4:9, 10). Te wi e gi yesi fu hori a Memrefesa, dan disi sa naki wi ati fu di a sa sori taki „Yehovah abi switifasi nanga sari-ati . . . èn a abi furu lobi bun-ati” (Ps. 145:8). Fu tru, a lusu-paiman na a moro prenspari fasi fa Yehovah sori lobi gi a heri libisma famiri (Yoh. 3:16). Te wi e prakseri fu a lobi fu Gado èn te wi e prakseri dipi fu a fasi fa Yesus tan hori en soifri retifasi, dan wi sa kisi a firi fu prèise Yehovah. Wi sa prèise en fu têgo fu a lobi fu en di no abi skotu fu di a meki taki wi kan libi fu têgo.—Ps. 145:1, 2.
3 Yepi trawan fu prèise Yehovah: Fu di wi abi bigi warderi gi a lusu-paiman di wi kisi fu Gado, meki wi e gi trawan wan kari fu kon prèise Yehovah makandra nanga wi. Nanga yepi fu a santa yeye, a psalm skrifiman ben skrifi: „Den sa taki fayafaya fu yu bun-atifasi di de pasa marki, èn fu yu regtfardikifasi ede, den sa bari wan prisiri babari” (Ps. 145:7). Soso a yari di pasa wawan, Yehovah Kotoigi na heri grontapu ben gebroiki moro leki wán milyard yuru fu du a preikiwroko. Sortu bakapisi den ben abi fu a muiti di den meki? Ala wiki sowan 5100 sma teki dopu fu sori taki den gi den libi abra na Yehovah. Ala nanga ala 15.597.746 sma ben kon na a Memrefesa, sosrefi moro leki 9 milyun sma di no bigin fu prèise Yehovah ete leki preikiman fu a bun nyunsu. Disi e sori taki moro sma de ete di musu kon na ini na organisâsi! Leki Kownukondre preikiman wi e warderi a grani di wi abi fu prati a bun nyunsu nanga trawan so taki den kan poti prakseri na Yehovah, en Manpikin, nanga en Kownukondre.
4 Wan tra fasi fu yepi trawan fu gi grani na Yehovah, na fu gi den wan kari fu kon makandra nanga wi na a Memrefesa. Yu skrifi den nen fu den sma di yu wani gi wan kari èn sosrefi den wan di yu musu memre sortu dei nanga yuru a Memrefesa e hori? Yu gi ala den sma disi wan kari? Efu yu no du disi ete, dan yu kan gi den wan kari ete. Yepi den fu frustan san na a marki fu a fesa. De srekasreka fu gi den fisitiman wan switi kon na a Memrefesa. Meki den firi densrefi bun te den doro, meki den leri sabi tra sma, èn prèise den fu di den kon drape.
5 Te den nyunwan e kon na a Memrefesa, dan disi kan yepi den fu go na fesi na yeye fasi. Wan bijbelstudenti, di abi wan siki di e meki en muilek gi en fu go na presi pe furu sma de, ben kon na a Memrefesa. Di sma ben aksi en fa a ben feni a konmakandra, a ben taki: „A ben de wan tumusi aparti neti, èn mi ben de drape.” Sensi a dei dati a bigin kon na den konmakandra.
6 Baka a Memrefesa: Fa den wan di wani sabi moro kan kisi yepi fu prèise Yehovah? Den owruman sa poti prakseri na den nyunwan di kon na a Memrefesa èn den sa seti sani so taki preikiman di abi ondrofeni kan go na den wan disi syatu baka a Memrefesa. Den preikiman sa luku den moi sani baka di den sma disi ben leri na a Memrefesa. Kande son wan fu den sma sa wani kisi bijbelstudie na oso. Den sma disi musu kisi a kari tu fu go na ala den gemeente konmakandra di e hori ibri wiki. Te den sa du disi doronomo, dan den sa kon sabi moro fu Bijbel.
7 Sani seti so taki den wan di no e preiki ibri mun èn den wan di no e preiki moro, e kisi deki-ati fu kon doronomo na den konmakandra. Efu den owruman e aksi yu fu yepi wan sma di no e preiki moro fu bigin teki prati baka na a preikiwroko, dan de klariklari fu yepi a sma. Te wi e sori taki wi e broko wi ede na wan lobi-ati fasi nanga den brada fu wi, dan disi de akruderi a frumane fu na apostel Paulus: „We dan, solanga a ten bun gi wi ete, meki wi du bun gi ala sma, ma spesrutu gi den wan di de na ini a srefi bribi leki wi.”—Gal. 6:10.
8 Meki wi alamala meki tranga muiti fu de na a Memrefesa tapu 16 april. Wi no wani misi a tumusi santa okasi disi fu prèise Yehovah. Iya, meki wi prèise Yehovah gi den bigi wroko fu en, now èn fu têgo!—Ps. 145:21.